ÇAND Û HUNER

Ziryabê dest bi weşanê kir

Dem : 09 Sermawez 2018 În

Yekem kovara muzîkê ya xwerû bi kurdî, tevahiya wê rengîn û li ser kaxeza kûşe, Ziryabê dest bi weşanê kir. Desteya weşanê ya kovarê diyar kir ku armanca wan ew e ku pirsgirêkên muzîka kurdî bi zimanekî erênî nîqaş bikin

Kovarek din jî li weşangeriya kurdî zêde bû û di nav refên weşanxane û pirtûkfiroşan de cihê xwe girt. Ev Kovara Ziryab e. Yekem kovara muzîkê ya xwerû bi kurdî, tevahiya wê rengîn û li ser kaxeza kûşe ye. Ziryabê dest bi weşanê kir û hejmara yekemîn derket. Kovar dê ji 4 mehan carekê derkeve.

Desteya weşanê ya Ziryabê ji van kesan pêk tê: Ji Siya Şevê Gokçe Selîm û Serhat Temel, Harûn Elkî û Ozan Irmak. Edîtoriya kovarê jî Mevlut Oguz û Serhat Temel dikin.

Pirsgirêkên muzîka kurdî

Desteya weşanê armanca derxistina kovarê wiha vedibêje: “Em dixwazin pirsgirêkên muzîka kurdî û pirsgirêkên muzîkjenên kurd li her deverê û di her qonaxê de bi zimanekî erênî, nêrînên berfireh û heta derfet hebe bi her zaravayên kurdî bên nîqaş kirin. Armanca me muzîka ku bi keda salan û bi nirxên bilind hatiye afirandin, bi çavekî zelal û guhekî vekirî berpêşî xwînerên kurdî bikin. Hêviya me ew e ku ji muzîkjen û dilsozên muzîkê re qadeke nû ya xweîfadekirinê vekin. Û em dixwazin hinek be jî siya li ser muzîka kurdî rakin.”

Naveroka hejmara yekem

Naveroka yekemîn a Ziryabê wiha ye: “Harûn Elkî ji salên 90’î û heta niha panoramayek berpêş kiriye û der barê bandora medyaya civakî ya li ser muzîkê de bi nivîseke têr û tije hejmara yekemîn xemilandiye. Îbrahîm Sarisu li ser Orfeus ê ku di dîroka muzîkê de di nav çend hozanên ewil de ye û der barê mozaîka wî de bi mijareke balkêş cih girtiye. Serhat Temel der barê serpêhatiya têkçûna Orkestraya Heskîfê de bi nivîseke taybet me bi rewşa atmosfera salên dawiyê dide serwext kirin. Serdar Ozturk porteyeke dengbêjê nemir Reso nivîsandiye.

Di hejmara yekemîn de bi hunermend Kerem Gerdenzerî û Nizamettin Arîç, Ayfer Duzdaş, Mem Ararat, Adnan Kartal, Cem Şivan Ergul, Siya Şevê û Rewşan Çelîker re hevpeyvîn hatiye kirin.

Di kovarê de ji bilî gotar û hevpeyvînan danasîna albûma Mirady û nirxandinek li ser albûma Serhat Ertunayî jî heye.

Her wiha di kovarê de nûçe, danasîna kitêbeke muzîkê û playlîstek jî heye.

 Hêjayî gotinê ye ku di hejmara yekemîn de postera gewreyê rocka bi kurdî Kerem Gerdenzerî û albûma Siya Şevê ya bi navê “Li Pey Siya Xwe” weke diyarî tê dayîn. STENBOL

Albuma Nûçeyê