U. Serhildan  Andan U. Serhildan Andan

Xoverrodayîş newe destpê keno! 26 Pûşper 2018 Sêşem

Hol-xirab weçînayîşêk vîyart. Prosesê weçînayîşî edaletî ser o ney zilmî ser o dewam kerd. Her çendêk Tirkîye de hetê ke ameybî dûrîvistiş, vengê xo kerdî berzî zî serdestî waştî ke no veng binî ra bivurîyo bêvengîye. Labelê verba heme tewir tedayîyan de bêvengîya ke serdestî mezlûman ser o kerdibî ferz, no proses de şikîya û do Tirkîye de bitaybetî zî Kurdistan de rewşe hînî anîgêrîyo bêvengîye. Weçînayîşê 24ê hezîrane do tarîxê Tirkîye de bibo mîladêk. Kam vano se wa vajo; Tirkîye de hînî her çi zelal o. Serdest eşkera eşkera zilmê xo keno û do nika ra pey verba no zilm de xoverrodayîşêko eşkera bêro kerdene.

Netîceyê weçînayîşî goreyê waştişê şaran, bawerîyan û her tewir cîyayîyan nêbo zî hînî esasêk esto; hetêk de zilmkar heto bîn de zî mezlûmî ke heme derd û kûlê înan bîyê yew estî. Derd û kûlê nê merdiman çi bi? Gelo çira endêk qêrayêne? Ê zilmkarî ke qet goşê xo nêşanenê nê derd û kûlan; heta çi wext eşkenî verba na rewşe de bêveng bivinderî. 24ê hezîrane şikîyayîşê na bêvengîye yo. Bêvengîya merdimanê wayîrê derd û kûlan no proses de bîye perçe perçe û do demo newe de bivurîyo xoverrodayîşêko newe.

Merdim eşkeno şaşî û başîyê nê prosesê weçînayîşî ser o zî bivindero. Babeta yewine rayverîye ya. Eke rayverêk nêeşko/a derdê mezlûman heme cayan de bivajo/a, merdim nêeşkeno uca de behsê rayverêk bikero. Rexneyo tewr pîl rayveranê nê prosesî ra yo. Tena HDP ney heme partîyê muxalîfî na babete de sistbî. Namzetanê Serekkomarîye, serek û hemserekê partîyan, namzetê parlamenterî yê partîyan hama hama merdim eşkeno vajo ke kesê ke no proses de wayîrê rayverîyek bî, nêeşkayî wezîfeyanê xo bica bîyarî. Babeta bîne zî rojeve bî. Muxalefet, rojevanê xo ser ney rojevê ke hetê îqtîdarî ra zûran ser o ameyêne viraştiş esas girewtêne. Nimuneyê na babete zaf î labelê hewce nêkeno ke merdim yew bi yew nê nimuneyan ser o bivindero. Babeta hîrêyine zî metod û ziwanê sîyasetî ya. Dinya bedelîna, merdimî bedelînî, ziwanê rojane bedelîno, ûsb… Eke merdim wina biewno, gere goreyê nê bedelîyayîşan sîyasetê xo zî bibedelno. La Tirkîye de na babete ser o sistîyêka pîle esta.

Gere rexneyo pîl sere de HDP rê bo. Partîyêka sey HDP, gere sîyasetê xo her roje goreyê bedelyayîşan bibedelno û ziwanêko newe seba sîyasetê rojane awan bikero. Vateyo ke hîrê serre verê cu ameyo vatiş beno ke seba ewro derbasdar nîyo. Aye ra gere goreyê demî metod û ziwanêko newe bêro viraştiş. Tena nê hîrê babetan ser o mi waşt ez bivinderî. Helbet gelek çiyê bînî zî estî.

Nê holî-xirabîyan ser o gere ma muhesebeyê sibayî bikerî. Tu çiyêk nêqedîyayo. Xoverrodayîşo ke derd û kûlê merdiman ser o prosesê weçînayîşî de xo mojna do nika ra pey newe ra destpê bikero. Verba rejîmo yewperestî de şar û bawerîyê ke heme cayanê Kurdistan û Tirkîye de derd û kûlê xo kerdî yew do dest bi xoverrodayîşêko newe û hîra bikerî. Parlamento perçeyêka nê xoverrodayîşî yo û kuçeyan ra heta parlamento do no xoverrodayîş vilayê heme Kurdistan û Tirkîye bibo…