U. Serhildan  Andan U. Serhildan Andan

Do mezlûmî ser bikewî 18 Pûşper 2018 Duşem

No welat, welatê mezlûman o û serdestî yan zî zilmkarî her tim hesabê xo mezlûman ser o kenî. Waştişê şaro mezlûm çi bo zî zilmkarî kerdenanê xo ca nêverdenî û bi heme îmkananê xo wazenî înan bipelexnî, çin bikerî. Kurdistan de her tim wina bîyo labelê verba naye de îradeyêko xurt esto. Kamcîn îqtîdar, dîktator yan zî şexs û sîstemê cîyayî ameyî; nêeşkayî mezlûman biqedînî û îradeyê înan destê înan ra bigîrî.

Nika zî îqtîdaro ke esto wazeno eynî çiyan bi metodanê cîyayan bierzo dewre. Hikûmetê AKPî û şîrîkê ci MHP, bi ewnîyayîşê xo yê teng û bi hedefanê xo yê lêşinan karî ser de yî.

Kenê ke sere de kurdan û dima ra zî cîyayîyanê bînan çinî bikerî. Politikaya înkar û îmha ya ke bingehê ci seserre verê cu ameya eştiş, şexsê sîstem û îdarekaranê sîstemî de dewam kena. Na polîtîka her çiyî ra ver dişmentîya nabênê sîstem û kurdan de kena xorîne… Kerdenê na polîtîkaya lêşine no proseso ke ma tede yî de zî kêmî nêbenî û bi no qeyde Tirkîye şina weçînayîşêk.

Roja ke qirarê weçînayîşo taybet ame dayîş, planê heme hetan û bitaybetî zî ê AKP û MHP dîyar bîyê. MHP heme waştişanê xo eşkera kerdêne la AKP ke tu cîyayîya aye MHP de çin a zafê waştişanê xo nimnayêne. Prosesê weçînayîşî de vejîya orte ke hikûmetê AKP bê nijadperest û tayê terefdaranê xo nêeşkeno xo biresno cayêk û bitaybetî zî Kurdistan…

Na rewşe Tayyîp Erdoganî eciz kerd û hema zî kena. Na ecizî xo de zaf çiyan ard; sere de dîmeno ke behsê binê awbende de verdayîşê HDP kerdêne, meseleya sindoqan û seba demo nikayîn Pirsûs… Gelo koşkêk senîn o ke no merdim qet nêwazeno ucayî ra bivejîyo? Raşta ci nê kerdenan ra dima na perse yena merdimî vîrî. Seba merdimî raye nêdanî to, ti merdiman kişenî. Naye merdimayîye ra vejîyayîş o, sewbîna tu nameyê na rewşe çin o. Kenî ke bi terse merdiman biancî verê xo la o proses rewna vîyarto û mezlûmî çimê xo akerdî. Verba kerdenanê AKPî ke her tim mezlûman hedef gêno de vengêk tena ney zaf vengî berz benî û şarî seba 24ê hezîrane xo hedre kenî.

Çiyo ke Pirsûs de qewimya çiyêko qijkek nêbi. Rewşa Riha xura hetê heme kurdan ra û dewlete ra baş yena zanayîş. Eşîrî, keyeyê pîlî, zafrengî û bawerîyê cîyayî; tabloya Riha ya. Cayêko winasî de zafê merdimê hikûmetî zî bi kerdenanê xo yê lêşinan yenî zanayîş. Û her tim nabênê nê merdimi ke pêrabesteyê îqtîdarî yê û mezlûman de nîqaşêk esto. Ge nê nîqaşî benî xorîn û resenî pêrodayîşî ge zî sulhêk esto, labelê nê hîrê serranê peyênan de rewşa pêrodayîşî hêna zêde asîyena. Hikûmetê AKP zî bi kerdenanê xo yê lêşinan mîyanê nê pêrodayîşî de cayê xo gêno. Pirsûs zî netîceyê na rewşe yo û mezlûmî hedef ameyî girewtiş. Ê ke hesabanê qijan kenî, hêrişkar î. Ê ke do bin de bimanî û biqedîyê, hêrişkar û înkarker î. Ê ke do ser bikewî û serfiraz bî zî mezlûmî. Mezlûmî ke dorûverê HDP de ameyî pêhet do ser bikewî û heme hêrişanê na hîşmendîya înkarker bişiknî…