U. Serhildan  Andan U. Serhildan Andan

Weçînayîş û polîtîkayê AKPyî 26 Sermawez 2018 Duşem

2018 serrêka dekerde bî. Tirkîye de çiyê ke hetê hukmatê AKPyî ra ameyêne waştiş, zafê înan resayê amacê xo û hukmat wazeno çiyanê bînanî ke amacê ey o bîyaro ca. Sere de referandûmî dima ra zî weçînayîşê pêroyî, nê wirdî çiyî kerdê ke rejîmê Tirkîye bibedelyo û yewperestî ser o îdarekarî bêro kerdiş. Serekkomaro tirk Recep Tayyîp Erdoganî sîstemê xo yo ke merdim eşkeno sey totalîtarîzm bivîno; eşt felîyet û bi no qeyde estbîyayîşê xo goreyê qanûnanê dewleta xo meşru kerd. Çunkî kerdenê ey ê ke înkar û îmhayî ser o bîyî, Kurdistan de qetlîaman û zilmêko pîl esas girewtî. Her çendêk o, xo sey wayîrê dewlete û îradeyo en pîl bimajno zî mîyanê komelê Tirkîye de kesê ke raştîya kerdenanê ey dîyê, vera ey vindenî û kerdenanê Erdoganî sey faşîzm û totalîtarîzm name kenî. Vindertişê vera zilmî yan zî vindertişê vera Erdoganî her tim zor bîyo û zor o. Labelê vera her tewir kerdenanê ey goreyê demî, vindertişî bîyî û do bibî. Wina aseno do demêko kilm de vindertişî hêna zêde bibî û tedaya Erdoganî zî goreyê naye bibedelyê. Çunkî hînî weçînayîşê herêmîyî fekê berî de yo…

30ê Adare 2019î roja weçînayîşî ya û a roje do aqûbetê rejîmo ke nika hetê hukmatê AKPyî ameyo ronayîş dîyar bibo. Çunkî 2015î ra nata bi weçînayîşan no rejîm hêdî hêdî ame ronayîş. Hukmat yan zî serekkomar, bi qetlîam, teda, zilm, derbe, zorî û sewbîna gelek çiyan kerd ke komelî esîr bigîro û rejîmê xo binê tersêko pîl de birono. Her çiyî ra ver meseleya tersî yan tersnayîşî karo yewin bi û hukmat kerd ke bi tersî rejîmê xo yo newe bikero meşru. Çunkî ters bêvengî xo de ano. Bêvengîya vera zilmî merdiman keno bêîrade û naye zî hetê rejîmanê totalîtaran rê baş yeno zanayîş. Rejîmo totalîtar o ke nika Tirkîye de serwer o, kerdo ke tu kes gamêk nêerzo û tu kes vatişêk zî nêvajo. Labelê kurdî û dostê kurdan ke înan de pîya mucadele kenî, sey her wext nika zî vera kerdenanê winasîyan bêtêwgêr nîyê û kenê ke heme platforman de vengê xo bivejî. Do no weçînayîş zî bibo weçînayîşê vengvetiş û vindertişê vera kerdenanê lêşinan ê AKPyî. Çunkî serekkomar û hukmatê ey AKPyî wazenê ke bi nê weçînayîşî estbîyayîşê xo bikerê bêdem û Tirkîye de bê rejîmo yewperst çiyêko bîn nêverdî.

Seba ke vernîya nê rêjîmî bêro girewtiş bê HDPyî tu partî yan zî hêzêko bîn çiyêk nêkenî. Kurdî û dostanê kurdan roja ke serekkomar û hukmatê AKPyî dest bi ronayîşê rejîmo newî kerdî ra heta nika mîyanê xoverrodayîşî de yî û vera heme tedayan mucadeleyê xo ra fek veranêdayî. Do weçînayîşê herêmîyî de zî vera polîtîkayanê lêşinan ê AKPyî de bivinderî û nêverdî ke rejîmo totalîtar xo welat de meşru bikero. Weçînayîşê herêmîyî de eke hêzê muxalîfî vernîya rejîmo newî bigîrî do serekkomar û hukmatê AKPyî bikewî mîyanê krîzan û nêeşkî rewşanê krîzan ra xo bixelesnî. Nika ra xebatî dest pêkerdî; AKPyî zafê namzetanê xo eşkera kerd., partîyê bînî zî eşkera kenî. AKPyî qeyûmê ke teyîn kerd; kerd namzetê ê şaristanan. Nika ra îmze eşta binê vindîkerdişê xo û do AKP derbeya en pîle Kurdistan de biwero…