Azad Ararat Azad Ararat
VEWRÊS KAŞKA

Menfaatê dewletan û şarî 25 Îlon 2018 Sêşem

Dewletî danê pêro û şarî nê pêrodayîşan ver kenê nalenal. Her kesê ke wazenê na dinyaye bivurnê şinê fina dewlete ronanê û bi destê xo sîstemê îşkence awan kenê. Tivanê qey teberê dewlete de ciwîyayîş nêbeno.

Komelî wina ameyê perwerde kerdene. Her keso ke wazeno şoriş bikero, fina dewlete awan keno û îqtîdar ronano. Her ke îqtîdar ame ronayîş wextêko kilm ra pey heme çî fina beno sey verê. Çerxê dinyayê wina geyreno û her ke şino şer û talankerdiş beno vêşî.

Ciwîyeyê merdimîye bi mîlyonan serran o. Fîlozofî vanê se ra neway û heştê tarîxê merdimîye de ne dewlete ne zî îqtîdar çin o. Nê wextan de şerê ke nika yenê kerdene û komkiştenî çin ê. No 5 hezar serrîyo ke dewlete ameya awan kerdene. Herçiqas delwete rengê xo bivurna zî cewherê xo de tim sey xo manena.

Dewlete komelî mîyande sinif awan kena. Burokrasî ronana. Leşkerîye rêxistin kena. Rêxistinê îstîxbaratî ronana. Sey ahtapot heme hetan ra komelî pîşena û nêverdana komel nefes bigîro. Sinifa serdest û îqtîdar pîya kenê û pêameyîşî reyde sinifa cêrî yê bindest ser o zorvajî kenê. No sîstemo vinasî dest ra ganî merdim senî bireyê? Cewabê ci Tevgera Azadîye dana. Destpêke de Vakurê Kurdîstanî de badê cû tewr peynî Rojawanê Kurdîstanî de ame dîyene ke rayîrêko bîne esto.

Teberê dewlete de se qat sîstemê dewlete ra rindêr şarî şenê biciwîyê. Labelê merdimîye winî ameya bander kerdene ke bibo mebo dewlete wazena. Fîlozof, demokrat, şorişgêrî estê ke dewlete nêwazenê û wazenê ciwîyeyê dewlete ravêrnê la çi heyf zaf zeîf ê. No het ra kurdî tenê manenê.

Eke ma Rojhelato Mîyanên ra biewnê; cayêko tarîxî yo. Seba dinyaye her tim bîyo cayêko muhîm. Nika zî muhîm o. Qandê cû her tim erdê ci ser o şer yeno kerdene. Ewro zî her roje şer beno. Winî aseno ke do ameyox de zî şer bêro kerdene.

Dewletî seba menfaatanê xo Rojhelato Mîyanên de têkoşîn kenê. Sere de Amerîka bi serran o wazena Rojhelato Mîyanên de hegemonyaya xo rona. Rojhelato Mîyanên zî seba ke cayêko tarîxî û hetê kulturî ra bi kok o xo ver ro dano. Rusya wazena hegemonyaya xo rona la senî kena nêşena hegemonya rona.

Dewleta Êran zî pişta xo dana şîatîye û wazena Rojhelato Mîyanên de şîayan ser o tesîrê xo viraza û bi rayîra şîayan hegemonyaya xo rona. Tirkîya heme şewan de hewnan vînena û vana verê ma împarator bî, çirê nika nêbî dewletêka gird yê Rojhelato Mîyanên.

Bi kilmî nê dewletî wazenê hegemonyaya xo ronê ke dinyayî ser o bi tesîr bibê. Labelê nê kerdenanê nê dewletanê gewende ver merdimîye her roje nalena. Nê 7 serranê peyênî de bi mîlyonan şêlig cayanê xo ra bîye û verê xo dayêne xerîbîye. Seba hegemonyaya çend dewletan êş û azaro ke nêameyo antene nêmend.

Merdimîye mecbûrî nê dewletan û kerdenanê ci nîyê. Ganî şarî teberê sîstemê dewlete de sîstemê xo yê demokratîke ronê û aramîye bîyarê herêmanê xo. Naye ra nimûneyo tewr raver zî têkoşînê kurdan o. Bi metodanê Tevgera Azadîye heme şarî, bawerî şenê xo azad bikerê.

Bi hêvîya dinya û ciwîyeyêko azad, bêrê ma pêr û pîya têkoşînê azadîye bikerê.