KIRMANCKÎ

Zihnîyeto ke Seyît Rizayî daliqna

Dem : 14 Pûşper 2018 Pêncşem

Vatişê Serekê Pêroyî yê AKPyî û namzedê Serekkomarî Tayîp Erdoganî yê daliqnayîşê Namzedê Serekkomarî yê HDPyî Selahattîn Demîrtaşî bî sebebê reaksîyonan. Şarê Dêrsim torinê Seyîd Riza yê serra 1937î de amebî daliqnayîş, reaksîyonê pîlî nîşanê vatişê Erdoganî dayî. Dêrsimijî dîyar kerdî ke ê do sindoqan de cewabê tewr pîlî bidî Erdoganî. Babete ser o hemwelatîyê binameyê Gulşen Borak, Çagdaş Bîngol, Ekber Dogan, Ozgur Tutmez û Zeynel Abayî qisey kerdî û reaksîyon nîşanê Erdoganî dayî.

Borake qiseykerdişê xo de dîyar kerde ke Demîrtaş îradeya milyonan kesan temsîl keno û wina dewam kerde: “Tersan vera qala daliqnayîşî kenî. Finakê winasî tarîxê Tirkîya de zêde yî. Îqtîdar qala çîyê winasî keno û peynîya xo amade keno. Na cografya bîya şahidê xeylê daliqnayîşan. Seddam Huseyîn zî xeylê kesan daliqna. Netîce de ê bi xo zî ame daliqnayîş. Ma do cewabê tewr pîlî sindoan de bidî Erdoganî.”

Bîngolî destpêkê qiseykerdişê xo va ‘ganî şarê Tirkîya êdî rastîya kojerî yê Erdoganî bivînî’ û wina donma: “Zihnîyeto ke Seyîd Rizayî daliqna bi Erdoganî dewam keno. Tirkîya bi daliqnayîşan nêeşkena qezenc bikera. Ma do vera zilmî de çong nêronî û heta peynî xover bidî.”

Doganî da zanayîş ke ê do waştişê Erdoganî 24ê Hezîrane de qiriqa ci de vera bidî û wina va: “Demîrtaş do zindanî ra serbest bêro veradayîş. Erdogan do senî mîyanê şarî de bigêro? Dêrsimî de Seyîd Riza û embazê ci ameyî daliqnayîş. Bi hezana kesî qetil û koçber kerdî. Labelê reyna zî çîyêk nêbedilnayî. Torinê Seyîd Rizayan vera daliqnayîşî de tu rey çong nêronayî û nêronenî.”

Erdogan, daliqnayîş wina asan o?

 Tutmez û Abayî zî wina vatî: “Milyonan kesî piştî danî Demîrtaşî. Îzehetê Erdoganî seba herînayîşê rayan o. 24ê Hezîrane de ma do cewabê daliqnayîşî bidî Erdoganî. Kesê ke menfîetê şar û welatî wazenî, yenî daliqnayîş, tewqîfkerdiş û qetilkerdiş. Ma daliqnayîş wina asan o? Erdogan daliqnayîş asan nîyo. Tersan vera destûr nêdano ke Demîrtaş qisey bikero û taxan de qala daliqnayîşî keno.” DÊRSIM

Albuma Nûçeyê