Nesrîn Navdar Nesrîn Navdar

Pîtey ziwanî ra tersê faşîzmî 09 Sermawez 2018 În

Şarêke dima ra eşkeno warê xo yo ke destê ey ra şîyo tepîya ageyrno la eke ziwanê xo dest ra bero nêeşkeno tepîya ageyrno û bi vinîkerdişê ziwanê xo dir o zî beno vinî. Rîyê erdî de şarê ke bê welatê zî la semedo ke ziwanê xo pawit o estê û yenê naskerdişî la şaranê ke ziwanê xo kerdo vinî nînê dîtiş û naskerdişî.

Bi vatişêke bîn, eke merdim ziwanê xo bipawo bê welat bo zî estbîyayîşê xo domneno la eke derbasê ziwanêke xerîbî bibo zerrey warê xo de zî çinê yeno hesabkerdişî û beno ey xerîban ra xerîbêke.

Çi heyf ke şarê Kurdî zî kewto mîyanê çerxê xetereyêke newînî û her ke şino xeteryê vinîbîyayîşê ey zêdyeno. Nê xetereyî ser de ke nizdê se serre yo şarê ma yê Bakurî ser de geyreno ziwanheskerdan û kedkaranê ziwanî vist mîyanê hewldayîşêke raşt û muhîm î.

Hewldayîşêke pîroz û ciwîyaye yî. Belkî zî tarîxe de raya yewin a ke heme hetê civaka Kurdan yenê tê het û waştişêke ser de yewîtîya xo viraşte. La awayo ke eyseno Bakur de amyayîşê têhetî yê partî û sazîyanê şarê Kurdî ters û lerz visto zerreyê zîhnîyetê faşîst û tekpawtoxan.

Dimayo ke Platformê Ziwanê Kurdkî ke partîyanê sîyasî, sazîya ziwanî û rêxistinanê civake ra pêk yenê semedê rayîr û raybazanê bidestvistişê heqê ziwanî ser de nîqaş bikerê qerarê komxebate girot, zîhnîyetê faşîzmî û mexsedê înan ê şarê Kurdî ser de bi rayîrê rocnameyê Aydinlikî xo da teber.

Ey rocnameyî nûşteyê xo yo bi sernameyê ‘Partîyanê Dabeşkaran Tirkî rê şer kerd a’ de bi awayêke eşkera partî û sazîyê şarê Kurdî hedef moştî ra. Faşîzm wazeno bi nê vatişanê xo yê tewşkerdeyan qirkerdişê ke ziwanê Kurdî ser de pêk ano limte verdo.

Waştişê Kurdan o ke heqêke înan o tewr însanî û demokratîk o sey şerêke hemverê Tirkî mojneno ra la o yo ke ziwanê Kurdî qedexe kerdo û şerêke pîl ey ser de dayo ro, faşîzmê na pergala dagirker e bi xo yo. Bi ti awayî şerrê Kurdan hetê Tirkî de çinêbîyo û înan bi ti awayî vernî ro Tirkî nêgirota.

Kurdan ti ziwanêke qedexe nêkerdo û nêkenê zî. La mîsalê qedexeyê ke hetê na pergale ra ziwanê înan ser de ameyo rûnayîşî nê wextî de ti hetêke dinya de nîno dîtişî. Ey bi qedexekerdişê ziwanan qirkerdişê şaran pêk anê xo rê sûc nîvînenê la wexta şarê Kurdî heqêke xo yo tewr însanî û demokratîk wazeno hetê înan ra sûc yeno hesabkerdişî.

Senîn ke heqê yewî çinê yo tenêke veyşan û teyşan verdo eynî awayî heqê ti dewlet, ti rejîm, ti desthilat û şexsan zî çinê yo ke şarêke bê ziwan verdo. Ziwan şaran rê bi qasê nan û awe lazim o.

Qedexekerdişê ziwanî sûcêke însanî yo, qirkerdiş o. Şarê Kurdî etya ra tepya go dimayê nê heqê xo yê însanî bigeyro û heta bifîno xo dest go na geyrayîş û têkoşîna xo ya demokratîke bidomno.

Ameyo dîtişî ke estbîyayîşê netewetîya şaran de pîteyê ziwanî cayêke pîl gêno, loma tersê faşîzmê tekpawtoxan nê pîteyî ra zehf zêde yo. Şarê Kurdî çiqas yewîtîya xo bizêdnê go rayîrê serkewtişê ziwanî zî bi ey qasî hîra û rehet bo.

Bi hêvîya ke na komxebate bi ser biko û bibo wesîleyê yewîtîya şarê ma nika ra ro şarê ma pîroz bo.