Azad Ararat Azad Ararat
VEWRÊS KAŞKA

Zekî Şengalî 21 Tebax 2018 Sêşem

Şehîd Zekî Şengalî dewa Şemsê ya Qubînê ke qezaya Êlihe ya de yeno dinya. Wexto Şehîd Zekî Şengalî ame dinya Kurdîstanî de dewleta tirke asîmîlasyonêk dabî dest pêkerdene. Peyê çin kerdişê sûrî ra çin kerdişê spî game bi game ramitêne. Êdî winî bîbî ke Kurdîstanij xo bi xo welatê xo ca verdayêne û şiyêne dewletanê Ewropa, bitaybet zî Elmanya.

Serra 1968 de berê Elmanya gurekaranê tirkya rê abî. Gurekarê şaranê Tirkîya şîyêne Elmanya û uca de gureyayêne. Bi no tewir Tirkîya û Vakurê Kurdîstanî de feraseta Elmanijî raver kewt. Seba ke Kurdîstanî de welatperwerî amebî çin kerdene kurdî wayîrê welatê xo nêvejiyayêne.

No planê dewlete hetê Rayber Abdullah Ocalanî ra ame xeripnayene. Rayberî verê verkan şarê kurdî mîyan de welatperwerî raver berd. Badê cû PKK rona û fikrê xo PKK reyde vila kerd. Rayberî dî ke şarê kurd vilayê dinya bena, her cayê ke kurdî estê rê kadro rusna û ê cayan de fikrê welatperwerî û yê şorişgêrîye raver berd. Sere de Ewropa û Ewropa de zî Elmanya de kadroyanê PKK bi fikrê Rayberîye reyde têkoşîn kerdêne. Bi hezaran ciwanê kurdî Ewropa ra ageyray û amey welat de têkoşîn kerdênê. Zafêrî zî bîyêne şehîd.

Şehîd Zekî Şengalî zî nê kurdanê Ewropa ra yew o. Heto bîn ra êzîdî yo. Bi naskerdena ey Tevgera Azadîye ra o ardo xo. O zî destpêke ra heta roja bîyo şehîd bîyo layikê Raybertîye û bêmabên têkoşîn kerdo. Zekî Şengalî hem Ewropa de hem welat de hem zî Şingal û Başûrê Kurdîstanî de bi serranê derg û dila têkoşîn kerdo. Heme azayanê aîleya xo kirişto têkoşînî mîyan. Peynîye de yew lajê xo zî bîyo şehîd.

Zekî Şengalî bi no pratîkê xo bîyo gird, bîyo serwerê şarê xo. Rayîr nîşanê şarê xo yê êzîdî û ne êzîdî dayo. Şert û şûrtanê zehmetan ra vîyarto û îradeyê ci bîyo sey pola. Vera tasfîyekaran de vinderto û rêxistin pawito. Vera dişmenî de bi kîn têkoşîn kerdo û dişmen tersnayo. Ey cesaret dayêne embaz û şarê xo. Qendîl û Şengalî de ma pîya pratîk kerdo. Ez nêzdî ra bîya şahidê şexsîyeta ey. Şehîd Zekî Şengalî; başo ke mi ti şinasnayî. Ez bi embaztiya to serberz a.

Bêgûman sere de Rayber Abdullah Ocalan, PKK seba azadiya şaran û merdimîye kadroyan resnenê. Eke ma şorişan ra biewnê ma vînenê ke problemê kadroyan zaf gird o. Rayberîya naye hol zanayêne. Coka sera 90 ey xebatê kadrotî kerd ke kadro bieşko şarî rê serweriye bikero. Şehîd Hakî Karer ra heta Şehîd Zekî Şengalî bi hezaran kadro resay û şehîd kewtî. Bi des hezaran kadro zî hîna têkoşînî mîyan de yê.

Dişmenan waştêne bi bêtesîrkerdişê Rayberîye têkoşînê ma bin fînê. Labelê nêbî. Na fin waştêne PKK sey partîyêka pirr xirab a bimojnê la şarî cewab da dişmenan û vatêne: ˝PKK şar a, şar tîya ya˝. Fina hesabê dişmenî nêgirewt. Badê nê kerdenan dişmenî dest eşt kadroyanê ke Partî û rêxistinî îdare kenê. Goreyê dişmenan eke nê kadroyê îdareker bêrê çin kerdene kadroyanê bîn eşkenê bixapnê û biancê xo het. Esas hesap no yo la no hesap zî sey yê verênan şaş o.

Şehadeta Şehîd Zekî Şengalî do Tevgera Azadiye ra bibo hêz. Peynîye de dişmenî do bibê poşman. No şar do nê kerdenanê Tirkîya, PDK û Iraq qebûl mekerê û nê dişmenan poşman bikerê.