KIRMANCKÎ

Têkoşîna Ma Domêna - Nûşteyê Nesrîn Navdar

Dem : 08 Pûşper 2018 În

Nesrîn Navdar

Reya çarine merheba wendoxê ercîyayey, mîyanê hîrê serran de na reya çarine ya ke nameyê ma bedelêno. La senîn ke desthilat û dagirkerî fek neyartîya şarê Kurdî û neyartîya ziwanê înan ra verra nêdanê, senîn ke qedexe û tedayanê xo serre bi serre zêdnenê, şarê Kurdî zî bi xoverdayîşêke girde, bi têkoşînêke pîroze estbîyayîşê xo û ziwanê xo paweno.

Yeno zanayîşî ke bi se serran o şarê ma têkoşîna estbîyayîşê xo yê neteweyî dano û bi des serran o ke têkoşîna ziwanî dano. Bi qasê têkoşîna estbîyayîşî wina zî hemverê nê dagirkeran têkoşîna ziwanî dayo. Asîmîlasyono ke dimayê awankerdişê Komara Tirkiye hetê ziwanî de Kurdan ser de ameyo bicaardişî serre bi serre zêdyayo û eyro ameyo kerta tewr berz e. Serrê newayan de qedexe û tedayî ziwanê Kurdî ser de zêde bî la dimayê nê di hîrê serrê peyînan asîmîlasyonê înan hîrê çar qatî dayo serê serranê newayan. Heme saziyê ke bi perwerdehî ziwan aver benê, saziyê kultur, edebîyat û huner, saziyê çapamenî û medya (tv, rocnamey û zwb.) bi temamî ameyî girotişî. Heta na desthilatîya ke hetê neyartîya xo ya ziwanê Kurdî ra heme rayîran xo rê mubah vînena weşanxaneyê şarê ma zî xesp kerdî.

La senîn ke heskerdan û kedkaranê ziwanî milê bînan de xebatê xo bê mîyanber domnayî, xebatkar û kedkaranê rocnameyanê ma zî bê mîyanber xebetyayî û rayîrêke bîn ê têkoşîne cerebna û hemverê desthilat, dagirker û dîktatoran ancî va ma tîya yê û ma go tîya bê.

Ma zanê ke mexsedêke bîn ê na desthilatî zî girotiş û desteserkerdişê çapemenî û medya ra no bi ke kerdişanê xo yê teberê merdimahî û teberê heqanê merdiman de ke şarê Kurdî ser de ano û neheqiyanê ke heme şaranê Tirkiye ser de bi ca ano raya pêroyî ya dinya ra limte verdo. Xo ra heme medayaya Tirkan kerda binê emrê xo û heme bi fekêke weşêyenê. Semedo ke zano ke medyaya Kurdan rastîyan ra tawîz nêdana wazeno ke aye zî bi qedexekerdişan û girtoşina bêveng bikero û vernîya dîktatoriya xo hîra bikero û weçînayîşê verwextî de zî xo rê açarno sey avantajêke.

La wina eyseno ke ey hema zî fam nêkerdo ke şarê Kurdî ro heme dek û dolabanê na desthilatîya se serran hesya yo, go nê weçênayîşî de zî bi têkoşîna xo heme hesabanê ey veng veco û go bi ey û şirîkanê ey bido qebûlkerdişî ke ma estê û ma tîya yê.

Kurdî baş zanê ke her tim nameyê partî û şexsanê ke yenê îktîdar bedelyenê la zilmê înan û anyayîşê înan ê kurdan rê nêbedelyeno û cayê xo ra yeno domnayîşî.

Senîn ke ti ferqêke mîyanberê partîyanê înan ê demokratan û muhavezekaran, rastan û çepan, nîjadperest û humanîstan de çinêbîyo go eyro ra tepya zî mîyanberê partîyanê înan ê neweyan û kanan de ti ferqêke çinêbo. Eynî awayî semedê şexsanê înan zî derbas beno. Padîşanê înan ra bigîrê heta Serekkomaranê înan, Atayanê înan ra bigîrê heta Reîsanê înan ti ferqêke mîyanberê înan de çinêbîyo û ma zanê ke siba roc zî go mîyanberê vergan û mêşinanê înan de, ampûlan û tîranê înan de yan zî mîyanberê qalindan û tenikan înan de zî ti ferqêke çinêbo.

Û senîn ke ey fek neteweperestî û faşîstîya xo ra verra nêdanê, ma zî her çiqas her tim neçar ameyê verdayîşî ke nameyê partî, sazî, rocname û tv’yanê xo bibedelnê, ê ma zî vindertişê ma, xoverdayîşê ma û têkoşîna ma ya semedê azadî, têdûştî û aştîya şaran qet nêbedelyaya, wina domyaya û go wina bidomyo. Heta serkewtişê şaran bi ca bêro go têkoşîna şarê Kurdî bidomyo.

Albuma Nûçeyê