KIRMANCKÎ

Xopawitiş - Nûşteyê Azad Ararat

Dem : 19 Pûşper 2018 Sêşem

Azad Ararat

Di hewte verê mi xorêxistinkerdişî ser o nuştbi. No hewte de ez xopawitişî ser o nusnena. Çunke nê di babetî na rewşe de zaf girîng ê.

Komel eke xo hetê xorêxistinkerdişî ra temam kerd, ganî xo çend hetanê bînan ra zî raver bibero. Nê xo raver berdişan ra yew zî xopawitiş o. Xopawitiş babetêka hîra yo. Sere de hetê zihnî ra badê hetê îdolojîyî ra xopawitiş girîng o. Komelo ke felsefe û sîyasetê ci mebo, nêşeno xo bipawo. Dişmenê ci hertim serkewte benê. Fina komel ganî wayîrê rêxistina leşkerî bo ke hetê êrîşanê leşkerî ra komelî bipawo. Şarê sey ma bêdewlete nêşenê artêşe ronê. Şênê hêzê gerîla rêxistine bikerê, la nêşenê sey artêşanê dewletan, artêşêk ronê. Seba ke rewşe wina ya ganî şarî hêzê cewherî rêxistine bikerê. Çunke hêzê gerîla nêşeno her ca de çalakîya leşkerî bikero. Qandê cû ganî komelî mîyan de hêzê xopawitişî yê nimite bibê.

14ê Hezîrane de Pirsus de yew serebût qewimîya. Tîya de hol yeno dîyene: dewlete bi peyayanê xo gale berdo şêligî ser. Seba ke peyayê dewlete yê çete biçek ê, bi rehetî şenê gale bikerê û qerşun bierzê şêligî. Kesan kişenê û kenê dirbetin. Şinê nêweşxane de dirbetan bi peynîya pirodayîşî de qetil kenê. Nê qetilkerdişî de zî yeno dîyene, nê çete û dewlete eslê xo de çeteyê DAIŞî weyî û perwerde kerdê. Yanî DAIŞ kerdenanê xo dewleta tirke ra musaya. Dewletêka hende har û cinawire hemverê ma de ya. Eke komelî mîyan de xopawitiş mebo, na dewleta ke eslê xo de çete û mafia ya, hîna vêşî bena har.

Dewlete xo se ra se rêxistine kerda, hem zî heme hetan ra. Komel zî se ra se bêrêxistin o. Seke di peya bêrê têrî û lej bikerê. Nînan ra yew çekdar bo û yo bîn zî bêçek û destê ci beste bê. Halê komelî û yê dewlete hema zî wina yo. Komel bêçek û destê ci zî beste yo. Dewlete biçek a û goreyê kêfa xo dana piro, kişena, îşkence kena. Peynîye de komel teslîm beno, dewlete zî bena faşîst. Serekê dewlete beno dîktator. Heta key? Heta ke rojêk cayêk ra komel teqa. Bi no metod komel fina nêşeno xo destê dewlete ra bireyno. Qandê cû ganî komel yew felsefeya pawitişî raver bibero. Yew îdolojî virazo. Xorêxistine bikero. Hetê ekonomî, perwerde, sîyaset, ekolojî, azadîya cinîye, demokrasî ra raver bibero. Labelê nêyî qîm nêkenê ganî komel xo hetê xopawitişî ra raver bibero.

Dewlete ra xo bipawo. Eke des rêxistinê dewlete yê asayîşî estbê, ganî yê komelî vîst rêxistinê xopawitişî estbê. Eke wina mebo, vera dewlete de komel nêşeno xo bipawo û heqanê xo xo dest bifîno.

Dewlete sîstemê qanunî ronayo. Burokrasî ronayo. Wayîrê leşker, polis û îstîxbaratî ya. Sey ahtapotî komel pîşîyaya û nêverdana ke komel nefes bigîro. Coka hewce yo ke komel bi şimşîrî destanê na ahtapote bibirno û ahtapote yanî dewlete dest ra xo bireyno. Nêke dewlete hertim zilm û tedayê xo komelî ser o kena.

Albuma Nûçeyê