Azad Ararat Azad Ararat
VEWRÊS KAŞKA

Xo veşnayîş yan dişmenî veşnayîş? 02 Kewçer 2018 Sêşem

Fina Ewropa de yew ciwanê ma bedenê xo da adirî ver. Çunke dişmenî bi xedarî yenê kurdan ser. Kurdî zî heme hetan ra xo ver ro danê. Ciwanê ke Êlihij o, verê çalakîye virazo yew video zî viraşto. Amancê çalakiya xo tede ano ziwan.

Ciwanê ma seba ke Rayber Abdullah Ocalanî ser o tecrîd esto, dewletanê Ewropa vera tecrîdê ser Rayberîye û şerê vera kurdî de yeno kerdene de bêvengê û Erdoxanê qatil kenê meymanê xo adir verda ganê xo.

Bêgûman xo adirî mîyan de helênayîş zehmeto. Her keso biwazo nêşeno xo biveşno. Êyê xo veşnenê êdî tehamûlê ci vera kerdenanê dişmenan de nêmaneno coka xo veşnenê û xo veşnayîş beno yew çalakîye ke vera dişmenî de yena kerdene. Fina hetê fikrî, bawerî û welatperwerî ra kesêk raver nêşiro nêşeno xo biveşno.

Tarîxê têkoşînê ma de xoveşnayîş zî yew rastîye ya. Labelê xo veşnayîş yew metodo daîm nîyo. Wexto ke Şehîd Mezlûm Doxanî xo veşna, veşnayîşî ra teber destê ci de çi çî çin bî ke çalakîyêka bîne bikero. Mezlûm Doxanî bi çalakîya xo ya tarîxî de vernîya xoverdayîşê zîndanan akerd. Badê cû Zekîye Alkan fina sey Mezlûm Doxanî xo Newroza serra 1991 de kela Amedî de veşna. No zî nîşaneyê welatperwerîye bî û çalakîye venga şarê kurdî dayêne. Şarê kurdî zî veng heşna û Kurdîstanî de serhildanî dest pêkerdî. Serra 1992 de Rehşan Demîrel Îzmîr de, ke yew şaristanê Tirkîya yo de, xo veşna û mana çalakîye bîye her çiqas welat ra dûrî xerîbîye de zî bibê, ganî kurdî fek welatê xo ra nêverdê.

Wexto ke Rayber Abdullah Ocalan kewte destê dewleta tirke bi desan kurdî bedenê xo dayî ver adirî. Bi no tewir wayîr Rayberîya xo vejîyayêne. Çunke sewbîn çare çin bî.

Nê serran ra tepîya ge-ge mîlîtanî ge-gane welatperwerî seba Rayberîye xo veşnenê. Seke Rayberîye bi xo zî vano, no tewir çalakîye kerdiş û xo veşnayîş rast nîyo. Çirê? Nika destê her kurdî de îmkanê têkoşîne esto. Yanî ganî nîyo kes seba Rayberîye û kurdan xo biveşno. Her kes eşkeno hetêk ra têkoşîn bikero. Eke ciwano, herinda ke xo biveşno ganî dişmenê xo biveşno. Herinda ke peynî ciwîyayîşê cuyeya xo bîyaro wa dişmenê xo ra hesab biperso. Kes eşkeno gerîlatîye bikero. Eşkeno sîyaset, dîplomasî ûsn karanê cîya-cîya bikero. Xora dişmen kurdî merde wazenê. Ê vanê kurdî ganî ya merde bê yan zî koleyê ma bê. Eke ciwanê kurdî zî herinda ke dişmenê xo biveşnê bêrê xo biveşnê peynîye de dişmenî kenê şa. Dişmen xora merdişê kurdê azad wazeno. Ganî kes bi çalakîye û kerdenanê xo yê ciya-ciya xizmeta dişmenî mekero. Xizmeta şarê xo bikero. Têkoşîne gird bikero û raver bero. Ma bi xo veşnayîşê winasî têkoşîne beno gird!

Kesêk eke wazeno ganê xo bikero fedayê şarê xo ganî baş bifikiro û bireyê xo winî bido. Gandayîş rehet nîyo. Ganî her gandayîşêk têkoşîne berz kero. Şarê kurdî bihêz kero, dişmenî zeîf kero. Eke wina bî mana çalakiyan beno. Nêke ma do vajê ez xo kena feda la xo fedakerdişî de dişmen do bihêz bibo.

Ganî kurdî çalakiyanê xo de gonîya xo dalpe bi dalpe rokerê û peynîye de dişmenî bin fînê!