U. Serhildan  Andan U. Serhildan Andan

Dinya tena temaşe kena 01 Kewçer 2018 Duşem

Serekkomar yan zî Serekê Tirkîye R. Tayyîp Erdogan no hewte teberê welatî de bi. Rojeva Tirkîye sey her wext no hewte zî Erdogan bi. Şi Emerîka, Trumpî dir pêvînayîş kerd, şi Elmanya, Serekkomarê Elmanya rexne kerd… Medyaya tirke nê sernameyan ser o hewte vîyarna. Raştî hêna erzîya binê leheyfî. Çiyê ke zerrî û teber de qewimyayî qet rojeva înan de çin bî. Mesela ekonomîya Tirkîye her wextan ra xirabîr a. Mesela alozîya Sûrîye do tesîrêko xirab Tirkîye ser o bikera. Mesela raştîya meseleya kurd hema zî bi metodanê şerî yan zî yê înkarî, Tirkîye de cayêko pîl gêna. Nê çiyî senî beno ke hişê xerîban de çin ê, yan zî senî beno ke dewletêk nê çiyan ser o wayîrê zanayîşî nîyo?

Sere de meseleya Emerîka ser o gere merdim çend çiyan vajo. Beno ke Erdogan nika bi rehetî eşkeno şêro her cayê dinya û eşkeno heme çiyan bivajo. Eşkeno sey 2009î vajo ‘ONE MUNITE’ zî labelê qedera ey nêbedelîna. Çunkî dîktatorî belayê sereyê şaran ney belayê sereyê dîktatoran a… Tarîx de her tim wina bîyo û merdim qebûl biko, nêko peynîya peynî dîktatorî kewenî belaya xo û beno ke nêwazenî xo biqedînî zî bi waştişê qedînayîşê mezlûman îmze erzenî binê fermana xo ya şîyayîşî. Aye ra persa; senî beno ke dewletêk kerdenanê Erdoganî ser o wayîrê zanayîşî nîyo, zaf muhîm a…

Helbet meseleya ‘dewletêk’ yanî vatişê ‘dewletêk’ metaforêk o. Helbet heme kesî kerdenanê Erdoganî rê hayedar ê. Aye ra qedera ci zî nika ra bi zelalî asîyena û dîyar a. Hêrişê şaristanan, qetlîam, qeyûm, tepiştişê sîyasetkaran û sewbîna gelek çîyê bînî… Nê heme çiyî vîrê tu kesan ra nêşinî. Naye hetê Erdoganî ra zî baş yena zanayîş. Labelê semedo ke sîstemê xo yo ke dîktatorî esas gêno, baş rono, nêwazeno zaf çiyan bîyaro xo vîrî. Dinya yan zî hêzê mîyanneteweyî zî nê kerdenan baş zanî û seke aseno sey temaşekar cayê xo de ronişte yî û nêwazenî mudaxeleyê ci bikerî. Nêzdîbîyayîşê nê hêzan nêno şîrovekerdiş, çunkî pragmatîzm ruhê înan de cayêko pîl gêno û kenî ke bi no qeyde yanî bi nimnayîşê raştîyan Erdoganî ra fêde bigîrî…

Kurdî na mesele de terefê en pîl î. Çunkî heme çiyî kurdan ser o yenî kerdiş û bê înan zî tu çiyêk safî nêbena. Hem zerrî hem teber de estbîyayîşê kurdan zorî dano Erdoganî, aye ra hêrişê ey o en pîl zî vera kurdan de beno. Nika sîstemê xo yo dîktatorî zî eynî tewir û eynî bingehan ser o awan keno. Hişmendîya tirkîtî ya ke bi seyan serran a ke na erdnîgarî de serwer a, wazena demo newe de zî serwer ba. Labelê her çendêk vera kurdan de hêrişê pîlî bivirazîyê zî estbîyayîşê kurdan do peynîya hişmendîya tirkîtî ya seyan serran bîyarî…

Kurdî vera na dîktatorîya ke wazena înan seserra newe de zî bindest biverda de xo ver danî. Her çendêk qadê xoverrodayîşî înan rê ameyî tengkerdiş zî ê do bieşkî bi rayîranê neweyan vernîya xoverrodayîşanê xo yê neweyan abikerî. Naye hetê heme kesan ra baş yena zanayîş. Dinyaya ke vera nê kerdenan de tu çîyêk nêkena û tena temaşe kena; baş zana ke do kurdî bi îradeyêko pîl vera na dîktatorî û vera na hişmendîya înkarker de bivinderî.