Azad Ararat Azad Ararat
VEWRÊS KAŞKA

Çend analîzê girîngî 09 Kewçer 2018 Sêşem

Mi dêrsimînfo.com î de yew nuşte wend. Ez zaf tesîrê ci de menda. Nuşte 2 rojî mezgê mi ra nêvejiya. Nuşte Îlhamî Sertkaya nuşt bi. Verê mi yew romanê nê nuştoxî wendbi. Roman weşiya mi şîbi.

Tay kemaneyî hetê sererastkerdişî ra estbî. Tay cayan de dibareyî estbî. Sewbîna kitab hol bi. Wexto ke mi dêrsimînfo ra meqale wend ez şok bîya. Badê cû mi bire da ke ez yew meqale binusa û tay analîzan bikera ke wa mesele roşn bibo.

Peyra mi keyepele ra ewna, nuşte ame bi wedarnayîş. Baş o ke ame wedarnayîş. Nuşte de qij vînayîş, cor ra ewnayîş, xo zana û aqilmend dîyayîş est bi. Nuşte de rexnekerdiş ney heqaret kerdiş estbi ke naye zî kes qebul nêkeno. Ez bêrî mesele ser.

Rayber Abdullah Ocalan wexto ke dewe de cuyeno; vera gelek kerdenanê dewijan de vindeno. Cuye qebul nêkeno û keweno cigêrayîşan. Wexto ke dest bi wendişî keno, destpêke ra heta unîversîte, her çiqas serkewte yo zî cuyeya dewlete qebul nêkeno û cigêrayîşanê xo dewam keno. Serra 1973 de dest bi cuye û sîstema xo keno.

Dinyayêka cîya ronano û Partîye awan keno. A roje ra heta na roje her kesê ke beşdarê PKK benê eslê xo de beşdarê zihnîyet, îdeolojî û cuyeya Rayber Abdullah Ocalanî beno.

Ma de kes kadroyanê PKK, gerîla bo ne gerîla bo, Rayber Ocalanî ra cîya nêgenî dest. Ma heme hetan ra deyndarê Rayberîya xo yê. Partîye û kadroyanê ma de rastîyek esta; ma hereketê Rayberîye yê. Beno ke ê gelek kesan wina mebo la ê ma wina yo. Çiyêk raste de çin bî.

Heme çiyo ke nika esto temamen saya Rayberîye de esto. Êyê ke naye nêzanê kewenê xeletîye. Tay kesî zî estê ke bi zanayîşî ya vera Rayberîye û PKK de vindenê û antî propaganda kenê. Êyê ke zanayîşî ya kenê ez înan fam kena. Dişmenê û dişmentîya xo kenê la êyê ke bêzanayîşî kenê rê vateyê mi estê.

Ez vana lutfen Tevgera Azadîye ra baş fam bikerê û tesîrê şerê taybet yê dişmenî de memanê. Fina ez vana roşnvîr oyo ke kîşta şarê xo de vindeno û piştî dano têkoşîne. Xo teber de nêvîneno û seke yew kesêko xerîb bo bin nameyê rexneyan de dişmeniya Tevgera Azadîye nêkeno. Eke keno û bi israr o o wext guman zî virazyeno û ganî merdim ci rê pers kero û vajo ti xizmeta kamcîn dişmenî kenê. Ez hêvî kena ke Îlhamî Sertkaya nînan ra yew nîyo.

Roşinvîrê erjaye ganî gerîla, Rayberîye û PKK ra cîya mevînê. Sankî gerîla zaf hol a la Rayberîye û PKK ne baş ê. Ferasetêko wina ra ez huyena. Her gerîla û şerwanê ke Rojawanê Kurdîstanî de şer kenê beşdarê PKK û HSD bîyê. Tay roşnvîrî heyfê xo şerwanan anê û wazenê aqil bidê ci ke çirê veng-veng şehîd kewenê. Xonêzanîye hende raver şîya merdim ecêb maneno.

Şorişê Rojawanî keda Rayber Abdullah Ocalanî ser o raver kewt. Rayberîye serra 1979 ra heta 1999 Rojawanê Kurdîstanî de Surîye û Lubnanî de mend. Kedêka gird da. Tewr tay 30 hezar kadro perwerde kerd. Dîplomasî raver berd. Wexto ke Şorişê Rojawanê Kurdîstanî dest pêkerd zemîne se ra se amadebî û Rayberîye no zemîn amade kerdibî. Şorişo ke beno zî şorişê Rayberîye û yê PKK yo. Lutfen wa roşnvîr û nuştoxê ma na rastîye ser o vinderê û bifikirê ke têkoşîne bihêz bikerê. Nêke do zirar bidê şorişî û şarê ma û şaranê Rojhelato Mîyanên.