Nesrîn Navdar Nesrîn Navdar

Dûrişmeyanê qeyûman ser 05 Kewçer 2018 În

Nê rocanê peyînan de kesê ke şaristanê Amedî de wazenê otobusanê şaredarîye bixebetnê û qertê xo danê cîhazê qertwendişî ro bi vengê cinîyêke ke cîhaz ra vecêna ciniqênê.

Bi şoqê ey vengê ke vano: ‘bîrlîkte guçluyuz’ yanê ‘ma pêdir hêzdar ê’ cayê xo de nişnenê ro û heta benê paya bi desan ray dibarekerdişê nê vengî ver mîgrenê înan virazêno.

Herhal no raybaz zî yew propagandaya weçînayîşê xocayî yê vernîya ma ra yo. Merdim zerreyê xo de vano bi nê awayî şêro ma go hema raşt ro zehf çiyê ecêban ê qeyûman bêrê.

Sey ke yeno şarê ma vîr mudaxileyo verîn ê qeyumê desteserkerdoxan, Şano û kayanê Kurdî ra bigî heta lewheyanê bi ziwanê Kurdî rê bi, yê diyîne karker û kedkaranê şaredarîye rê bi û yê hîrine zî xebatanê şaredarîyan rê bi ke heta o roc ameybî kerdişî.

Sirf semedo ke îhalanê înan bidê hevalbendanê xo, peyarayê ma yê ke bi siyanê kilîtkerdan û saxlemî bi yew bi yew kerdî xera û bi karoyanê xo yê çargoşeyan ke wexta benê hî merdim ser de tehsikêno û semedo ke aray înan pêwa ya temamê aw xo ser de kom kenê kerdî belayê hemwelatîyan.

Bi serdegirotişê xo yê şaredarîyanê ma ser de çîyo ke tewr bale merdimî antêne dûrişmeyê înan o sey ‘Îsteyînce olûyor ‘ yanê eke ‘merdim biwazo beno’ bi ke heme bîlboardan de û her goşeyêke şaristanan de daleqna bi.

 Erê o vatişê înan raşt bi. Wexta dagiker bo, wayîrê qiwetê eskerî, sîleh û heme qayde hacetanê şerrî yê teknolojîkî bo, wexta merdim wayîrê pêgirotanê zerreyî û teberî bo, wexta dewletê sey Qatarî, Elmanya, Îngilîstan û bi desan dewletê bînî paşta merdimî de bê, wexta heme çeteyê na se serre emrê merdimî de bê wexta ‘merdim biwazo beno’(!) Yanê merdim eşkeno welatê şarî dagir bikero, ziwanê înan qedexe bikero, îradeyê înan binling bikero, sazîyanê înan desteser bikero, heme qayde heqanê merdimî yê merdimahî û ciwîyînî binling bikero, merdim eşkeno bikero bikero û bikero.

Yanê wexta merdim biwazo zehf rehet beno. Her qayde neheqî, nemerdî û zordestî bi rehetî beno. La nê kesê ke îdiayê newînan kenê nê zî xo vîr ra kenê ke peynîya zordestî çinê ya. Û ey zî zanê ke ey nê hêzdarîya xo zehf tera îxanet û hemkarîya îxanetkaran ra gênê.

Xo ra bi vatişê ke bi rayîrê makîneyî bi şarî danê empozekerdişî wazenê vacê ma hêzê xo hemkarîya xaînanê mîyanê şima ra gênê. Yanê vanê şima çiqa zêde hera xo rê, warê xo û şarê xo rê îxanet bikerê ma endeyke benê hêzdar î, zerrey şima de ca gênê û warê şima ser de hikimê xo domnenê. Belkî zehfê tenan rê çekûyê ‘Îsteyînce olûyor û yê Bîrlîkte guçluyuz’ çekûyêke rêze ra bêrê la hurdî zî raştîya xo de mexsedê xirab û xeternakan hebênenê.

Loma lazim o şarê ma bi heme awayî baldar bo, xo baş birêxistin bikero, yewîtîya xo ya siyasî bimojno ra û wextê weçînayîşî de nê vatiş û çekûyanê dagirkeran fekê înan de bifetesno. Ma zanê ke nê dagirkeran bi se serran bi zilm û zordestî,bi dek û dolaban, bi xapênayîş û hişmendî ra dûrvistişê şarê ma gune şarê ma sipita û heta eyro ameyê.

La şarê Kurdî mecbûr nîyo ke na se serra ma de ke semedê heme şaran azadî demokrasî û têduştî bena hakim hema zî xo bikero mehkûmê înan.