U. Serhildan  Andan U. Serhildan Andan

Hedrekarîya weçînayîşî 22 Kewçer 2018 Duşem

Weçînayîşêk vîyart, weçînayîşo bîn bayeyê ma yo. Nika ra heme partî kewtî atmosfera weçînayîşî. Atmosfera nikayîn a 24ê hezîrane ra cîya ya û hêna hîra ya. Çunkî weçînayîşê 24ê hezîrane tena plana AKP-MHP bî û ê roja ewile ra heta roja peyêne xo wayîrê atmosfere dîyêne. Labelê nika wina nîyo û wayîrtî eîdê muxalefetî yo. Bitaybetî zî wayîrê atmosfera weçînayîşê herêmî kurd î. Çunkî 2016î ra nata kurdî bayeyê weçînayîşî yê û kenî ke gespê îqtîdarî yo ke şaredarîyanê înan ser de yo, hînî biqedîyo û şaredarîyanê xo peyser bigîrî. Seba naye hedrekarîyêk esta û na hedrekarî zî ê heme wextan ra cîya ya. Hem mîyanê şarî de hem zî nabênê hetanê cîyayan de plansazîya xebatan esta û HDP kena ke heme hetan de xebatêka hîra bikera.

Peynîya hewteyî de Amed de komxebatêk virazîya. Komxebata Weçînayîşê Herêmî; bi beşdarîya gelek sîyasetkaran û bi munaqeşeyêko xurt vîyart. Çarçeweya munaqeşeyan hîra bîye û merdim eşkeno vajo ke prosesê vernîya ma tay bo zî mezgan de zelal bî. Xura Kurdistan de 2016î yanî roja ke qeyûmî dest nayî şaredarîyan ser o ra heta nika şarê kurd hêrsin o û weçînayîşê herêmî rê xo hedre keno. Şar mezgê xo de mesele safî kerda labelê kerdenê hikûmetî yan zî kerdenê qeyûman kenî ke mezgê şarî de nakokîyan virazî. Aye zî na saete ra tepîya zaf zor a û merdim eke goş bido kuçeyanê Kurdistanî netîceyê weçînayîşê Kurdistanî nika ra birehetî eşkeno texmîn bikero. Helbet naye nêna a mena ke Kurdistan de xebatî nêrî kerdiş û propaganda nêra kerdiş. Na komxebate seba na mesela zî tay çîyan zelal kerde. Estbîyayîşê qeyûman, pratîkê îdareyê herêmî yê kurdan û weçînayîşo newe… Nê meseleyan ser o munaqeşeyê xurtî bîyê…

Do her çî ra ver mezgan de zelalîyêk bivirazîya. Çunkî mezgê zaf hetan yan zî yê sîyasetî temîyan o. Bitaybetî beyanatê îqtîdarî yê ke derheqê weçînayîşê herêmî de benî, temîyanîyan kenî xorîn. Beyanatê sey,do weçînayîşan ra dima qeyûmî bêrî teyînkerdiş, şaredarî ke ameyî kar ser o bêrê tepiştiş û sewbîna beyanatê bînî mezgan de nakokîyan virazenî. Aye ra komxebate de vernîya naye yan zî vera nê tewir beyanatan de vindertişêko xurt ame nîşandayîş. Xura nêzdîbîyayîşê şarî û yê HDPî ra dîyar o ke hedef qedînayîşê estbîyayîşê qeyûman o. Û do seba nê hedefî, çiyo ke destê şarî û partîya şaran ra yeno kerdiş, bikerî.

Kurdistan de tîfaqê mîyanên, rojawanê Tirkîye de tîfaqê çepî… Do na çarçewe de perspektîfêk bironîyo. Na çarçewe seba hedefanê weçînayîşî zaf muhîm a û baş a zî. Çunkî xoverrodayîş tena HDP ser o nêbeno û do xoverrodayîşêko winasî sernêkewo. Aye ra tîfaq û pêameyîş seba hedefanê girdan muhîm î. Bitaybetî zî seba rijyayîşê îqtîdarî, tîfaq xo dir serkewtişan bîyaro. Qeyûmî xura mezgan de AKP qedînabî do şar bi weçînayîşê herêmî heme hetan de AKP biqedîno. AKP a ke bi şaredarîyan pesnê xo dana bi na kerdena xo ya qeyûmî, sere de çimê şarê kurd dima ra zî ê ke raştîya înan a lêşine dîyê de xo qedînaya û weçînayîşo ke do badê panc aşman bivirazîyo, seba AKP bibo erdlerzêk…