Azad Ararat Azad Ararat
VEWRÊS KAŞKA

Xîyanet 10 Tîrmeh 2018 Sêşem

Kurdan mîyan de di çîyê esasî estê ke kurdî hema zî wazenê îspat bikerê ke estê. Nînan ra yew estena kurdan a. Kurdî ameyê halêko winasî ke bi serran o wazenê xo dinya rê, dişmenanê xo rê îspat bikerê ke ê estê. Yo bîn zî xîyanet o. Kurdê welatperwerî bi serran o wazenê îspat bikerê ke kurdan mîyan de xîyanetêko gird esto.

Rojawanê Kurdîstanî de yew şoriş ser kewt la heta nika zî dewletî no sîstemê kurdan yo demokratîke bi hawayo fermî qebûl nêkerdo. Nika kurdî hem estena xo hem zî estena sîstemê xo wazenê îspat bikerê, labelê dewletî rojane sîyaset kenê û hem kurdan reyde têkîlî ronanê hem zî înan bi hawayo fermî qebûl nêkenê.

Tewr peynî Başûrê Kurdîstanî de yew xîyaneto gird yeno cuyayene. Kurdê welatperwerî heme medyaya xo wazenê îspat bikerê ke keyeyê Barzanîyî û PDK mîyanê xîyanetêko gird de yê. Xîyanet eşkera yo. Çîyo ke nêro zanayene zî çin o. Fina zî kurdan mîyan de xîyanet seke welatperwerî bo, mojnayîş raver o.

Çirê halê kurdî wina yo? No yew perso yeman o. Cewabê ci hende rehet zî nêyeno dayene. Mesele ra fam beno ke xîyanet kurdan mîyan de xorîn o. Tena xorîn nîyo, tarîxî yo zî. Tena tarîxî ney, hîra yo zî. Çirê wina yo?

Cigêrayîş û têgêrayîşo gird Rayber Apoyî kerd. Rayberî tarîx ra ewnîya û tespît kerd ke xîyaneto gird verênanê kurdan mîyan de Enkîdoyî kerdo. Enkîdo yewo dewij o. Yew fahîşeya şaristanije ey xapênena û ana şaristan mîyan. Dima ra Enkîdo beno xayinê şarê xo û seba çinkerdişê şarê xo xizmetê şaristanijan keno. Merdimîye ra durî keweno, beno yewo zalim û zorvajî şarê xo ser o keno.

Xîyanetê dîyine ke tarîxî yo, Harpagos kerdo. Seraya Medan de vera keyayê (kral) kurdan de xîyanet keno û îqtîdarî teslîmê farisan keno. Bi no hawa îqtîdar kurdan dest ra bi destê yew kurdê xayînî vejîyeno û keweno destê farisan. Nê di sey serrê peyênan de her ke sere ameyo wedarnayene, pey ra xîyanetî zî sere wedarnayo û embazîya dişmenanê kurdan kerdo. Serewedaritişê Şêx Seîd û yê Seyîd Rizayî de çîyo tewr balkêş fina xîyanet o. Xîyanet bîyo kulo sîya û kewto bedenê kurdan. Sey kermê dare dare weno, şarê kurdî weno.

Vakurê Kurdîstanî de serranê hewtayan ra nata xîyanet yeno kerdene. Labelê xîyanet kurdî mîyan de bîyo partî, rêxistine, parlamenter, wezaret ûsn. Êdî xîyanet bi rêxistine reyde yeno kerdene. Başûrê Kurdîstanî de yeno zanayene Îbrahîm Ehmedî PDK ronayo. Mustafa Barzanî sere de kewto partîye mîyan û badê tede bîyo îqtîdar. Yanî dest nayo partîye ser. A roje ra heta na roje keyeyê Barzanî û partîya PDK xîyanetê şarê kurdî kenê. Labelê PKK bi serran o keno nêkeno neşeno beşekê kurdan bido qebulkerdiş ke PDK xîyanetkar o. Yew şarî mîyan de zeîfîye bena, la hende xorîn ney. Xîyaneto hende xorîn tena kurdan mîyan de esto. Qandê cû kurdî xo ra xeyr nêvînenê.

Zimistan ra nat game bi game Başûrê Kurdîstanî de cayê ke PDK tede îqtîdar o de dagîrkerîya tirkan yena raver berdene. Ti bê nê xîyanet û na dagîrkerîye bi tayê kurdan bide qebûlkerdiş.

Vanê her şar layiqê çi bo winî zî cûyeno. Şarê tirkî layiqê Erdoganî yo ke wina krîzî mîyan de cuyeno. Şarê kurdî layiqê xîyanetî yo ke bi serran o yewîya neteweyî nêyeno ronayene û Kurdîstan azad nêbeno.