Azad Ararat Azad Ararat
VEWRÊS KAŞKA

14ê Temmuze 17 Tîrmeh 2018 Sêşem

Ma yew 14ê Temmuze yê bîne vîyarna. 14ê Temmuze yê yewine ra nata hîris û şeş 14ê Temmuze ravêrayî. Ma kewtî serra hîris û newine ya 14ê Temmuze. Şert û şûrtanê 14ê Temmuze senîn bî û nika şert û şûrtî senîn ê? Bêgûman xeylê vurnayîşî bîyî.

Embazê çalakîkeranê 14ê Temmuze vanê: “Înan zanayêne do ameyox senîn bo. Zanayêne çi senî kenê. Zanayêne do komelê kurdî de vurnayîşê girdî bêrê meydan.”

Çalakîkeranê 14ê Temmuze penceyê dişmenî mîyan de yew tarîx nusna. Îmkanê înan qet çin bî. Tena fikir û bedenÊ înan est bî. Bi fikir û îrade, ruh dayêne yew şarî. Yew welato kan ke merdimîye tede raver şîya de newe ra cuye aj da.

Çalakîkerê 14ê Temmuze bîyêne gonî û kewtêne bedenê heme şorişgêran û welatperweran. Mehmed Xeyrî Durmuş êdî tena yew Mehmed Xeyrî Durmuş nîyo. Ruhê ey kewto bedenê bi mîlyonan şorişgêr û welatperweran.

O ciwano tîtal ke Karadenîz ra werişt, Anqara ra gêra û verê xo da Kurdîstan û seba kurdan şorişgêriye kerd û va: “Ez azadiya tirkan azadbiyayîşê kurdan de vînena” êdî o ciwano tîtal yê Karadenîzî nîyo.

O bîyo malê şarê kurdî û heme şaranê Rojhelatê Mîyanênî. Kemal Pîr yew mamosta yo kamil yê nê erdê ma yo pîroz o. O pîrozî xo mîyan de hewêneno. Heyfê ci seke ey bi xo zî vato ke do bêro girewtene, ameyo girewtene. Şagirtê ey vilayê dinya bîyê. Ruhê ey yo enternasyonalîst nika bi seyan enternasyonalîstan anceno têkoşînî mîyan.

Şert û şûrtanê tewr zehmetan de bi metodêko zanistî çalakîyêka tewr girde ameya kerdene. Eke winî nêbîyêne yew şaro hende apey de mende nêameyêne û rayberî şaran rê nêkerdêne. Nêbîyêne şarêko tewr demokrat, xozaperest û azadiya cinîye raver bero.

Akîf Yilmaz yew hemrayîro baş yê Xeyrî Durmuş û Kemal Pîrî yo. Êyê ke yew şarî rê rayberîye kenê, dor û verê xo de zî hemrayîranê xo resnenê. Akîf Yilmaz cewab dayo Rayber Apoyî, bîyo hemrayîrê Xeyrî Durmuş û Kemal Pîrî. Rayîro rast mojneno ma yê ewro cuye de yê û yê ke ameyox de bêrê cuye mîyan. Coka ma çiqas minnetdar bê zî tay o.

Elî Çîçek yew ciwano ke hepisxane de nêyeno zeptkerdene yo. Qandê cû Xeyrî Durmuş ci ra vano: Ti estareyo sûr yê ma yê. Na qisa zaf girîng a û cayê xo de ameya vatene. Bi yew cumle, Xeyrî Durmuşî şexsiyetê Elî Çîçekî tarîx ra dayo şinasnayîş.

Estarebîyayîş yew feraseto kan o. Verê dayîkanê ma yê neolîtîkî tayê xo sey estareyî vînayê û erjnayê. A roje ra nata estarebîyayîş esto la nêbeno nesîbê her kesî.

Her keso biwazo nêbeno estare. Ganî merdim xo biresno û raver bero ke bibo estare. Kes xo rê nêvano ez estare ya. Tay kesî erjnenê û vanê estare yo. Elî Çîçek de na rastîye ameya ziwan û bîya pratîk.

Çi weş o ke ma wayîrê rayberanê winasiyan ê. Roja ma ya ewro de kam ke biwazo seba şarê xo bicuyo û xo fedayê doza şarê xo bikero rê mîsaleyê tewr baş nê qehremanê ma yê.

Ewro tembelîye esta û ma zere re wena. Ganî ma xo têkoşîn rê amade bikerê. Tembelîye dest ra bireyê. Nê qehremananê xo xo vîra nêkerê û rêça înan de raver şirê. O wext ma do bivînê ke serkewtene hende zehmet nîyo.