Nesrîn Navdar Nesrîn Navdar

Sebebê krîzê ekonomî şerr de îsrarkerdiş o 07 Îlon 2018 În

Nê aşmê peyînan de krîzê ekonomî ke bi kewtişê degerê Lîrayê Tirkî yê hemverê dolar û euroyî xo moşt ra her ke şino şaranê Tirkîye zêdetir fîneno tengasî. Her çiqas hetê rayveber û selahîyetdaranê dewlete ra girotişê Brûnsonî sey semed yeno ramoştişî zî semedê nê krîzî esil polîtîka û sîyasetê qirkerdişî ke nê çar serrê peyînan de şarê Kurdî ser de yeno pêkardişî yo. Çi heyf ke şarê Tirkî zî zehf tira sirf semedo ke desthilatîya AKP’î şerê Kurdan kena hemverê heme qayde nêrayîrîyanê aye bêveng mendî û çimê xo hem qirkerdişê Kurdan rê ke risnayo heta Kurdanê Rojawanî ser, hem zî heme qayde dizdî û nêrayîrîyanê aye û hetkaranê aye rê girotî û weçînayîşê peyînî de zî ey kerdî desthilat.

Dicnayîşo ke eyro zêde merdimî dicneno zî no yo ke şarê Kurdî îradeyê xo hetê demokrasî û têduştî ra moşt ra la eyro ey zî zirarê kerdişanê na desthilatîya şerrwaze vînenê û zêde zêde benê mexdûrê nê krîzê ekonomî ke yeno ciwîyayîşî. Yanê çi heyf ke eyro Kurdê Bakurî rayêke bîne teberê îradeyê xo de benê mexdûrê tercîhanê hînke bînan. Rewşa şaranê Tirkîye ver bi sefalet şina û na rewşa înan qet xemê rayveber û selahîyetdaranê hikûmatê eyroyî de nîyo.

Peynîya polîtîkayanê na desthilatî ra ke Kurdan ser de pêk ana eyro roc la ra bigî heta derzenî her çiyan rê zem ameyo. Yeno zanayîşî ke emsar se ra çewres û yewê budçe şerrî rê ameyo abirnayîşî û ma îhtîşamê Saraye zî nêkerê xo vîr ra ke mîqdarêke muhîm zî aye rê şino û çi heyf ke fatûrayê ey zî ancî şarî ra yeno birrnayîşî.

Raya pêroyî her rocî vengê Erdoganî şinawena ke vano wa şar zerd, eûro û dolaranê xo açarnê tl, la qet behsê zerdanê cinî û keyneyanê û dolar û eûroyanê lacan û zavayê xo nêkeno. Ancî qet karmendanê verê xo ser de nêgeyreno a û înan ra nêvano karê xo açarnê tl yî ser. Çimê rayveberanê na desthilatî her tim cêbanê şarê feqîr û bêkaran de yo ke bi zor eşkenê rocê xo derbas bikerê. na desthilatî roco ke amîya hikmî ser heta eyro her tim zengînî zêdetir kerdê zengînî, feqîrî zî zêdetir kerdê feqîrî û eyro no krîzê ekonomî ancî înan ser de bandor keno.

Ma bi çimanê xo vînenê ke no krîz ne saray û erkananê aye ser de ne zî hetkaranê aye ser de bandor keno. Nê krîzê ekonomî yê eyroyî de ke şarê Tirkîye xori xori fikirêno ke senîn bieşko nan û awe ra nêmano Sarayan de awe fêkîya sey fêkîya ejderî ke hema yewî namey aye zî nêşinawito yena şimitişî.

Sey ke ma vînenê rewşa Tirkîye ke eyro tede ya hetêke gul û gulistanê sarayîcan û derdoranê aye yo hetêke zî sefalet û feqîrtîye şaran o ke kewtê ci. Hemverê na bêedaletî û nehqîya ke ro şaran bena tenê çare xoverdayîş û têkoşîna şaran a ke nêverdê na desthilatî faturaya kerdişanê xo lîminan înan ra veco.

Lazim o şarê Tirkî zî verê şarê Kurdî de ca bigîro û her di pêdir hemverê nê şerrê lîminî vecîyê û bi rûnayîşê rayveberîyêka demokratîk û adil e bişekê mîyanê aramî de biciwîyê. Eke şarê Tirkî wazenê tengasîyê newînan ra feletyê lazim o paştî bidê têkoşîna şarê Kurdî ke heqanê xo yê tewr merdimahî wazenê. Heta ke meseleya Kurdan çareser nêbo go krîzê newînî zî ca bi ca veciyê raste.