KIRMANCKÎ

Ya dîktatorî, ya zî azadîya Tirkîya

Dem : 04 Pûşper 2018 Duşem

Namzeda HDPyî Oya Ersoye qala muhîmîya weçînayîşê 24ê Hezîrane kerde û wina va: “Tirkîya ya do bi dîktatorî bêra îdarekerdiş û ya zî do Tirkîyayêka newe, azad, seyyewbînan, laîk û demokratîke bêra awankerdiş.”

Partîya Demokratîke ya Şaran (HDP) bi tempoyêka girde dest bi xebatanê weçînayîşî kerde. Namzedê HDPyî xeylê cayan de şarî reyde yenî têhet û şarî ra piştî wazenî. Namzedî hem zereyê welatî de û hem zî Ewropa de bajaranê cîya cîyayan de çarçewaya xebatan de werdê fitarî, zîyaretê esnafan û akerdişê buroyî de xîtabê bi hezaran kesan kenî. Nê namzedan ra yewe zî Oya Ersoya ke herêma 2. ya Stenbolî de sey namzed ameya nawitiş a.

Oya Ersoye 3 prosesan serektîya Halkevlerî kerde. Sewbîna zî bi nasnameya xo ya avûkatî û heqê merdiman yena şinasnayîş. Serranê tewr peyên yê 1990î de 10 serran îdarekarîya Komeleya Heqê Merdiman (ÎHD) kerda û Baroya Stenbol, Merkezê Heqê Merdiman û Koma Avûkatan ya Herwextî de zî xebitîya ya. Ersoye qiseykerdişê xo de qala weçînayîşê 24ê Hezîrane kerde û dîyar kerde ke ganî heme weçînitoxî vera rejîmê yew şexsî de rayanê xo bixebitnî.

Ersoye destpêkê qiseykerdişê xo de bale ante muhîmîya weçînayîşê 24ê Hezîrane ser û wina va: “Ez seba awankerdişê welatêk demokratîke bîya namzede. Tirkîya ya do bi dîktatorî bêra îdarekerdiş û ya zî do Tirkîyayêka newe, azad, seyyewbînan, laîk û demokratîke bêra awankerdiş.16 serrê îqtîdarîyê AKPyî de xeylê zirarî dîyayî komel, siyasî, kultur û ekonomîye ro. Wa wazenê ke welatêko azad, seyyewbînan, laîk û demokratîke awan bikerî.”

Wezîfe keweno milê heme kesan ser

Ersoye dewamê qiseykerdişê xo de dîyar kerde ke eke HDP nêşêro meclisî do hetê çepî de kêmanî bivirazî û wina dewam kerde: “Hetê çepî de do kêmanîyêko zêde xo bi do teber. AKP seba ke HDPyî binê barajî de vera bido, hêrişê HDPyî keno. Eke HDP binê barajê weçînayîşî de bimano do temsîlîyetê demokratîke ya şarê kurdî nêvirazî yo. Do çepgir, hetgirê seyyewbînan û azade meclisî de nêrî temsîlkerdiş. 80 parlementerê HDPyî zî do AKPyî rê bimanî. Na babete de wezîfe kewena milê heme hêzê demokratîkan ser. Seba ke meclis AKP-MHPyî rê nêro veradayîş, ganî heme weçînitoxî rayanê xo bidî HDPyî.”

Seba awankerdişê demokrasî HDP

Ersoye qiseykerdişê xo yê peyênan de zî wina va: “Weçînayîşê 24ê Hezîrane de 2 rayîrî estî. Ya ma do bi dîktatorî bêrî îdarekerdiş û ya zî do ma do azade bicuyî. No weçînayîş seba astengkerdişê dîktarîyê şexsêk firsend o. Cok ra ma veng danê heme kesan ke rayanê do bidî HDPyî. Ganî vera AKPyî de ma pîya têkoşîn bidî. Cayê bê omidî çin o. Xeylê têkoşînê vera faşîzmî virazîya yî. Fetisnayîşê hetê demokratîke karêko asan nîyo. Sindoq firsendêê muhîm î. Seba awankerdişê demokrasî, cuya seyyewbînanî, azadî û laîkî HDP.” STENBOL

Albuma Nûçeyê