U. Serhildan  Andan U. Serhildan Andan

Ti kamî ra hesab persenî? 06 Tebax 2018 Duşem

Senî yew welatî de binê senî yew sîstemî de ma cuyenî, raşta ci nê persî weçînayîşê 24ê hezîrane ra dima hêna bîyî zêde. Tirkîye her ke şona kewena alozîyanê xorînan û wina aseno ke sere de alozîyê mîyanê welatî û dima ra ê teberî do bibê belayê sereyê îdarekaranê hikûmetî. Armancê hikûmetî no bi ke muxalîfê ke behsê nê alozîyan kenî û wazenî şarî derheqê nê alozîyan de bibî hîşyar berteraf bikî. La vera heme nêzdîbîyayîşê hikûmetî û heme astengîyan de muxalefeto en gird o ke hedefê hikûmetî de bi, HDP kewt parlamento û bi 67 parlamenteran sey îradeyê şaran uca de cayê xo girewt.

Hezîrana 2015î ra dima HDP, binê krîmînalîzekerdiş û hêrişan de ya. Hemserek, parlamenter, îdareker û gelek endamê HDPî netîceyê nê hêrişan de ameyî tepiştiş û zafê înan erzîyayê zindanan.

Kerdena hikûmetî tena esîrgirewtişê sîyasetkaran nêbî û her roje vera HDP de polîtîkayê dişmentîya kurdan ser o hêrişan viraşt. Nabênê 7ê hezîrana 2015 û 24ê hezîrana 2018î de nê hêrişî ge bîyê zêde ge metodê hêrişan bedelîyayî. 24ê hezîrane seba Serekkomar Tayyîp Erdogan û hikûmetê ey berê prosesêko newe akerd. No proses hema newe dest pêkerd û kerdenê proseso newe zî xo nika ra mojnenî.

Wezîrê Karê Zerrî Suleyman Soylu metodo mewe yo polîtîkayê vera HDP de eşkera kerdibi. Soyluyî weçînayîşan ra dima beyanatê xo de her wextan ra hêna zêde fek eşt HDPyîyan û vatişanê xo ke heme tehdîdî ser o bî de kerd perçeyêka metodê proseso newe. Tena o ney gelek îdarekarê bînî yê hikûmetî zî pê eynî ziwanî beyanatan dayî. En peynî zî Serekkomar Erdoganî beyanato ke hem HDP hem zî weçînayoxê HDPî hedef girewtêne da. Erdoganî beyanatê xo de eşkera eşkera kesê ke paştî dayî HDP û 67 parlamenteran erşawitî parlamento ra vat ke, ‘Ma do ê ke HDP erşawitî parlamento ra hesab pers bikî...’

No beyanat hem hetê wextê xo hem zî hetê rewşa ke Tirkîye tede ya ra zaf manîdar o. Herinda ke Erdogan behsê alozîyan biko û rewşa têkîlîya nabênê Emerîka de beyanatan bido, HDP hedef gêno. Naye mojnena ma ke demo newe de kamcîn krîz bibo do bi hedefgirewtişê kurdan û HDP, rojeva ra bikewo û mêzgê şarî ra bêro pakkerdiş. Wazenî sereyê krîzê ke meseleyê en gird ê Tirkîye yî bi nê rojevan biqefelnî. La se bikerî zî netîce eynî yo û bi nê hemleyan meseleyî safî nêbenî.

HDP kena ke şîroveyê nê krîzan bikera û rayîrê nê krîzan ra xelesyayîşî raya pêroyîya Tirkîye ra parr bikera. Xura kesê ke HDP erşawitî parlamento, seba naye yanî seba çareserkerdişê meseleyan erşawitî parlamento. Nika kesê ke yan zî îqtîdaro ke çareserî ra dûrî yê/yo no îradeyo ke çareserî xo rê kerdo wezîfeyo en pîl hedef gênî/o.

Sere de Erdogan û kes, sazî û partîyê ke peyê ci de yê do nê kerdenanê xo bi metodanê neweyan bidomnî. Vera nê kerdenan de do vindertişê HDP û bi milyonan kesê ke paştî dayî HDP, babeta meraqî ya. La wina aseno, proseso ke vernîya ma de yo do zorêr bo û vera nê prosesî de vindertişê kurdan û muxalîfê raşteqîn ê tirkan zaf muhîm o...