U. Serhildan  Andan U. Serhildan Andan

TECRÎD! Tersa dewlete çi ya? 24 Îlon 2018 Duşem

Vengdayîşo peyên o Rayverê Şarê Kurd Abdullah Ocalanî no bi, ‘Eke çareserîyêk biba, na çareserî bi yew hetî nêbena. Heto en gird dewlete yo.’ No vatiş eîdê 11ê êlûla 2016î yo. Netîceyê çalakîya greva vêşanî de dewlete berê Îmrali akerd û birayê Rayverê Şarê Kurd Abdullah Ocalanî, Mehmet Ocalan şi Îmrali û pêvînayîşêk kerd. Pêvînayîşî ra dima beyanatêk amebi dayîş û esasê beyanatî meseleya ‘çareserî’ ser o bî.

En peynî a roje Ocalanî de pêvînayîşêk virazîyayo û a roje ra nata xeberêk ti ra çin a. Dewlete zî bi kerdenanê xo, tecrîdê Îmralî domnena. Ocalanî vera nê bêhiqûqî, kiştiş, talan, dizdê û gelek çiyan de ziwanê xo yo ke ‘çareserî’ esas gêno ra xo nêteriknayo û en peynî hêna behsê ‘çareserî’ kerdo. Tîya de tena persêk manena ma rê... Gelo, dewlete ‘çareserî’ ra tersena? Heme çi destê aye de yî. Gelo, estbîyayîşê Ocalanî seba na terse sebebo en pîl o? Aye ra no tecrîd her roje, her roje hêna beno giran?

Esasê xo de çiyê ke hewteyo verên qewimyayê, nê persan rê bîyê cewab. Sere de qiraro ke hetê Dozgerîya Bursa ra ameyo dayîş, ‘Ocalan cezaya dîsîplînî werdo, aye ra keyeyî de pêvînayîş qedexe yo.’ Hêna qirarê qedexekerdişê pêvînayîşanê avukatan zî meseleyêka pîle bî ke dewlete bi no qirarê xo tecrîdo ke esto, bi vatişê xo eşkera kerd. Dozgerî pêvînayîşanê avukatan 6 aşman qedexe kerda. Naye mojnena ma ke Îmralî de metodê dewlete bedelyayî. Hînî tecrîd vîyarto qonaxêko newe...

Hetêk de nê çîyî qewimyayî heto bîn de zî Ewropa de rîpelê dosyeyanê Rayverê Şarê Kurd Abdullah Ocalanî newe ra abenî. Dadgeha Heqê Merdiman a Ewropa 10 serran ra tepîya muracatê avukatanê Ocalanî qebûl kerd û do 27ê êlûle de dosyaya Ocalanî ser o pêvînayîşêk bivirazîyo. DHME do biresa senî yew netîce çew nêzano labelê demêko winasî de no pêvînayîş, do meseleya tecrîdî Ewropa de bikera rojeve. Aye ra her çendêk nêzdîbîyayîşê DHME orte de bo zî gere meseleya tecrîdî bikewa rojeva înan...

Hewteyo verên wina vîyart la her çendêk cewabê tay persan bi nê kerdenanê dewlete net bibê zî zaf persê muhîmî hêna bêcewab mendî. Persa en muhîm; Îmrali de se beno? Cezaya dîsîplînî çira ameye dayîş û avukatî çira rayo yewin o ke bi qirarêko no tewir ameyî astengkerdiş, nê heme çiyî mezgan de bica bîyê û gumanê şarî zî zêdînayî. Her çi ra ver gere dewlete derheqê nê çiyan de beyanatêko zelal bido û gumanan orte ra wedarno. Wina aseno ke dewlete no qeyde nêzdî nêbena û mesele hêna zêde kena lêle... Tîya de wezîfe hêna keweno kurdan.

Heta nika çiyê ke seba şikitişê berê Îmrali ameyê kerdiş zaf muhîm ê. La tecrîdo nê çend serranê peyênan de çiyê ke verê cu ameyê kerdiş, no dem de nêrasayî hedefê xo û nêeşkayî berê Îmrali abikerî. En peynî çalakîya greva vêşanî ya 2016î netîceyêk girewt û aye ra wetêr tu çalakîyêka xurte ke bieşka zorî bida dewlete nêamey viraştiş. Lazim o hînî çiyê newe yan zî vera metodo newe yê dewlete de metodêko newe, seba şikitişê berê Îmralî bêro nîqaşkerdiş. Tecrîd do heta peynî dewam nêko. La her çi destê ê kesê ke tecrîdo ke Rayverê Şarê Kurd Ocalanî ser o esto, xo ser de zî hîs kenî û kenê ke tecrîd wedarnî de yo.