Azad Ararat Azad Ararat
VEWRÊS KAŞKA

Biciwiyo HPG 13 Sermawez 2018 Sêşem

Nê rojanê peyênan de HPG çalakiyanê balkêşan kena. Çalakîyanê winî kena ke dişmen nêwetano qal zî bikero. Dişmen wazeno serê çalakîyanê HPG binimno û seke qet nêbîyê bimojno. No het ra dewlete xo hol dîzayn kerdo. Medyaya dewlete rastiyan rast nêmojnena şaranê Tirkîya. Labelê teknolojî raver şîyo, îmkan dano ke şarî hetanê cîya ra zî xeberan bivîno.

Wexto ke 10ê menge de çalakîyanê balkêşî amey kerdene, kesê ke Tevgera Azadîye şinasnenê texmîn kerdêne ke bi metodêko newe HPG çalakî viraştê. Badê ci xora HPG eşkerakerdişêk da raya pêroyî. Mi taktîk û teknîkê newe çalakî ameyê viraştene. Yanî sey her carî na car zî gerîla bêçare nêmenda û xo vera teknîkê şerî yê dişmenî de bihêz kerdo. Êdî HPG her cayêk de, her wextêk de eşkena çalakiyan viraza. Êdî wa heme berpirsîyarê dewlete bitersê; beno ke her vîstikek de înan ser o êrîş bêro kerdene.

Verê çekê cîya-cîya destê gerîla de estbî la çekê ke hewa ra êrîş bikerê çin bî. Wa xeyrên bo ke çekê ma yê hewa ra êrîş kenê zî estê. Ma vera nê dagirkeranê kambax de çirê çin bê ke!

Çalakiyanê HPGyijan seba Dewletê Yewbîyaye yê Amerîka DYA zî yew cewabo pêt o. Çunke badê şerê DAÎŞ ke kurdan bi gerîla, şervan û şarê xo ya ser vist. Dinya nê çeteyanê cinawir dest ra reyna. DYA yew bireyo sosret girewt ke tede seba pêşenganê şarê kurdî keno hedef. Seba serê Cemîl Bayik, Duran Kalkan û Mûrad Qereyilanî xelate daya. No bire çend hetan ra yeno çend manayan. 1) Verê zî DYA bireyê winasî girewtê. Badê nê bireyan ê şexsiyetî ameyê kiştene. Coka DYA wazena zemîn meşrû bikera û badê nê hîrê pêşenganê şarê kurdî şehîd bikera. 2) Bi no bireyê xo DYA wazena nê hîrê pêşengê şarê ma çimê şarê ma de qij nîşan bida. 3) Xeta Tevgera Azadiye yê îdeolojîk hedef gêna û wazena hetê îdeolojî ra şarê kurdî dûrî rastiye Rayberîye û PKK`ê bifîna. 4) DYA û dewletanê dagirker wazenê Rayberîye û embazanê ci yan bikişê yan zî bêtesîr bikerê ke şarê kurdî bikerê bin xizmeta xo, seba xo bikar bîyarê.

Badê bire girewtişê DYA yê winasî viraştena çalakiya newe û zaf serkewte yê HPG bêgûman hêvîyan zêdnena. Senî DYA bi bireyê xo TC zî bi tehdît kerdişê xo wazena Tevgerê Azadiye zeîf bikera, Tevgerê Azadîye zî vana: ˝Ez esta û ez do estba˝. Qandê cû HPG û HPGyij heq kenê ke merdim înan rê vajo biciwiyê! Merdim vajo: ˝Biciwîyo HPG, biciwiyê HPGyij˝. Heta şima estê zereyê şaranê ma de hêvî herdem do gird biba.

Badê tehdît kerdişê TC, bire vetişê DYA û viraştena çalakîyanê HPG; ganî her welatperwer, demokrat, şorişgêr wayîrê Rayber Apo, pêşenganê PKK`ê Cemîl Bayik, Duran Kalkan û Mûrad Qereyilan bivejo. Çunke Rayber Abdullah Ocalanî seba şaran yew rayîra rûmetina mojna û şaran bi nê rayîrî xo resnenê azadîye. Cemîl Bayik Ankara ra nat her tim kîşta. Rayberîye de vindert û o temam kerd. Wexto ke Rayberîye ame tepiştene Tevgera Azadîye rê wayîr vejîya û nêverda Tevgere xeta xo ya xosere ra bivejo. Duran Kalkan yew şorişgêro tirkmeno ke Ankara ra nat seba azadîya kurdan têkoşîn dano. Mûrad Qereyilan yew fermandaro raver o ke hêzanê leşkerî rê sergêrî keno. Qandî cû wayîr vejîyayîş yew wezîfeyêko muhîm o. Qandê cû biciwîyo HPG!