Azad Ararat Azad Ararat
VEWRÊS KAŞKA

Rojhelato Mîyanên ser o 24 Tîrmeh 2018 Sêşem

Rojhelato Mîyanên aram nêbeno. Eke wina şiro do aram zî nêbo. Çunke wextê sîstemê cîhangîrî yê sermayedarî vîyarto. Dewletê ke Rojhelato Mîyanên de yê nêşenê aramî bîyarê herême. Çunke nê dewletî ser hişê netewe dewlete ameyê ronayene. Tayê ci zî bi têkoşînê xo yê zereyî ney hetê hêzê teberî ra ameyê ronayene. Çunke hêzê teberî waştêne Rojhelato Mîyanên lete bikerê û îdare bikerê. Eke Rojhelato Mîyanên de yewîya şaran estbo hêzê teberî nêşenê sey wazenê Rojhelato Mîyanên îdare bikerê. Qandê cû her ke şino dewletî benê zêde la çareserî zî nêyena meydan.

Wexto ke peynîya serra 2011î de Tunus de yew ciwano endazyar xo kişt, sere de welatê ereban û welatê bînî yê Rojhelatê Mîyanên de şaran sere wedarna. O wext hêvî estbî ke na fin Rojhelato Mîyanên de şarî ser kewê û demokrasî bêro herême. Serrî vîyartî la ne demokrasî ne zî aramî nêame herême. Çunke sîstemê cîhangîrî û dewletê netew dewlete û statûkoperestî mudaxale kerdênê û nêverdayênê ke şar têkoşînê xo bi demokrasî peynî kero. Peynîye de yeno dîyene ke wexto ke şarî têkoşînê xo de sernêkewî, dewletê herême hîna vêşî faşîzm de şîyê.

Nê hewt serranê peyênan de ma dî ke Tirkya de faşîzm rêçê xo hîna vêşî verda komelî mîyan. Êdî wînî bîyo ke bi metodanê demokratîkan kes nêşeno vernîya faşîzmî bigîro. Seba Tirkîya yew rayîr mendo ke bibo demokratîke û a rayîr zî şerî mojnena. Xora êyê ke şer kenê zî tena kurd ê. Surîye de wexto ke şarî sere wedarna, her kesî winî bawer kerdêne ke do rejîmê Beşar Esadî birijîyo û Beşar Esad do îqtîdar ra bêro war. Nika ma rewşa Suriye ra ewnîyenê û winî aseno ke Beşar Esad do îqtîdar de bimano. Çirê? Çunke wexto ke şarî sere wedarnayî, sere de Amerîka û Rûsya mudaxale kerdî û nêverdayî ke şarê Sûrîye demokrasîya xo rono û xo îdare bikero. Nika bi metodanê demokratîkan vurnayîşê îqtîdarî mumkin nîyo. Seba Sûrîye yew rayîro rast mendo. O rayîr zî rayîro şer o ke ganî şarê Sûrîye bikerê. Eke Sûrîye de sey kurdan şarê bînî şerê xo bikerê û xo biresnê demokrasi, beno ke aramî bêro Sûrîye.

Iraq Tirkîya û Sûrîye ra cîya nîyo. Tewr peynî de ma dî ke yew weçînayîş ame kerdene la çi weçînayîş bi(!) Başûrê Kurdîstanî de partîya ke tewr zaf kurdî rotî, bîye partîya yewine(!) Iraq de erebî mîyan de Muqteda El Sedir bîye yewine. Labelê pirr eşkera yeno dîyene ke hem Başûrê Kurdîstanî de hem zî Iraq de sextekarî ameye kerdene û encamêko demokratîke nêvejîya meydan. Qandê cû fina şêligê ıraqijî sere wedarna. Basra ra heta Bexda şêligî çalakîyan mîyan de yê. Kes şeno vajo problemê Iraqî bi destê dewlete çareser nêbenê û şar jî nêşeno temsîlkaranê xo bivejno vernî û rayîrêko newe bivîno. Bi no tewir krîz xorîn bena. Peynîye de her kes vindî keno. Seba Iraq û dewletanê bînan tekane çare netewa demokratîke ya ke kurdî wazenê her çar leteyê Kurdîstanî û Rojhelato Mîyanên de ca bikerê.

Rewşa Îranî zî yê bînan ra cîya nîya. Hewcedarî vurnayîşî esta, la senî? Kes nêzano. Coka rejîm estbîyena xo domneno û zilm û tedaya girde keno. Uca zî tekane rayîr rayîro netewa demokratîke û demokrasî bi xo yo. Qandê ney ganî şarê Rojhelatê Mîyanênî şer bikerê. Ma biwazê mewazê destê şaran de sewbîna metod çin o. Yan şer û azadî, yan bindestî û koletî!