Azad Ararat Azad Ararat
VEWRÊS KAŞKA

Roja Kobanî de fina Kobanî 06 Sermawez 2018 Sêşem

No di hewteyo mi meqale nênûşt. Gure hende zaf bî mi nêşa. Ez nika cehd kena ke na hewte de binusa, la senî? Ya rast ez zî nêzana. Ez do hema winî rast xo werda mîyan. Ka peynîye senîn beno. Meqaleyêka senîn nusîyena.

Bêgûman her gande feza ra bestaye yo. Her ganîyo ke dinya ser o ciwîyeno heqê xo yê ciwîyayîşî esto. Qandê cû her kesê ke kurdo/a heqê xo yo ke bi heqanê xo ya ciwîyeyê xo biramno. No tespîtêko pêroyî yo. Wexto ma xo verdê babetî mîyan; tay kesan rê heqê ciwîyayîşî esto, la tay kesan rê zî çin o. No hetra dinya biyo di lete. Êyê ke kişenê û êyê ke yenê kiştene estê. Leteyêk merdimîye wazena peynîye bi na dîyalektîkî bîyaro, leteyê bîn zî ya xo de israr keno û kiştişî keno ferz.

Ma yê kurdî teberê wextî de ameybî verdayene. Bi rayberîya Rayber Apo şenik bo zî kurdî ameyê xo. Kurdî nêwazenê bikişê û bimiri. Seke Rayberîye zî vatbi ˝Ma wazenê biciwiyê û bidîn ciwîyayîş˝. Yeno dîyayene; nê ferasetî rê ca çin o. Heme şert û şûrtî zor danê şaro kurdî ke dîyalektîkê kiştişî de cayê xo bigîro. O wext meydan beno meydanê cengî. Meydanê cengî ra xo dana hetêk qet bi kurdan nêşino. Kurdî tarîxî de zî qehremanê meydananê cengan bî. Ewro zî hema winî yê. Naye de dudilîkerdiş rast nîyo. Eke dudilî estbo o wext vindîkerdiş zî beno para ma. Ma yê kurdî biwazê mewazê ganî ma meydanê cengî de bikerê teq û req. No weçînitişê ma nîyo, la ma neçar ameyê verdayene. Qandê cû: ˝Merg kotî ra yeno wa bêro, seran û çiman ser˝. Ma vateyê Che Givara ra bestayeyê. Kam duştiya ci keno wa bikero, la ma bi xo ey sey rayberê xo vînenê. Ma nika zî hemrayanê enternasyonalîstan reyde têkoşînê xo ramnenê.

Ez bêrî mesela esasî ser. Nê rojanê peyênan de serekê dewleta tirke Erdoxanî Rojawanê Kurdîstanî tehdît kerd. Verê Rojawanê Firatî ser o sîyaset kerd û heta nika Cerablûs, Bab, Ezaz, Efrîn û Îdlîb vist xo dest. Nika wazeno Rojhelatê Royê Firatî ser o sîyaset bikero. Eke dest ra bêro dagîr zî keno. No het ra qet gûmanê mi çin o. La sîyasetê dinya destê Erdoxanî de nîyo. Erdoxan bi xo destê sîyasetê dinya de yo. Çîyo ke heta nika kerdo de destûrê dewletanê girdan esto. Eke winî nêbîyêne serra 2012 de, hîna çend rojanê destpêk de, wexto ke Kobanî ame raxelisnayene o wext do Erdoxan bi artêşa xo ya bikewtêne Rojawanê Kurdîstanî.

Nê rojanê peyênan de, taybet Roja Kobanî ya Dinya de, dewleta tirk a faşîst çekan Kobanî û Girê Spî ser o xebitnena. Peynîya nê kerdenanê dewlete de endamanê hêzanê leşkerî bîyêne şehîd û dirbetin. Yew domana 11 serrî Sara Rifet Mistefa bîye şehîd.

Nika ra tepîya ganî hêzanê kurdî yê leşkerî, sîyasî, dîplomasî û şarê kurdî; serranê verê ra qat bi qat ziyadêrî şer bikerê. Çunke sewbîn çare çin o. Dîyalektîk wina wazeno. Taybet zî dîyalektîkê ke mîyanê Kurdan û dewleta tirke de ameyo ronayene. Wext wextê vitevit nîyo. Xo nata bota tadayîş nîyo. Rojawan û heme cayanê ke kurdî û dostanê ci ciwîyenê de babetê sereke ganî şer bo. Teberê rojevê şerî de rojev awan kerdiş do ma nêdo qezenckerdiş.

Êdî wexto, ma dersêko tarîxî bidîn rejîmo şerê taybet yê tirkîya. Peyra zî do herkes bivîno, kurdî senî ser kewtê.