Nesrîn Navdar Nesrîn Navdar

Eke Şar Biwazo Eşkeno 22 Pûşper 2018 În

Kurdê Bakûrî û heme şarê ke Tirkîye de ciwîyênê vîst û çarê Hezîrane de semedo ke pergalêka newî rûneyo go rayanê xo bixebetnê. La tenê dîtiş de wina eyseno. Sey ke ma vînenê û benê şahid rocê îlankerdişê weçînayîşî ra heta eyro çiqas bêrayîrî, bêedaletî û bêqanûnîyê ke estê wextê propagandayê nê weçînayîşî de hetê desthilatîya na dîktatorî ra ameyî bicaardişî. Eke weçînayîşê vîst û çarê Hezîrane weçînayîşanê ke heta nika Tirkîye de ameyê kerdişî dir, yan zî weçînayîşanê ke heta nika dinya de ameyê kerdişî dir bideyê têver go bêrayîrî, bêedaletî û bêqaûnîya xo de yewin vecîyo. Nê weçînayîşî de desthilatîya Erdogan-AKP û MHPyî TRTyo ke bi baca şaran weşane xo domneno zî tede, çiqas tv, rocname û rayîrê bînî yê komînîkasyonî estê semedê propagandaya xo danê xebetnayîşî.

Helbet ne tenê hetê komînîkasyonî de, hetê resînayîşî de zî heme awayî xo rê xebetnenê û îmkanê ekonomî zî heme xo rê xebetnenê. Xo ra şaredarîyêke bi qeyûman dagir kerdê bi temamî kerdê binê xizmetê xo. Tenê îmkanê komînîkasyonî, resînayîşî û ekonomî zî nê, heta qiwetê eskerî û hukmê dadî zî binê emrê înan de xebetênê. Tenê ma banîrê hovîtîya ke çeteyanê înan Pirsûs de di lac û bayêke ser de pêk arde ra zî xo ra ma go dereceyê meşûrtîya nê weçînayîşî fam bikerê.

Hemwelaticêke verê çimanê polêsanê na desthilatî de hetê çeteyanê aye ra bi hovîtî yeno lînçkerdişî la ti mudaxileyêke nîno kerdişî. Terorê ey çeteyan di rocî pê ser de hemwelaticanê Pirsûsî de bi awayê Daîşîcan domêno la na desthilatî herindey ke vernî ro qetilkerdişan bigîro û sûcdaran biqefelno ancî bê şerm vecêna çeteyan pawena û hemwelatican sûcdar kena.

Hetêke AKP/MHPyî heme îmkanê dewlete pêwa kede şaran xesp kerda û pê propagandaya xo domnenê, hetêke bîn partîya HDPyî ke heme heq û îmkananê weçnayîşî ra amîya bêparkerdişî û pêwa Serokanê aye bi seyan xebatkarê aye ameyê hepiskerdişî hewl dana şêro weçînayîşî. La ancî zî na desthilatî partîya şaran ra tersena û bi nê tersî hovîtîyanê xo zêdnena. Heme şarê dinya, şarê Kurdî û şarê Tirkîye pîya benê şahid ke nê weçînayîşî de hîle û xurdeyê pîlî ameyê kerdişî û wina eyseno ke heta rocê peyînî zî go bêrê kerdişî. Heta hewl danê ke hîleyê tewr pîlan sendoqan de bikerê.

Loma karo tewr zehf dimayê xebetnayîşê rayan de vecêno vernîya merdimî. Helbet rewşo ke eyseno dano zanayîşî ke wezîfeyêke pîl kono şarî ser ke semedo ke bieşkê ro îradeyê xo wayîr bivecyê û ey bi ser bifînê. Wexta şar biwazo eşkeno heme awayî dek û dolabanê dîktatoran veng veco. Tenê waştişê ey bibo bes o. Wexta şar biwazo ti qiwetêke nêeşkeno xo hemverê waştişê înan de pê bigîro.

Bi hêvîya ke vîst û çarê Hezîrane de şarê kurdî û heme şaranê Tirkîye ser de rocêke newe berzo û bibo rocê roşanê têduştîya şaran, bibo rocê demokrasîya rastîne û têduştîya heme şaran, bawerîyan û ziwanan û aştî û azadîya mîyanberê înan bixemelyo, nika ra serkewtiş para şaran bo, serkewtiş para heme cinîyan bo, binkewtiş para dîktator û desthilatan bo.