ÇAND Û HUNER

WhatsApp êdî bi kurdî ye !

Dem : 04 Berfanbar 2018 Sêşem

Bîlal GULDEM / AMED – MA

Êdî bikarhênerên sepana WhatsAppê dikarin bi kurdî bi kar bînin. Yek ji hezkiriyê zimanê kurdî ku li ser teknolojiyê xebatan dike, Gernas Nenas WhatsAppê wergerand kurdî û got ku êdî bikarhêner dikarin WhatsAppa kurdî daxînin û bi kar bînin

Di warê teknolojiyê de pêşketinek din jî li kurdî zêde bû. Sepana peyamşandinê û lêgerandinê ya xwedî taybetmendiyên xwe ya navbera platforman WhatsApp Messenger a ji bo telefonên jîr êdî bi kurdî ye. Naveroka hemû beşên WhatsAppê bi kurdî hat amadekirin. Kesên ku dixwazin WhatsAppê bi kurdî bi kar bînin dikarin peyda bikin û daxînin telefonên xwe.

Di cîhanê de yek ji sepana ku herî zêde peyam pê tên şandin WhatsApp ku bi kurdî hat amadekirin kêfa bikarhenerên kurd jî anî. Yek ji hezkiriyê zimanê kurdî Gernas Nenas ê ku di warê amûr û videoyên teknolojiyê li ser kurdî dixebite demek dirêj bû ji bo ku WahatsAppê wergerîne kurdî dixebitî û vê xebata xwe temam kir.

Nenas bi qasî mehekê dema xwe da ser çêkirina WhatsAppa kurdî û bi sepana bernameya bi navê APK Edîtor a di telefonê de çêkir. Nenas behsa xebata xwe kir. Nenas anî ziman ku zimanê kurdî ne tenê zimanê axaftinê ye di heman demê de zimanê nivîsandin û xwendinê ye û wiha got: “Pir fikirîm li ser teknolojiyê. Çima em teknolojiyê bi zimanek din bi kar tînin. Lewma min xwest êdî WahatsAppa kurdî jî hebe. Min çend caran bi WhatsAppê re têkilî danî lê bersiveke erênî nedan. Xwe nêzî WhatsAppa kurdî nekirin. Min li ser sepanê APK Edîtor ewil ji bo xwe ceriband. Piştî min ceriband serkeftî bû û min dît ku tê wergerandin. Piştre ez fikirîm ku çêbikim û vê sepana kurdî belav bikim.”

'Bi vê xebatê şa dibim'

Nenas diyar kir ku ji ber ferhengek peyvên teknolojiyê nîne di warê bicihkirina peyvan de hinek zehmetî kişandiye û wiha dewam kir: “Ji bilî zehmetiya peyvan, wekî din ev xebat xweş dimeşe. Xebata kurdî ji bo min cihê kêfxweşiyê ye. Pê şa dibim û nawestim. Dixwazim vê yekê jî bêjim dibe ku hin peyv ‘çêker bin’ ji ber vê yekê jî lêborîna xwe ji bikarhêneran dixwazim. Ji bo alîkariya hemû heval û dostan jî spasdar im.”

Nenas da zanîn ku ji destpêkê heta dawî hemû beşên wê bi kurdî ne û wiha got: “Heke bikarhêner rabin tê de bi tirkî binivîsin ne bi kurdî ye lê heke bi kurdî binivîsin her tiştê wê dibe kurdî. Hemû naveroka wê bi kurdî ye. Va me çêkir îcar dora bikarhênera ye. Ez daxwaz dikim ku tê de bi tirkî nenivîsin. Em hêvî dikin ku dê hemû bikarhêner ji heval û dostên xwe re par ve bikin û wê WhatsApp jî bibîne ku va kurd xwedî li zimanê xwe derdikevin. Belkî êdî ew jî bi awayekî fermî bi zimanê kurdî WhatsAppê çêbikin ku em dikaribin daxînin.”

Li ser teknistan.com'ê tê daxistin

Nenas destnîşan kir ku ew ê sepana WhatsAppa Kurdî li ser malpera http://teknistan.com/ dê belav bikin û wiha got: “Em ê ji bo daxistina WhatsAppê hemû tiştî binivîsin li ser malpera teknîstanê. Daxistina wê zor nîne. Teinê li şûna ku di Play Storeyê de daxînin, dê li ser teknîstanê daxînin. Her tişt eynî ye. Ne hewce ye pê li tiştekî teknîkî bikin, dadixînin û saz dikin.”

Nenas got ji ber ku WhatsAppa kurdî ji şîrketa WhatsAppê re ne fermî ye qebûl nake ku Play Store sepanê bide belavkirin. Nenas da zanîn ku di sala 2016’an de jî serwîsa peyam şandinê Telegram jî wergerandiye kurdî û sepana “lîstika peyva” ya bi kurdî çêkiriye û bernameya “lîstika milyoner” jî wergerandiye kurdî û li ser Play Storeyê tê peydakirin. Nenas her dawî got WhatsAppa kurdî ku hatiye çêkirin tenê ji bo telefonên Androîd hatiye amadekirin.

Albuma Nûçeyê