Azad Ararat Azad Ararat
VEWRÊS KAŞKA

Senîn beno? 04 Îlon 2018 Sêşem

Heme hetanê Kurdîstanî de dejî estê. Dejî bêpeynî yê. Her roje şarê ma dejanê cîya ra cîya vîneno. Coka kes xo ra pers keno û vano: senîn beno? Heqeten do senîn bibo? Heqê ma yo ke ma nê persan pers bikerî. Çunke ma ameyê cayêko girîng de vindertê. Êdî nê serran de yan kurdî benê azad yan zî orte ra yenê wedarnayene. Êdî zaf derg nêanceno, yan azadîyêka bi şeref yan zî çinbîyayîş yeno verê ma. Qandê cû ma yê kurdî û dostanê ci ganî nê serran de zaf heşarê xo bibê. Çunke şansê ma yê vindîkerdişî çin o. Eke têkoşînê azadiye de kurdî vindî bikerê, no vindîkerdiş yeno mana vindîkerdişê merdimîye. Seba ke kurdî ewro bi têkoşînê xo ya rayberîye heme şaranê azadîwazan ra kenê. Coka vindîkerdişê kurdan yeno mana vindîkerdişê heme merdimîye.

Nê rojanê peyênan de Rojhelatê Kurdîstanî ra Ramîn Hisên Penahî fina keweno rojdeme. Eke ma nê serebûtî ra biewnê; beno ke yew ciwanê kurdî bêro dardakerdene. Labelê her çiqas bêro dardakerdene zî peynîye de şaro kurdî ser keweno. Çirê? Çunke zulim, zorvajî û tehda her tim azadîye kenê nêzdî. Tarîx de zî yeno dîyene ke wextanê peyênan de heme zordarî benê har û bi harbîyayîşî reyde çin benê yan zî yenê çin kerdene. Eke ma dardakerdişê Ramîn Hisên Penahî vindarnê no beno yew serkewtişê kurdan û demokrasîwazan.

Vakurê Kurdîstanî de rojdeme hîna germêr o. Hetêk ra veşnayişê daristananê Dêrsimî heto bîn ra mayanê şemîye ser o zorvajiya ke yena kerdene. Teberê nînan de xeylê serebûtî estê ke merdim qal bikero. Labelê nê di serebûtî wijdanê her kesê ke xo rê vanê ez merdima dejneno. Bêgûman kurdî benê azad. Têkoşîne şino raver. Qandê cû dişmeno bêkalîte û eslê xo de zaf tereso beno har. Beno ke nê serran de ma hovîtîya tirkan yê nêdîyaye zî bivînê. Labelê eke ma aya û têkoşîne de rast bê, kêmanîyan nêkerê, sera se ser zî kewenê. Serkewtişî ra ver dişmen do har bibo û heme hetan ra galê bikero. Çiyo ke ma bikerê ganî ma zerarê xo yê madî û manevî bikerê kêmî. Naye ra wet teba destê ma ra nêyeno. Çunke Kurdîstanî de azadîye gonî wazena hem zî gonîyêka vêşî.

Rojawanê Kurdîstanî de ma hem keyfweş ê, hem zî xembar ê. Çunke Rojawanî de yew sîstem û yew cuye ameyo awan kerdene. Naye ver ma benê keyfweş. Labelê Efrîne de ma yew derba girde werd. Her çiqas Efrîne 58 rojan xover ro da zî peynîye de dişmenî Efrîne dagir kerd. A roje ra nata her roj Efrîne de şer beno. Dişmen yeno kiştene. Labelê dişmenî şarê ma yê ke Efrîne de yê her roje îşkence ra vîyarneno. Merdiman remneno. Xozaya Efrîne tahrîp keno. Qandê cû ma xembar ê û sere de efrînij heme kurdanê welatperwer wazenê rojêk verê Efrîne bêro azad kerdene. Nê rojanê peyênan de çalakîyanê ke benê ra zî merdim fam keno ke se beno wa bibo Efrîne do bêro raxelisnayene. Xora sewbîn çare zî çin o.

Başûrê Kurdîstanî de yew suîkast ame kerdene. Nê suîkastî de ma Zekî Şingalî şehîd da. Na serebûte ra zî yeno famkerdene ke dişmenê kurdan yê tewr gird, dewleta tirke, çiqas bêçare ya. Hetêke ra rind ame dîyene ke rewşa Başûrê Kurdîstanî nê serebûtanê winasî ra çiqas akerde ya. Çunke Başûrî de fikrê welatperwerî zaf ameyo xeripnayene. Çend sey dolaran bidê kamî şeno ajantîyêka rind dişmenan rê bikero.

Kurdîstan sey awe kel dano giryeno la teqayîşî de şarê ma do bibo azad.