U. Serhildan  Andan U. Serhildan Andan

Atmosferê weçînayîşî 11 Pûşper 2018 Duşem

Tirkîye bi qrîz û alozîyan ver bi weçînayîşêk şina. 13 rojan ra dima do hemwelatîyê nê welatî şêrî sindoqan ser û îradeyê xo nîşan bidî. Do netîceyê weçînayîşî senî bo, babeta meraqî ya.

Bitaybetî herême de weçînayîş ser o xebatêka hîra esta; na xebate zêdeyîr hetê HDP ra yena kerdene û mîyanê şarî de bi hewayêko baş şîrove bena. Qirarê weçînayîşo verwext ke ame girewtiş ra dima ame waştiş ke wa muxalîfî nê weçînayîşî de nêeşkî biresî şaran. Labelê çiyo ke hikûmet, şîrîkê ey MHP û Serekkomar fikiryayêne nêcuyayî û Tirkîye de muxalefet, seba ke bireso şaran çiyo ke destê ey ra yeno, keno…

Çend rojî yo ke ez bi xo herême de şaristanan de gêrena. Hikûmet se keno û vera kerdenanê hikûmetî vindertişê şaro ke ci rê eciz bîyo çi yo, ma nêzdî ra teqîp kenî. Merdimî kerdenanê hikûmetî ver eciz ê labelê bêvengîyêka pîle esta. Na bêvengî ser o nîqaşê ma zaf bibî heta gelek hewan ma sebebanê na bêvengîye nuştibî. Weçînayîşo verwext şaristananê kurdan de her çendêk bêvengîye esas bigîro zî şar goreyê rojanê ewilinan, a bêvengîya xo ca verdaya û meydanan de yo. Kerdenê 16 serran ê hikûmetî hînî bi vengêko berz yenî vatiş, qetlîam û bêhiqûqîyê çend serranê peyênan hêna rojeva şarî de yî û heme platforman de vajîyenî. Şaristananê kurdan de nîqaşanê winasîyan tay vatişanê sîyasetkaranê kurdan kenî raşt; meseleya partîya tabelayî ê vatişan rê yew a û rojanê no vatiş xo keno newe…

Sîyasetkarê kurdan verê qirarê weçînayîşî vatişê xo yê ‘AKP Kurdistan de bîya partîya tabelayî’ heme cayan de dibare kerdêne. Dima ke prosesê weçînayîşê 24ê hezîrane dest pêkerd no vatiş hetê pratîkî de xo kerd raşt û tena AKP ney, partîyê bînî zî eynî tewir bîyê. Bitaybetî Amed û Botan de na mesela bi zelalî asîyena; hikûmet mîyanê nê şaristanan de nêeşkeno gaman bierzo û propaganda bikero. Zafê şaristananê bînan de zî eynî rewşe esta. Xura seke AKP Kurdistanî ra fek veradaya. Çunke kerdena AKP ya nê weçînayîşî, tu weçînayîşan de çinêbi.

Her çendêk zî cayê sey Riha û Dîlok ê ke hûmara parlamenterê înan vejîya 14; xebatê hikûmetê AKPî bibî zî ê cayan de HDP her wextan ra hêna zêde aver de ya û kena ke serkewtişanê pîlan ê şaristanan ra bivejo. Hêna cayê sey Xarpêt, Meletî û Gurgum ê ke HDP yan zî partîya ke kurdan pêgirewteyê înan a qet parlamenter nêvetî; emserr weçînayîşê 24ê hezîrane de bi îdîa yê û kenê ke her yew parlamenterêk bierşawî parlamento.

Dêrsim zî ê cayan ra yo ke 2 parlamenteranê xo dano HDP; şarê Dêrsimî her wextan ra hêna zêde dorê HDP de bîyo xelek û vano ke do bêvengîya Dêrsimî weçînayîşî de biqedîyo. Cayanê muhîman ra yew zî Çewlîg o. Şarê Çewlîgî wazeno qederê 2-1 bibedelno û no weçînayîş de 2 parlamenteran xo rê wazeno…

Çîyê ke nika hedefê nê şaristanan de yê xeyal nîyê. Çunke nê şaristanan de kuçeyî zî eynî çiyan vanî. AKP a ke zafê nê şaristanan de serwer bîye, nika her çiyê xo hêdî hêdî destê xo ra keno vindî û Kurdistan de sey embazê xo yê nika MHP; do bibo partîya tabelayî ya lêşine…