U. Serhildan  Andan U. Serhildan Andan

Hêna Leylayêka Kurde! 03 Berfanbar 2018 Duşem

Tarîx 1974î, nameyêk; Leyla… Na Leyla, cinîya xoverrodayox a Kurdan a. Na Leyla, vera zilmî de sere wedarnaya û qet nêvata ‘bes’. Na Leyla, hem cinî ya hem şêr a… Leyla Qasime ya, na cinî. Tarîxê Kurdan her tim bi şer û xoverrodayîşan resayo nê rojan. Her wextî de kamîya Kurdan hetê dewletan yan zî serdestanê cîyayan ra ameyo înkarkerdene. Vera nê înkarî de Kurdî qet û qet nêvatî ‘heya’; ne sereyê xo kerdî çewt ne zî zilmê serdestan ver o bayeyê mergî bîyê. Kurdî, her tim mîyanê mucadeleyêk de bîyê û kerdî ke zilmo ke înan ser de yo biqedîyo û ê zî bibê wayîrê heqê xo yê alemşumûlî. Vera nê înkarî de mucadeleyê kurdan nêzdîyê 200 serrî yo ke dewam keno. Mucadeleyo ke Babanan ra destpê kerd, xo resna nê rojan û nika serewedartişo 29in de mucadeleyê Kurdan her wextan ra hêna zêde bîyo vila û Kurdî her cayê cuye de mucadeleyê xo domnenî. Mîyanê mucadeleyê 200 serran de karakterê xoverrodayox û qehreman ê Kurdan zêde zêde bîyê û nê karakteran ra yew zî seke sere de nameyê aye ame vatene; Leyla ya…

Leyla Qasime sey cinîyêka Kurde vera zilmê rejîmê BAASî de sere wedarna û mîyanê mucadeleyê Kurdan de bîye qehremanêka efsûnî sey Zarîfe… Leyla Qasime 1974î de demê hedrekarîya çalakîyêk de embazanê xo reyde esîr ameye girewtene. Leylaya xoverrodayoxe vera her tewir îşkenceyanê rejîmê BAASî de sereyê xo nêkerde çewte. Demêko kilm de derheqê aye de qirarê dardekerdişî ameye dayene û 13ê gulana 1974î de ameye dardekerdene… Kurdî Leylaya xo qet nêkerdî xo vîrî ra û Leylaya xoverrodayox a Kurdan bîye sembola heme cinîyanê Kurdan û rayê mucadeleyê cinîyan akerd… Bitaybetî vindertişê aye yê zindanî bîyê nimune seba heme cinîyan. Seke Cegerxwînî seba vindertişê aye vatibi, ‘Şêr şêr a/o, camêrd o yan cinî ya’… Leylaya xovorrodayoxe bi no qeyde vîrê Kurdan de mende û bîye roşnî seba Leylayanê neweyan…

Ewro hêna Leylayêka Kurde sey Leylayanê bînan mîyanê xoverrodayîşêk de ya. Ewro Leylaya ke hêzê xo vindertişê Leyla Qasime yo tarîxî ra gêna zindanan de 26 rojî yo ke girevê vêşanîye de ya. Hêna Leylayêka Kurde vernîyê demêko newe yan zî vernîyê mucadeleyêko newe akerd. Parlamentera HDPyî ya Colemêrgî Leyla Guvene, seba tecrîdo ke Rayverê Şarê Kurdî Abdullah Ocalanî ser de yo bêro wedartene û rewşa hepsîyanê sîyasîyan bêro raştkerdene, kewte girevê vêşanîye. Leyla Guvene kerde ke hem teber hem zî zerrî de mucadeleyêk bêro nîşandayene û Kurdî, zilmo ke Rayverê înan û şarî ser o beno bivindarnî. Helbet tena Leyla Guvene ney hepsîyê bînî zî zindanan de girevê vêşanî de yê. Waştişê hepsîyan, waştişê heme şarê Kurdî yo. Senî ke Kurdî 2012î de çalakîya girevê vêşanîye de zindanan tena nêverdayî do şexsê Leylayanê xo de wayîrê heme hepsîyanê ke kewenî girevê vêşanîye bivejîye… Leyla Guvene ya ke sey Leyla Qasime zindanan de vera zilmî de mucadeleyêk de ya, seba şarê Kurdî bîye sembola demo newe. Hêna Leylayêka Kurde vernî de ya; seba Rayverê xo, şarê xo û estbîyayîşê xo, laşê xo kerda qurbanî. Wayîrvejîyayîşê mucadeleyê Leyla Guvene û embazanê aye; wayîrvejîyayîşê vîrê Kurdîtîye yo…