U. Serhildan  Andan U. Serhildan Andan

Weçînayîş şi; tecrîd û şer dewam kenî 02 Tîrmeh 2018 Duşem

Tirkîye û Bakurê Kurdistanî de nêzdîyê aşmêka nême rojeve weçînayîş bî. Na rojeve ser o heme çiyî ameyêne kerdiş. La rojevê esasî şer û tecrîd bî. Her çendêk nê wirdî rojeve versîya weçînayîşî de mendî zî bi xorînbîyayîş dewam kerdî. Xura tecrîd hîrê serran ra zêde yo ke dewam keno. Rayverê Şarê Kurdî Abdullah Ocalan ne eşkeno keyeyê xo de ne zî eşkeno avukatanê xo de pêvînayîşan biko. Na rewşe Kurdistan û Tirkîye de krîzan hêna zêde kena xorîn. Çunkî Ocalan sey hêzo pêserardişî yo û vatişo ke Îmrali ra bêro eşkeno zaf çiyan bibedelno. Xura şero ke dewam keno zî girêdayîya tecrîdî yo û naye binî ra nêno înkarkerdiş. Helbet tecrîd newe ney, 1999î ra nata dewam keno labelê tecrîdo ke hîrê serranê peyênan de Îmrali de esto, merdim eşkeno vajo ke teqabûlê 19 serran o. Verê cu her çendêk tecrîd bibayêne zî qet nêbo çend aşman ra hewêk yan avukatî yan zî keye şîyêne Îmrali û goş nêyayêne vatişanê Îmrali ro…

Weçînayîşê 24ê hezîrane, netîce se beno wa bibo, şi. Helbet weçînayîş zî perçeyêka rojeve ya labelê rojeva esasin nîya. Xetayêka pîle ya ke ma kurdî ge-ge rojevanê xo yê esasîyan kenî versîya tay rojevanê bînan. Naye raşta ci qebûl nêbena labelê na xeta ra agêrayîş zî gere leze bo. Nika weçînayîş şi û gere kurdî û dostê kurdan ca de abigêrî rojevanê xo yê esasîyan. Ê rojevan ra yew xura tecrîd o. Diyîn zî şero ke nika çar perçe Kurdistan de dewam keno yo. Nê wirdî rojeve gere ca de cayê xo bigîrî û nê rojevan ser o rayîrêko newe bêro xîzkerdiş. Metodê newe gere bêrê fikiryayîş, bitaybetî zî seba şikitişê tecrîdê Îmrali metodî zaf muhîm î. La her çi ra ver gere şar na rewşe ser o bêro rêxistinkerdiş. Çunkî bi kerdenanê tay sîyasetan û bi tedayîya pergale hetê bawerî de şikîyayîşî virazîyayî, gere bingehê nê şikîyayîşan baş bêro tespîtkerdiş û lezûbez bêro raştkerdiş. Nika ra pey sistîye ra ca çin o! Na pergale do nika ra pey bi xidarî prosesê şerî bidomna. Vera na tewir xidarîyan de hewceyî bi vindertişanê xurtan esta. Gere kurdî bibî wayîrê îradeyêko winasî ke paşta înan vera dişmenanê înan de nêkewo erdî. Eke merdim bi no qeyde nêzdîyê rojevan bibo do zaf çiyan de ser bikewo. Labelê reyna ma vajî; her çi ra ver gere weçînayîşê 24ê hezîrane cayêk de tecrîd û şero ke esto cayêk de bêrî şîrovekerdiş.

Şero ke hêzê statukoyî çar perçe Kurdistanî de domnenî û tecrîdo ke hetê Tirkîye ra domîyeno girêdayîyê yewbînan ê. Hem teberî ra hem zî zerre ra  wazenî kurdan bifetisnî. Çunkî hêzê statukoyî ke nika hêna nijadperestî ser o wazenî bibî yew, baş zanî ke kurdî her wextan ra hêna zêde nêzdîyê serkewtişêko pîl î. Hêna ê hêzî baş zanî ke kurdî erdnîgarîya Rojhelato Mîyanên de wazenî pergalêka newe awan bikerî. Waştişê hêzê herêmî yê statukoyî û yê hêzanê mîyanneteweyîyan astengkerdişê na pergale yo. Aye ra nika tecrîd her roje hêna zêde kenî xorîn, vera Rojawanê Kurdistanî de hêrişanê xo kenî zêde, vera Başûrê Kurdistanî de hêrişanê xo kenî zêde û bi dek û dolabanê xo kenî ke kurdî hetê hişmendî de çinî bikerî… Vera naye de rayo en raşt newe ra xurtkerdişê bawerî û şikitişê tecrîdî yo…