KIRMANCKÎ

Wateyê Roşanan - Nûşteyê Nesrîn Navdar

Dem : 16 Pûşper 2018 Şemî

Nesrîn Navdar

Roşanî rocê şabîyayîşê însanî yê. Roşanan de herkes cayê xo ra hewl dano ke şa bibo û derdorê xo şa bikero. Heme bawerîyan, heme kulturan û heme nîjadan de miheqqeq roşanî estê.

Her bawerî, her kultur û her nîjad bi awayêke roşanan bimbarek keno la, armanca hemine zî nuxtayke de reseno pê; şakerdişê însanan de helbet.

Mîyanê bawerîyanê semawî de Îslamîyetî zî ca dayo rocê şabûne însanan û zerreyê serrêke de di roşanî û pê ser de hewt rocî şabîyayîşê însanan rê abirrnayo. Îslamîyet de roşanan de werêamyayîşê herednayan, hetkarîya muhtacan û peynîardişê ro neyartî û kîndarîye însanan ser de ameyo ferzkerdişî.

Her merdimêke, her şexsêke bicaardişê nê wezîfeyî ra verpersîyar o. Û sey ke yeno zanayîşî verepersîyarî û wezîfeyo pîl zî kono rayveberanê ay cayî ser ke roşan tede yeno kerdişî.

Wexta rayveberê cayêke nê wezîfeyan û verepersîyanê xo bi ca nêaro guna û cezayê înan yê bînan ra çend qat zêdehîrê virazêno. Çi heyf ke na rayveberîya nikayî ke destê AKP/Erdoganî de ya zî xaseten her serre rocê roşananê sey Remezan û ey Qurbanan de ke Homayî bexşê mislimanan û heme însanîyetî kerdê bi kîndarî û neyartîyêke pîle şarê Kurdî ser de zilmê xo varrnenê. Û nê kerdişanê xo yê teberê mislimantî û însanetî de zî meşrû ramocnenê.

AKP û Reîsê ey tenê semedo ke dizdî û nêrayîrîyanê xo şarî ra bilimnê û îqtîdarê xo bidomnê şaristanêke sey Efrînî ke mîyanê cehenemê Sûrîye de cenetê merdimahî, aştî û aramîya heme şaran bi açarna cehenem û heme şarêke ewca mîyanê aştî û refahî de hewêyayne kiştî, keyeyê înan xera kerdî, dayî macirkerdişî û kaşê sefaletî kerdî.

Nika nê roşanî de bi hezaran cinî, mêrdey, tûtî, ciwan û extîyarê Efrînicî sirf semedê hirsê îqtîdarî û waştişê palkursî ey Erdoganî keyeyê xo û merdimanê xo ra dûrî û mîyanê sefaletî de hewl danê roşanê yewbînan bimbarek bikerê. La no ten tenê di wêrankerdişê Efrînî de nêmend û dimayê Rocawanî verê xo da Başûrî zî û bi qewetê xo yê teknîkî û sîlehan wazeno Kurdanê Başûrî ser de zî hukim bikero û weçînayîşê bi zorî yê vîst û çarê Hezîrane de xo bifîno çimê miletê Tirkî ke şîyes serrî yo mezgê înan bi rihê nîjadperestî kerdo de.

No merdimo ke semedo ke biarso armancê xo her çî xo rê mubah vîneno hewl dano nê weçînayîşî de zî hîlekarîyanê xo bifîno dewre û senîn ke ey bê war verdayê wazeno bi dek û dolaban na ray zî şarê Kurdî bê sîyaset verdo.

Eyro ancî vecêno raşteyan, destêke ey bi gunye Sûrî, Cizîre, Nisêbîn û şaristanê bînan, destêke ey zî bi gune Efrînî sûrkerde şaranê nê şaristanan ra venganê înan wazeno ke qirkeridşanê xo înan ser de verdewam bikero. La ancî zî wina eyseno ke tersê ey hetê HDPî ra zehf o û na partîya şaran bi şewe hewnê ey heremnena.

Her çiqas dîktatorî bi weçînayîş palkursîyan ra nînê war zî hêvîya şaran na ray pîla û bawer kenê ke na ray dîktatorêke bi weçînayîş bîyarê war û nê roşanî ro şaran bikerê di roşanî.

Albuma Nûçeyê