U. Serhildan  Andan U. Serhildan Andan

Ziwano bindest û perwerdeya yewperest! 17 Îlon 2018 Duşem

Perwerdeya yewperst, çunkî tu rengêko cîya tede çin o. Na pergale bingehê xo hişmendîya seyan serran ra gêna. Pergalêka înkarker a û bi heme îmkananê xo kena ke cîyayîyan bifetesna. Perwerde seba cuya merdimayîye cayêko zaf muhîm de yo. Seba ke merdimayî xo her hetan ra aver bera, rayîrêko winasî xo rê akerda û bi hezaran serran a ke no qeyde cuya rojane domnena.

Perwerdeyî heme çiyan ra ver ziwanêk wazena. Ziwan bingehê têkîlîyan o. Her komelêk wayîrê ziwanêko cîya yo û heme çiyanê xo yê rojane bi ê ziwanî keno. Perwerde zî perçeyêka ziwanî ya û bi ziwanê ê komelan perwerdeyî bena yan zî her tim wina bîya... Labelê îqtîdarî vera no çiyo en merdimayî de zî xo nêtepiştî û kerdî ke ziwanê komelê ke binê destê înan de yê biqedîyê. Helbet vera kerdenanê îqtîdarî de komelî zî xo ver dayî labelê tu xoverrodayîş sey ê kurdan nêbîyo derg.

Kurdî welatê xo de bi serran o ke ziwanê xo de perwerde wazenî. Ziwanê dayîke o ke sey şitê dayîke helal o nêkeweno wendegehan û gedeyê kurdan zî bi ziwanê xo nêeşkenî perwerdeyî bivînî. Pergala Tirkîye roja ke ameya ronayîşî ra heta nika eynî çiyan domnena. Kena ke heme cîyayîyan asîmîle bikera û estbîyayîşê înan, destê înan rê bigêra. Xura nezdîbîyayîşêko winasî heme rumetan gêna binê linganê xo û şar yan zî komelo ke binê na kerdene de bimanî nêeşkenî bi ziwanê xo yan zî bi temamî bi kulturê têwbigêrî. Tirkîye nê çiyan nêzdîyê se serra ke kena. Wendegehî, pergala perwerdeyî, zanistî, huner ûsb... gelek çiyî bi nê kerdenanê Tirkîye cîyayîyan dûrî visnenî. Çunkî tu gede bi ziwanê xo perwerde nêvîneno, destûrê fikiryayîşê bi ziwanê xo zî nêno dayîş û aye ra perwerdeya ke bi mecbûrî yena vînayîş her tim perçeyêka mezgî veng verdena. Bi serran o ke kurdî perwerdeya ziwanê dayîke wazenî. No waştiş en peynî 2014î de xo da teber û gamê pratîkî hetê kurdan ra ameyî eştiş. Vera yewperestî de wendegehanê taybetan akerdî û mezgo yewperest ke pêrûnê welatî de xo dayêne qebûlkerdiş, qebûl nêkerdî.

Na game seba kurdkî gamêka pîle bî. Rayo yewin bi ke Bakurê Kurdistanî de gedeyê kurdî bi ziwanê xo, binê yew banî de, mamosteyanê xo rey de dersan vînayî.

Na rewşe zaf nêdomîya û hişmendîya yewperest tehemulê ziwanê kurdkî û perwerdeya azade nêkerd. Nika zî tehemulê tu çiyêk nêkeno. Heta heta behsê wedarnayîşê perwerdeya temîyane keno.

Her roje hêna zêde behsê muhîmîya perwerdeya bi ziwanê dayîke yeno kerdiş, wendegehî muhtewaya xo na çarçewe de virazenî... Labelê Bakurê Kurdistanî de pergala yewperest vernîya her tewir perwerdeyîye girewta û tena ê xo esas gêna. Ê xo ke bingehê ci sentezo tirk-îslamî ra gêno wazena mezgê wendekaran de bica bikera.

Nê kerdenanê îqtîdarî ver o ziwanê ke nêeşkenî perwerdeyî de cayê xo bigîrî her roje derbeyanê cîyayan wenî labelê hemleyê sey 2014î ke wendegehanê kurdîyan awan kerd; seba her deman lazim ê û gere vera na pergala yewperestî de sere de kurdî dima ra zî cîyayîyê bînî bibî wayîrê îradeyêko pîl û wayîrê ziwanê xo bivejîyê.