U. Serhildan  Andan U. Serhildan Andan

Awa lêle û keştîya Erdoganî… 13 Tebax 2018 Duşem

Çîyê ke nika ciwiyenî; netîce yî… Ti her çi goreyê xo awan kenî; ti xo sey padîşahêk nîşan danî û ti kenî ke hûkmê to her ca de derasdar bo. La wina nîyo û wina nêbeno zî. Serekkomarê Tirk R. Tayyîp Erdoganî bi nê kerdenanê xo û bi kerdena xo ya en pîle ke şerê vera kurdan esas gêna, welat ard na sewîya. Tengasîyê ewroyînî girêdayîyê kerdenanê vîzêrînan ê. Hem zerrî hem zî teber de çiyê ke ciwîyîyaybî û nika verê çimanê her kesî de eşkera eşkera ciwîyenî; raştîya polîtîkayanê hikûmetî vejenî çiman ver. Hikûmetê AKPî roja ke bi îqtîdarî ra nata her tim komelê Tirkîye bi tay çiyan kerd hewnî ra. Sebebê nê hewnî eşkera bi, seba îdarekerdişê dewlete yan zî awankerdişê sîstemê xo waştêne ke şarî hewnêko giran de bî û ê zî bieşkî hem baş bidiznî hem zî sîstemê nê dizdêyan awan bikerî. No bingeho ke hetê hikûmetî ra ame eştiş, rewşa nikayîn awan kerd. Her çendêk hikûmet na rewşe tena papaz Andrew Brunsonî ser o şîrove bikero û şarî ra wina lanse bikero zî; çiyê ke mîyanê hewteyo peyên de ciwîyayî, şaranê Tirkîye zî îqna kerd ke mesele tena Brunson nîya…

Nîqaşê nabênê Amerîka û Tirkîye de R. Tayyîp Erdogan, kerd ke xo sey her wext hêzdar nîşan bido. Raşta ci rojanê ewilinan de Erdogan sey xo kerd û xo zerrî ra hêzdar nîşan da. La berzbîyayîşê dolar û euroyî, hêzdarîya Erdoganî destê ey ra girewt. O zanayêne rewşe cidî ya la kerdêne ke hewayêko sey ‘ONE MINUTE’ çimê şarî de bivirazîyo. No hewa nêvirazîya… Çunkî no welat de eke keyeyan de werdî nêgirîyê hiqûqê îqtîdar û şarî birîyeno. Çunkî ê ke paştî danî Erdoganî yan zî paşt dayêne ey seba nanî dayêne û wina aseno ke sibarojê Tirkîye de mirdbîyayîş hêna beno zor… Nika îqtîdarperestî kenê ke bi nijadperestî moralê şarê Tirkîye bîyarî ca. La nika ra pey o zî zaf zor o û do no îqtîdaro ke bi çareserkerdişê krîzan amebi sere bi krîzan şêro. Helbet eşkeno xo rê rayîranê alternatîfan bivîno la seba aye zî gaman nêerzeno. Çunkî tena rojevêka nê îqtîdarî esta, aye zî şerê vera kurdan a… Tengasîyê ewroyînî se beno wa bibo bê meseleya kurdan nênî şîrovekerdiş. La hema zî Erdogan û partîya ey nêwazenî na mesele bivînî û bêhiqûqîyê ke bi destê înan virazîyenî berteraf bikerî.

Çiyo ke îqtîdar tede yo kortî yo yan bizanayîş wina keno, seba naye merdim nêeşkeno çiyêk bivajo. Labelê seba rewşa nikayîn a Tirkîye çiyêko bîn zî merdim eşkeno vajo; dîktatorî… Eke dîktatorî esas bêro girewtiş, çiyê ke ciwîyenî zaf normal î. Çunkî estbîyayîşê dîktatorî xo reyde alozîyan ano û welato ke binê destê ci de yo ver bi şerêko xorîn beno. Nîşanê naye vatişanê Erdoganî de eşkera benî; ‘Ma heme eynî keştî de yî. Senî ke ma na keştî de pîya qezenç kerdî, gere ma pîya na awe ke kewena mîyanê keştî, bivejî…’ Nê vatişî mojnenî raya pêroyî ke do Erdoganî peyser gaman nêerzo. Eke peyser gaman nêerzo tîya de mîyanê nê rewşan de krîz hêna beno xorîn û ti ra vejîyayîş hêna beno zor. Eke mesele keştî ya; o wext wa o bi xo bifikiro û xo rê bigêro çarserîyan… Çunkî sere de a keştî bi mergê kurdan û dûrvisyayîşê heme cîyayîyanê Tirkîye… Mîyanê na awa ke Erdoganî kerda lêle de na keştî bîya qul û awe gêna mîyanê xo, ê ke do na keştî de xerq bibê înan ê û hînî nêeşkenî xo bixelesnî…