U. Serhildan  Andan U. Serhildan Andan

Aşitîya vindîkerde! 03 Îlon 2018 Duşem

Aşitî yan zî pêameyîş… Nê wirdî çekuye esasê xo de yenî eynî vate. Her kesêk eşkeno seba vateyê aşitî çiyan bivajo û bi ewnîyayîşanê cîyayan aşitî pênase bikero. La erdnîgarî ya ke Îbnî Xaldun vano ‘Qeder a’, pênaseyê aşitî zî ge-ge bedelneno. Erdnîgarîya ke tutî çimê xo şerêko xidar rê akenî de aşitî her tim bena xeyala en pîle. Çunkî cayêko tede aşitî çinêbo, uca de behsê hêvîya sibarojê zelale nêbeno; helbet hêvî seba gelek çiyan esta labelê eke mesele aşitî bo û aye zî nêcuyena, wextêk ra tepîya heme hêvîyan kişena… Kurdistan bi serran o ke binê zilm û zorî de yo. Kurdistanijî vera nê zilmî de xo ver danî û kenî ke xoverrodayîşê înan aşitîyêka birumet bîyaro welatê înan. Pergala zilmkar a ke qet û qet goş nêda nê waştişî her tim bi metodanê cîyayan şer domna. Her roje merg, her roje şewat, rijnayîş û talan… Nînan bîyê sebeb ke no şer her tim vera aşitî de qezenc biko.

Bi nê çiyan her serre 1ê êlûle Roja Aşitîye ya Dinya de kurdî û dostê înan qadan de yenî pêser û seba aşitîye vengê xo kenî berz. Kurdî zanî ke dişmenê înan se bikerî zî ê do fek aşitî ra veranêdî û sibarojanê weşan de cuyêka hempar awan bikerî. Bi no ewnîyayîş 2013 de prosesêk dest pêkerd… Proseso ke seba bingehê aşitîya Kurdistan, Tirkîye û Rojhelato Mîyanên dîya destpêkerdiş mîyanê şaran de heyecanêk viraşt. Rayverê Şarê Kurd Abdullah Ocalanî ê wextan de sere de seba kurdan dima zî seba heme şaranê Rojhelato Mîyanênî pênasê aşitîye kerdibi û aşitîya ke bêra do senîn bo; behsê aye zî kerdibi. No nêzdîbîyayîşê ey raşta ci mîyanê şaran de hêvîyêk viraştibî. A hêvîya gane heme keyeyan de ameybî hîskerdiş û aşitî her wextan ra hêna nêzdî bî.

Nabênê serranê 2013 û 2015î de seba aşitî, mîyanê şaran de komxebatî ameyêne viraştiş. 2013 de proses hema newe dest pêkerdibî û her cayê Kurdistan û Tirkîye de seba nîqaşkerdişê prosesî panelî ameyêne viraştiş. Amed de zî ê panelî bibî… Merkezê Kultur û Hunerî yê Ciwanan Cegerxwîn de panelê bi nameyê ‘Vindîkerdeyê Aşitîye Çin O’ amebi viraştiş. Sernameyê nê panelî goreyê ruhê ê wextan amebi nuştiş. Raşta ci sernameyêko weş bi. Wexto ke merdim fikiryayêne, meseleya vindîkerdişî mezgê merdiman werdêne. Her kes bawerîya xo aşitîye ra ardibi aye ra meseleya vindikerdişê hetêk qet nêameyêne tu kesan vîrî… Prosesê çareserî ke hetê dewlete ra ame edelnayîş û tecrîdo ke îradeyê aşitîye ser o newe ra Îmrali de ame ferzkerdiş, na hêvîya bi serran zî helîya û resa nê rojan…

Nika eke şîroveyê nê panc serranê peyênan bêro kerdiş do bivejîyo orte ke a hêvîya aşitîye derbeyêka senî werda. ‘Vindîkerdeyê Aşitîye Çin O’ sernameyêko weş bi la nika asîyeno ke vindîkerdeyê aşitîye estê. Ê zî şarî yê. Şarî ke bitaybetî zî şarê kurdî ke her tim û hema zî perê aşitî de yo bi destê dewlete bi vindîkerdeyê aşitîye. La vera heme çiyan de 1ê êlûla emserrîne de îradeyê aşitîwaştoxî qadan de hêna ameyî pêser. Seba ke hêvîya xo bizêdnî vengê xo resnayê heta Îmrali.