Nesrîn Navdar Nesrîn Navdar

Azadîya Welatî Wedartişê Îxanetî De Ya 20 Tîrmeh 2018 În

Wexta merdim rewşê Kurdan fikirêno merdim xo rê şaş maneno. Bi hezaran serran o ke wayîrê welatê xo yê la, bi seyan serran o zî welatê înan binê dest û potînanê dagirkeran de naleno û cografyaya înan a ke sey cinetê rîyê erdî bî, hetê dagirkeran ra ageyraya cehenemêke agirî ra. Helbet tenê cografyaya şarê Kurdî zilm û talanê dagirkeran ra parra xo nêgiroto, înan bi xo zî hetê fizîkî, ruhî, kulturî û nasnameyî ra para xo zilmê dagirkeran ra giroto û çi heyf ke hema zî gênê.

Ma zanê dagirkerê ke pencikê xo yê gunînî cografyaye ma û qirike ma de daçiknayê bi serreyê xo nîyê. Peymane Qesrê Şîrînî ra bigîrê heta qirkerdişê Helebçe, îxanetê mîyanneteweyî yê Lozanî ra bigî heta dagirkerdişê Efrînî her gamî gişta aktoranê dewletanê dinya tede bîya. Eke ma vacê Kurdan hemverê nê heme kerdişan bê veng mendê û qet xo ver nêdayo şaş o. Roco ke welatê înan ameyo dagirkerdişî heta rocê eyroyî Kurdî her wext mîyanê têkoşîne de bîyê.

Tarîxa Kurdan bi serrewedartişan, têkoşîn û xoverdayîşan degirotî ya. Tarîxa destpêkerdişê têkoşîna Kurdan bi qasê desteserkerdişê welatê înan a hetê dagirkeran ra kan a. Beno ke merdim vaco, ‘ma têkoşînêka senîn e yena dayîşî ke bi seyan serran o ke hema zî Kurdî nêeşkayê welatê xo binê hikmê dagirkeran ra azad bikerê?’ Çi heyf ke hemverê têkoşîna azadî îxanetê mîyanê Kurdan sey kermê qirmê dare her gamî destkewtişê ke Kurdan bi têkoşînîya xo visto destê xo pûç veto. Ancî çi hefy ke birîna ma destê ma ra ya.

Rast a ma birîna xo rew ra fam kerda la, semedê dermankerdişê na birîne ma heta nika ti rayîrêke cidî ke biarsê netîceyke nêdîyo. Halbikaw bi qaso ke ma hemverê dagirkeran têkoşîna daya ma semedê wedartişê îxanetê mîyanê xo bixebetnayne ne ke bi se serran, bi des serran zî na dagirkerî nêdomyayne. Îxanetê mîyanê Kurdan zehf awa yo. Her yewî bi awayke cilê îxanetî dayê xo ra.

Tayêne dîn kenê aletê îxanetê xo, tayêne sewdaya xo ya palkursî rê çiman kenê sîya, tayêne semedê peran şerefe xo danê û tayêne zî cahilî û bêhîşmendîya xo ra verê xo danê rayîrê îxanetî. Rayîrê wedartişê îxanetî derg o kede wazeno. Lazim o hem hetê sosyopsîkolojîkî hem hetê sosyoekonomîkî ser û hem zî hetê psîkolojiya bindestî ser cigêrayîşî bêro kerdişî û çare bêro dîtişî. Lazim o şarê Kurdî meclisêke bi nameyê vernî ro girotişê îxanetî awan bikerê û bi ay rayîrî bieşkê xaînan ra hesab pers bikerê ke ey rew bi rew nêaftarê verê dagirker û zaliman de ca bigîrê û zirar bidê welat û şarê ma ro.

Gere şarê ma ay heqî xo de bivîno ke hesab îxanetî ra pers bikero. Wexta îxanet mîyanê ma ra darya we azadîya welatî û şarê nê welatî zî tedir yena. Gere şarê Kurdî nêverdo ke ne hînke şexsî, ne serokê eşîran, ne zîhnîyetê hînke sazîyan ne zî yê hînke partîyan destek û paştî bidê dagirkeran. Vero ke ma serreyê xo partî û şexsanê dagirkeran bidicnê gere ma ewlî partî û şexsanê xo dir bidicnê. Dagirkerî teknolojî zêdehîrê xaînan ra qiwet gênê û bi paşte înan welatê ma de cirît erzenê. Ma bivînê nêvînê, qebûl bikerê yan nêkerê la, heta ma na birîna xo derman nêkerê go dicnayîşê canê ma nêvindero.