Azad Ararat Azad Ararat
VEWRÊS KAŞKA

Pêdîyinê Suriye 31 Tîrmeh 2018 Sêşem

Surîye de se beno? Ameyox do senîn bo? DAÎŞ şenik-şenik yena çin kerdene. Badê do senîn bo? Statûya kurdî do senîn bo? No het ra eke merdim persan biperso persî benê zêde. La nê rojan de çîyêk bale ant xo ser. Badê damusnayîşê dewleta Suriya, ke te de ge-ge tehdît estbî, îdarekeranê Rojawanij jî damusnayîş dayêne. Vatêne: ma amadeyê ke dewlete reyde pêdîyinan virazê. Badê zî yew heyetê Rojawanij şî paytexta Suriye Şam. Xeberê ke uca ra yenê baş ê. Xeberî hêvî danê merdimî la ganî dewlete cidî ba û ameyox de pragmatîst nêzdî nêba. Ganî baş bizana ke dîktatorîya verê nêyena qebûl kerdene.

Nê babetî de ganî merdim naye vajo ke; her çar leteyanê Kurdîstanî de kurdê bi vîrê Rayber Abdullah Ocalanî reyde têkoşîn kenê nêwazenê sînoranê dewletî bixeripnê û wazenê bi formûlê dewlete+demokrasî ya mîyanê sînoranê dewletî de bicuyê. Û wazenê bibê wayîrê sîstemê xo û goreyê naye zî cuya xo rêxistin bikerê. Çunke vîr de yeno vaştene bi şaranê bînan a bi metod û ferasetê way û birayî bêro cuyayene. Naye zî bi netewa demokratîke bi name û formûl bena. Tîya de hem netewa kurdî yena pawitene hem zî heqanê netewanê bînan yeno pawitene. Peynîye de yeno dîyene ke ma tena netewa kurd ney netewanê bînan zî wazenî qezenc bikerî. Yanî ma yê kurdî tena yew dewlete ney her çar leteyanê Kurdîstanî de çar dewletan wazenî. Yan zî çi şar Kurdîstan û Tirkîya, Îran, Suriye, Iraq de cuyenî ma heminan wazenî qezenc bikerî. Bi mahneyêko bîn ma yew dewlete ney çar dewletan wazenî.

No rêbaz serra 1993ê ra nat Tirkîye de yeno ceribnayene. Çi hef ke dewleta tirke her tim dirî nêzdî mesele bena û her ke şino dewlete hem xo hem zî kurdî dana vindîkerdiş. Eke dewleta Suriye samîmî û dirust nêzdî mesele bibo eşkena xo bixelesno. Eşkena tecrûbeyê kurdî yê demokratîk ra feyde bigîro û problemanê xo çareser bikero.

Suriye de badê Dera rêze yena Idlib. La hîna Efrîn, Ezaz, Bab û Cerablus de çete û wayîrê ci dewleta tirke estê. Eke dewlete samîmî ba kurdî û dewlete eşkenê pîya nê dişmenê xo biqewirnê û sîstemê demokratîke ronê. Ganî delwete kurdî dostê xo yê stratejîk bivîna û îtîfaqê stratejîk bikera. Nêke dewlete vaja ez ewro kurdan reyde têkîlî rona û badê ke xo bihêz kerd na fin verê xo bida kurdî, o wext bi des serran problemê Suriye çareser nêbenê. Heto bîn ra dewlete kurdî reyde îtîfaq rono beno ke no îtîfaq seba Tirkîya, Îran û Iraq zî bibo mîsale û nê cayan de zî formûlê dewlete+demokrasî derbazdar bo.

Nuşte de yeno dîyene, çareseriya Suriya tena bi Suriye de beno. Ne Cenev ne zî Astana seba çareserî nêbenê yew metodo rast. Hêzên teberî bêgûman hêzê girdê la şarî mehkumê nê hêzan nîyê. Şarî eşkenê xo bi xo çareserî bixelqnê. Wexto ke merdim wina bikero şert nîyo ke merdim dewletanê girdan bîyaro vernîya xo û înan reyde mîyanê şerî de bo. Bi metodanê destdaye, bi feraseto rast, bi sîyaset û diplomasîyêko rast şarî eşkenê xo penceyê no şero hîreyine yê dinya dest ra serkewte bireynê.