U. Serhildan  Andan U. Serhildan Andan

Hetêk de gonîye hetêk de şewat! 27 Tebax 2018 Duşem

Kurdistan de gonîye qet nêvindert û wina aseno ke do demêko kilm de zî nêvindera… Sîyasetê se serran ke Kurdistan de serwer o û bingehê xo dişmentîyêka pîle û xorîne ra gêno do heta heta eynî çiyan de israr biko.

Ronayîşê komare ra heta nika bênabên eynî çiyî ameyî ceribnayîş. Her tim gonîye rişyaya û welatê kurdan vêşayo. No siyaseto ke vera heqwaştişê kurdan de ameyo weçînayîş û her tim biisrar dewam keno, nika zî bi metodanê cîyayan virazîyeno. Verê cu tena qetlîam û şewatî bibî, la nika hem qetlîam hem şewat hem zî şero taybet esto ke çar hetan ra yenî Kurdistanî ser o û nêverdenê ke koyanê Kurdistanî helmêk bigîro.

Mîyanê nê heme çiyan de çiyo en xidar şero taybet o û bi nê metodî welat de her roje gonîye rişyena û koyî vêşenî…

Koyê Kurdistanî bi desan serran o ke vera her tewir hêrişan de xo ver danî. No xoverrodayîş bingehê xo ruhê xoverrodayox ê hezaran serran ra gêno û seserra newe de koyanê Kurdistanî de laşanê cîyayan de xo mojneno ra… Vera no ruh de hêrişê ke bingehê xo serdestî û zilmkarîya hezaran serran ra gênî estî.

Nê hêrişî heta roja ma ya ewro nêvindertî. Û serdestî seba ke estbîyayîşê xo bidomnî wazenî şaran û bitaybetî zî mezlûman hedef bigîrî. Naye nika şexsê na dewleta zilmkare de ciwîyeno.

Seba estbîyayîşê xo bidomno nêzdîyê se serrî yo ke kurdan ser o teda kerdo ferz û hêrişanê neweyan keno. Vera nê zilmkaran de kurdî nêzdîyê 40 serrî yê ke mîyanê xoverrodayîşêko pîl de yî û her hetan ra kenî ke no xoverrodayîş biqedînî û eke destê înan rê bêro kenê ke kurdan biqedînî.

Nika çar perçeyê Kurdistanî de kurdî û dostê kurdan binê hêrişê nê hêzan de yî, hêzê statukoyî. Statukoya en xidar a ke nika yena kurdan ser o yan zî en zêde hêrişan kena dewleta tirke ya û na dewlete nika her wextan ra hêna zêde hêrişanê xo domnena. Kerdenê aye çinkerdişî ser o yî û hetêk de gonîya kurdan rişnena hetêk de welatê kurdan vêşnena.

Nika na dewlete bi heme hêzê xo şaristanan rê bigîrêne heta koyanê Kurdistanî her ca de bi metodanê cîyayan hêrişanê xo kena. Vera endêk hêrişan de kurdî hêna linganê xo ser de yê û çiyo ke na dewlete keno hêrsin no yo.

Çunkî aye vana qey kurdî hema rayêk de qedînî û nêeşkenî hînî vengê xo bivejî… Beno ke no ewnîyayîşê înan o çewt na mesele kena derge la raştî dişmentîya kurdan a se serran a… Eke na dişmentîye ra nêbîyayêne nika Dêrsim nêvêşayêne. Dar û daristanê kurdan bêhelm nêverdîyayêne û gonîya gedeyanê kurdan nêrişyayêne…

Dêrsim hewteyêk ra zêde yo ke vera şewatê daristanî de xo ver dano û dewlete seba ke no şewat bivindero çiyêk nêkena. Tena Dêrsim ney heme şaristananê Kurdistanî de koyê ke tede helm yeno girewtişî de şewat esto û bê kurdan tu kes vera naye de vengê xo nêvejeno.

Na rewşe do heta kamca wina dewam bikera çew nêzano la çiyê ke qewimyenê bêvengîya heme kesan ver o qewimyenê. Gere sere de bêvengî biqedîya.