U. Serhildan  Andan U. Serhildan Andan

Bêtehemulî yan bêexlaqî! 23 Tîrmeh 2018 Duşem

Bêrumetkerdiş, bêexlaqî, bêtehemulî, nezanî û sewbîna gelek gelek çiyî rewşa nikayîn a Tirkîye îfade kenî. Tirkîye bi kerdenanê îdarekeranê xo her roje mîyanê krîzan de ya û waştişê ci yo ke xo mîyanê krîzan rê biveja zî çin o. Nê krîzî esasê xo de dişmentîya kurdan ser o benî xorîn labelê îdarekerî na dişmentî her wextan ra hêna zêde eştî rojeva xo û wina asîyeno ke do demo nêzdî de peyser gaman nêerzî. Verê cu zî serranê 90an de gelek çiyî ciwîyaybî la çiyo ke nika ciwîyenî serranê 90an vîyartî. Çiyê ke serranê 90an de bîyêne raşteraşt hêrişanê hetê fîzîkî esas girewtêne. La nika kurdî tena bifîzîkî ney raştê her tewir hêrişan yenî…

Her çi ra ver yeno waştiş ke îradeyê kurdan destê înan rê bêro girewtiş. Yeno waştiş ke kurdî dûrê kulturê xo bê û tu eleqeya înan no kultur de çinêbo. Çunkî ê zî baş zanî ke çiyo ke kurdan ano pêser kultur o û no kultur xoverrodayîş aver beno. Nika kenî ke yew bi yew perçeyanê nê kulturî qedexe bikî û hêdî hêdî kulturê kurdan, kurdan rê îzole bikî. No waştiş, waştişêko teluke yo û gere na mesele ser o merdim zaf-zaf bivindero.

Gama yewine ya nê waştişî cenazeyanê şervananê kurdan a ke yeno waştiş nê cenazeyî bi beşdarîya keye û merdiman nêrê definkerdiş. Heta destê înan rê bêro do bivajî ke seba nê cenazeyan şîn zî romenêne. Tîya de hedefê îdarekaran orte de yo û kenî ke hîsê şarî biqedînî. Hedef tîya de kultur û hîsê merdiman ke her tim têkoşînê bi serran pay ser de vindarneno yo.

Hîrê serranê peyênan de bitaybetî vera cenazeyan de bêtehemulîyêk esta û naye her roje bêna xorîne. Keyeyan rê bigîrên heta merdimanê sivîlan û sîyasetkaran; heme kesê ke merasîmanê cenazeyanê şervananê azadîye de ca gênî hedef yenî girewtiş. Hewteyo verên Amed de seba ke beşdarê merasîmê cenazeya Mehmet Yakişir o ke Gumuşhane de cuya xo vindî kerdibi bîyê parlamenterê HDP yê Amedî Remzîye Tosun û Musa Farisogullari raştê tehqîqatî ameyî.

Kenê ke bi no qeyde parlamenterê şarî, şarî ra dûrbivisnî û keyeyan tena biverdî. Hêna wexto ke merdim biewno tehqîqatanê peyênan ê ke Kurdistan de demo peyên de gelek kesan rê abiyê de zî vîneno ke beşdarbîyayîşê cenazeyan zî hînî sey sûc yeno vînayîş. Sere de keyeyî dima ra zî ê ke beşdarê cenazeyan benî do kulturê xo ra wayîr bivejîyê. Çunkî bi serran o ke dewlete wazena eynî metodan Kurdistan de ferz bikero. Labelê şar kulturê xo ca nêverdeno û tu wext gedeyanê xo tena nêverdeno.

Ê ke vera beşdarbîyayîşê cenazeyanê laj û kênayanê nê şarî de wazenî astengîyan bivirazî gelo bêtehemulî ra yan zî bêexlaqî ra wina kenî? Se beno wa bibo vera cenazeyan de kerdenêka şaş krîzê nabênê şaran kena xorîne û birinê ke bi nê kerdenan abenî qefelyayîşê înan zor o. Mezelanê şervananê azadîye ra eynî tewir nêzdî benî her roje kerrayê mezelan şiknenî. Waştişê înan mêzgan de qedînayîşê îradeyî yo la kerdena înan do raştê hêrsê şarê kurdî bêro. Naye bêtehemulî ney bêexlaqî ya û do mîyanê bêexlaqîya xo de bifetisî…