U. Serhildan  Andan U. Serhildan Andan

Çarenuşte, statuko û dardekerdiş 10 Îlon 2018 Duşem

Ne ê verên bî ne zî do bibê ê peyêne... Gelo na rewşe bi tercîhê-weçînayîşê kurdan wina bîye yan zî xura çarenuşteyê kurdan wina yo? Raşta ci wexto ke rewşa nikayîn ser o merdim fikiryeno mêzg beno lêle û her ke şono temîyanî zêdîyena. Çar perçeyê Kurdistanî de nika zilm, sey adirî vareno kurdan ser o. Zilmo ke bingehê xo se serran ra gêno her tewir çiyan ano kurdan ser o. Kiştiş, talan, rijnayîş, çinkerdiş, ûsb... Nê çiyê ke yenî kurdan ser o, helbet tarîx de ameyî gelek şaran ser o labelê dem endêk derg nêbîyo û zilmê ke bîyê qasê zilmo nikayîn nêbîyê xorîn. Seke estbîyayîşê kurdan bindestî ser o bîyo û sey çarenuşteyêk înan rê bîyo ferz... Aye ra persa ke mi sere de kerd, yena merdimî vîrî. Destpêkê seserra 20ine ra heta nika çiyê ke yenî kurdan ser o eynî yê la seke şîrovekar û îdarekerî zî vanî tena ‘metod’ bedelîyeno. La tay cayan de ‘metod’ zî nêbedelîno... Îran ê cayan ra yew o û bi serran o ke kurdê ke heqê xo wazenî hetê rejîmî ra yenî dardekeriş. Kurdê ucayî se bikerî zî nêeşkenî na kerdene bivinarnî û çarenuşteyê xo bi destê xo binusnî...

Çarenuşteyê kurdan, destpêkê seserra 20ine ra heta nika ê se bikerî zî nêbedelîno la seba bedelnayîşî têkoşînêko xurt zî esto. No têkoşîn çar perçeyê Kurdistanî de domîyeno û nika her çi mojneno ma ke heta no têkoşîn sernêkewo û statukoyan nêrijno do kiştiş, dardekerdiş, talan zî nêqedîyo... Aye ra statuko baş zano. Keno ke vengê kurdan nêreso kurdan. Keno ke têkoşînê kurdan xo nêkero gird û nêreso armancê xo. Bi nê çiyan wazeno ke kurdî çiyê ke seba înan hetê statukoyî rê ameyî ferzkerdiş qebûl bikî û hemverê statukoyî de xo tê nêdî. Rojhelatê Kurdistanî de ê ke xo tê danî yan zî kenê ke bi îradeyê xo çiyêk bikerî; raşteraşt benî hedefê rejîmî û peynî de zî yenî dardekerdiş. Ramîn Hosseîn Panahî ê kesan ra yew bi ke waşt hemverê rejîmo ke kurdan rê zilm keno û heqê înan nêdano de xo ver bido. Panahî sey aktîvîstêk waşt ke raştîyan bivajo û heqanê kurdan biwazo. La heme wayîrvejîyayîşan ver o Panahî ame dardekerdiş. Panahî dardekerdişo yewin nîyo do nêbo zî. Xura o û di kesê bînî; Zanyar Muradî û Luqman Muradî pîya ameyî dardekerdiş. Bê nê hêrî kesan, hezaran sîyasetkarê kurdî Îran de hepsan de yî û bayeyê roja xo ya dardekerdişî yê. La sere de Panahî û embazê ey ê ke ameyê dardekerdiş; baş zanayêne ke çarenuşteyê kurdan hînî destê kurdan de yo û kurdî eşkenî bi perçekerdişê statukoyan çarenuşteyê xo bibedelnî...

Çarenuşte, statuko û dardekerdiş yan zî merg... Nê her hêrî çiyî nika sey hewranê tarîyan kurdan ser de yê. La mîrasê ê kesê ke nê çiyan qebûl nêkerdî û bi sereberzî şîyê mergî no bi ke ‘Kurdistanêko azad’... No mîras gere bawerî bido her kesî. Gere hêvîya ke esta her wextan ra hêna zêde bêra pîlkerdiş. Çunkî hêvî û xeyalê ê kesan pîl bî, zerrîya înan ke bi weşîye dekerde bî sawîya gonîye ro înan reyde merdî. Seba ke hêvî û xeyalê Panahîyan biciwîyo gere her kes destê xo bierzo binê na kerraya pîle û barî yewbînan rê sivik bikero. ‘Kurdistano azad’ ke hêvî û xeyalê Panahîyan o bi no qeyde virazîyeno û do bi no qeyde çarenuşte bibedelîyo...