U. Serhildan  Andan U. Serhildan Andan

Tecrîd dewamê komplo yo! 08 Kewçer 2018 Duşem

Rayverê Şarê Kurdî Abdullah Ocalan roja ke Sûrîye ra vejîya ra heta nika binê tecrîdî de yo. Tecrîdo ke tede yo hetê heme dinya ra amebi qebûlkerdiş. Û bi no qeyde yanî dinya heme waşt ke Ocalanî Tirkîye de binê tecrîdêko winasî de bimano.

Ocalan şexsêk nîyo yan zî tena sey şexsêko merdimî nêno daşinasnayîş, o hem îradeyê xo hem zî îradeyê şarê xo, şexsê xo de keno temam. Aye ra çiyo ke vera ey de yenî kerdişî zî gere na çarçewe de bêrî şîrovekerdiş.

Helbet bi serran o ke na mesele eynî na çarçewe de şîrove bena, labelê tecrîdo ke her roje hêna zêde beno xorîn çarçeweya şîrovekerdişî zî bedelnena.

Tecrîdo ke ma eşkenî vajî bi komploya 9ê teşrîna verêne 1998î de destpê kerd no demo peyên de bi hewayêko cîya Îmrali de dewam keno. Rewşa Ocalanî nêna zanayîş. Ne keye ne avukat ne zî sîyasetkarêk nêeşkenî biresî Ocalanî û tu muracatê înan nênî qebûlkerdiş.

Na rewşe 2016î ra nata dewam kena û her çendêk vera tecrîdî de îtîrazî bibî zî tu game hetê îdarekaran rê nênê eştiş. Tecrîd û komplo bi nê game nêeştişan dewam kenî.

Dewleta tirke aktora yewine ya; her çendêk hêzê mîyanneteweyî komplo plan kerdî û 9ê teşrîna verêne de dayî destpêkerdiş zî na plane de aktora yewine dewleta tirke ya. Bi 9ê teşrîna verêne demêko newe destpê kerd.

Tecrîd hem zerrî hem zî teber de bi rojeve û Ocalanî bi îradeyeko pîl, binê esaretêko xidar de estbîyayîşê şarê kurdî hêna nîşanê heme dinya da û tecrîdo ke ey ser de ameyo ferzkerdiş o xo bi xo şikit û vat ke, ‘Ez azad a.’... Vindertişê ey hêz da kurdan û dostanê kurdan.

Çiyo ke bi komplo ameyêne waştiş bêrê kerdiş bi îradeyê Ocalanî pûç vejîyayî. Rayverê Şarê Kurdî Ocalan; komplo ra pey dest bi ronayîşê bingehê aşitîye kerd... Vera tecrîd û komplo de vindertişo bi îrade no bi û o zî verê xo da naye. Yanî waşt şerê bi serran bi no qeyde, bi îradeyê aşitî biqedîyo...

Ê ke tecrîd û komplo de biisrar ê, dişmenê aşitî yê û aye ra kenî ke şer bikerî xorîn. Ocalanî vera nê polîtîkayan de yanî vera polîtîkayanê şerî de aşitî de israr keno.

Hema zî o israrê ey dewam keno. Merdim eşkeno vajo ke israrê ey tu wext bîlesebeb nêşîyo û her wext vernîya zaf xirabîyan girewto. Tesîrê ey ê merdiman ser o zaf o û aye ra estbîyayîşê ey zaf muhîm o.

Bitaybetî şarê kurd muhîmîya Ocalanî baş zano û seba a muhîmî zî keno ke tecrîd biqedîno. Tecrîdo ke ey ser o dewam keno helbet do rojêk biqedîyo û a roje zî bi xoverrodayîşê kurdan û dostê înan mumkin o. Hem zerrî de hem zî teber de no xoverrodayîş dewam keno û do berê Îmrali bi no xoverrodayîş abibo.

Tecrîd û komplo nika bi destê dewleta tirke û hemparê aye dewam kenî. Seba ke nê her wirdî çiyî dewam kenî, dewleta tirke mîyanê krîzan de ver bi xerqbîyayîşî şina.

Krîzî ke dewleta tirke esîr girewtî, tecrîdî ra cîya nênê şîrovekerdiş. Kurdî û dostê înan bi serran o ke na mesele de israr kenî û estbîyayîşê heme krîzan girêdanî tecrîdî. Serrgêra komplo de hêna na raştî vejîna orte û tecrîd beno sebebê krîzan. Krîzan rê xelisyayîş û safîkerdişê meseleyan Îmrali ra vêreno aye ra gere tecrîd cade biqedîyo.