Azad Ararat Azad Ararat
VEWRÊS KAŞKA

Rojeve ser o 11 Îlon 2018 Sêşem

1- Ramîn Hisên Penahî peyêna peyêne de ame darda kerdene. Bêgûman her çend rojan de reyêk dewleta Êran a faşîst kurd bo kurd mebo, çi cinî ba çi camêrd bo darde kena. Ganî ma vera heme dardakerdişan de vinderê. Darda kerdişê Ramîn Hisên Penahî bî malê tora komelî. Ma heme nê darde kerdişî ver dejayî. Tayênan medya komelkî de nuştêne û vatêne: ˝Eke dewleta ma kurdan estbîyêne wina nêbîyêne˝. No tespît zaf şaş o. Çunke Êran de farsî estê û wayîrê dewlete yê. Hetê na dewlete ra zî yenê darda kerdene. Yanî şarêk bibo wayîrê dewlete darda kerdişî dest nêreyeno. Tîya de çare çîyêko bîn o. Fina Başûrê Kurdîstanî de statûyek nêm dewlete esto la nînan dewleta Sûrîye ra vêşî dişmentiya Şorişa Rojawa kerdêne û kenê. Ganî hol bêro fam kerdene ke bi destvistişê dewlete komel azad nêbeno. Azadîye çîyêka teberê dewlete de yena cuyayene. Qandê cû Rayber Ocelanî fek dewlete ra vera da. Labelê no babet hîna zî rind nêameyo fam kerdene. Çi heyf!

2- Dewleta Êran gale berd di partiyanê Rojhelatê Kurdistanî ke Başûrê Kurdîstanî Koyê de manen ê. Eke merdim tarîx ra biewno baş fam keno ke PDK û YNK nê 40 serrîyê peyên de bîyê wayîrê pratîkê xayinane. PDK rêxistin, partî û serek û kadroyanê partî û rêxistinan çin kena. Wexto ke wina kena hetkariya gird zî dewletanê dagîrker ra gêna. Yanî PDK sey ofîsê dewletanê dagîrker girweyena. YNK zî hema winî ya. Nê her di partî sucdar ê. Nînan hem partîyanê Bakurê Kurdîstanî hem zî Partîyanê Rojhelatê Kurdîstanî çin kerdê. Çin kerdişê Partîyanê Rojhelatê Kurdîstanî de rola PDK esta la rola esasî YNK girewta xo ser û karê xo zî baş kerdo.

Xora peynîya nê kerdenanê YNK de Partîyê Rojhelatê Kurdîstanî serkewte nêbîyê û bîyê mahkumê YNK û Koyê de ameyê ca kerdene. Nê partîyan ser o kontrolê YNK se ra se yo. Seba ke YNK jî kontrolê Êran de ya kontrolê Êran jî nê partîyan ser o se ra se yo. Nê partîyî bîyê marjînal. Êdî çîyêko bikerê zî nêmendo. Rewşe winaya la na rewşa winasî de çirê Êran gale berd nê partîyan ser. Ganî têgêrayişêko baş bêro kerdene. Nê partîyan de kesê welatperwerî zaf ê. Wazenê têkoşîn bikerê la seba ke zîhnîyet û bernameyê partîyan de xo nêvurnenê nêşenê çîyêko ciddî bikerê. Werekna wina nêbîyêne. Ez êrîşê Êran de kesê ke bîyê şehîd bi rêzdarîye reyde ana xo vîr. Dirbetan rê weşîye wazena.

3- Nê rojan de ez Qamişlo de ya. 8ê êlule de hêzanê Sûrîye cayê xo ra vejîyay û verê xo dayêne cayanê ke kontrola asayîşa kurdan de yo. Peynîye de pêrodayîş ame kerdene. Ma nê serebûtanê peyênan yê her çar leteyanê Kurdîstanî de vînenê ke nê dewletê gewende xo bi xo xo nêvurnenê û heqanê kurdan nêşinasnenê. Nê dewletî ganî yan hetê şarê nê dewletan ra bêrê vurnayîş yan zî ganî Tevgera Apoyij nê dewletan bivurno. Vurnayîş zî bi metodanê diplomatîk û sîyasî ya nêbeno. Ganî mudaxaleyê huşk bêro kerdene. O zî ser vistişê şorişî yo. Nêke nê dewletî tim do biwazê kurdan xo rê bikerê kole. Çunke hişê dewletanê dagîrker de kurt tena eşkeno bibo kole. Qandê cû seba ma kurdan û şaranê ke ameyê kole kerdene, tekanê rayîr şoriş o.