Azad Ararat Azad Ararat
VEWRÊS KAŞKA

Badê weçînayîşî 03 Tîrmeh 2018 Sêşem

Weçînayîşê 24ê Hezîrane de ma yew tîyatro temaşe kerd. Ganî merdim heqê hikumatî û dewlete bido, tîyatro weş amebi nuştene(!) Kaykerdoxan kaya xo weş kay kerdêne(!) Heme çî winî amebî dîzayn kerdene ke merdim şaş maneno. Heme çî winî basît û aşkera bî ke kes nêzano se vajo. Verê çimanê dinya de hende çîyê faşîstî amey kerdene ke kes merdimbîyayîşê xo ra şerm keno la êyê ke nê kerdenan kenê qet xo ra şerm nêkenê. Heqîqete hende vindî bîya, merdim nêzano senî analîzan zî bikero. Ser zuran ra hende analîzî yenê kerdene, fina kes şaş maneno.

Baş o! Yew dewlete mîyan de eke faşîzm hende raver şiro, gelo êyê ke sînorê na dewlete mîyan de cuyenê xo ra xeyr vînenê? Bêgûman ney. Badê weçînayîşî AKP û Erdoganî heme kes kerd qilêrin. Heme kes bîyî ortaxê kerdenanê na dewlete. Kam se vano wa vajo, her kes do cezayê xo bianco. Na rewşe ra her kes berpirsîyar o. Ma yê şaranê Vakurê Kurdîstanî û Tirkîya do bacê giran bidê.

Badê weçînayîşî seke fekê Suleyman Soysuzî ra zî ma hesna, ke ey hemserekê HDP Perwîne tehdît kerdibî, êdî rewşe vuryaya û faşîzm bîya xorîn. Dewlete do biwaza PKK orte ra wedarna û çin kera. Dewletanê sey Îngîltere, ABD do piştî bidê dewleta tirke. Xayinê ke Vakur û Başûr de yê do nê sîyasetî rê xizmet biker, seke heta nika kerdêne. Vakurê Kurdîstanî de dewlete do biwaza gerîla çin kera. Her ke gerîla çin kerd do şarê kurdî zî çin kera. No het ra dewlete mirdîya xo wayîrê tecrûbe ya. Dewlete do biwaza Rojawanê Kurdîstanî de kurdan bida apey û heqanê înan zî çin kera. Başûrê Kurdîstanî da bi metodanê newe dagîrkerî yena ramitene û do bêro ramitene. Dewlete wazena Îran û YNK zî bikera ortaxê xo la no zehmet o. Îran nêwazena yew dewleta NATO bêra Qendîl de ca biba. No seba Îran zî beno yew xeterî. Dewleta tirke, hikumeta AKP-MHP, şexsîyetê Erdoganî bi nê kerdenan û hedefanê xo, beno peyayê dewletanê gird yê dinya. Her ke dewleta tirkan waşt armancanê xo ca bîyaro hende do lincî de şiro û peynîye de zî bênefes bimano. Dewletê girdî zî do dewleta tirke xo rê mirdîya xo bikar bîyarî.

Hetêke ra rewşe wina ya la heme çî gor keyfê dewleta tirke nêbeno. Orte de şarê ke têkoşîn danê estê. Verê verkan Hereketa Azadîye esta ke wayîrê hêzek gird a. Şena dengeyan bixeripna û dengeyanê neweyan awan bikera. Şena şerêko gird bikera û serkewte biba. Şena seba her çar leteyanê Kurdîstanî dîplomasî bikera û heqanê şarê kurd û yê bînan bipawa. No maneno têkoşînê ser. Oyo girîng têkoşîn kerdiş o. Her çiqas zehmet bo zî eke şarê ke Tirkîya de cuyenê sere wedarnê, têkoşînê xo yê kurdan ra bikerê yew, beno ke yew di serran de vurnayîşê girdî bêrê raste.

Ma xo vîra nêkerê, sîstemê sermayedar peynî bîyo. Êdî bi şer û alozîyan reyde eşkeno dinya îdare bikero. Dewleta tirke faşîzm de ameya peynî êdî naye ra vêşî nêşena xirabîyan bikera. Seba şaran firset demanê tewr zehmet de vejîyeno meydan. O wext ameyo. Ê şert û şûrtî amade bîyê. Ma çira şarî do ser nêkewê ke?