KIRMANCKÎ

Tanrikulu: AYM bî ortaxê polîtîkayan

Dem : 11 Tebax 2018 Şemî

Tirkîya de pelçiqnayîşê heqê merdiman tewr zêde prosesê qedexeyê tebervejîyayîş û Rewşa OHALî de zêde bî. Na rewşe raporan de zî vejîya raşte û amey tesdîqkerdiş. Hemwelatîyî vera hende pelçiqnayîşê heqê merdiman de muracatê Mehkemaya Qanûno Bingeyî (AYM) kerdî.

Mabenê 23ê êlulê 2012î û 30 hezîrana 2018î de 176 hezar û 951 kesî seba ‘muhakemekerdişê adil’, ‘37 hezar û 294 kesî seba ‘mulkîyet’, 26 hezar û 538 kesî seba ‘pelçiqnayîşê heqê cîyakerdişî’, 13 hezar û 439 kesî seba ‘azadî û asayî’, 7 hezar û 704 kesî seba ‘cuye’, 5 hezar û 250 kesî seba ‘pelçiqnayîşê azadîya fikirî’, 3 hezar û 578 kesî seba ‘muameleyê xirab û îşkence’, 3 hezar 22 kesî seba ‘perwerdeyî’, 2 hezar û 613 kesî seba ‘îxlalê heqê kombîyayîş û çalakîyan’ û hezar û 316 kesî zî seba ‘îxlalê heqê azadî û bawerî’ bi hawayo fermî muracatê AYMyî kerdî. Serra 2013î de 9 hezar û 897, serra 2014î de 20 hezar û 578, serra 2015î de 20 hezar û 376, serra 2016î de 80 hezar û 756, serra 2017î de 40 hezar û 530 û 6 aşmê serra 2018î de zî 17 hezar û 892 kesî muracatê AYMyî kerdî. Babete ser o Serekwekîlê Komîsyonê Cigêrayîşê Heqê Merdiman yê Meclis û Parlementerê CHPyî yê Stenbolî Sezgîn Tanrikuluyî qisey kerd.

Para AYMyî zî esto

 Tanrikuluyî qiseykerdişê xo de da zanayîş ke sebebê na rewşe hukmatê AKPyî yo û wina dewam kerd: “Pelçiqnayîşê heqê merdiman bîyo, polîtîkayê hukmatî. Îqtîdaro siyasî vernîya pelçiqnayîşê heqan akeno. Îqtîdar goş nêdano nê pelçiqnayîş û îxlalan. Kesê ke nê çiyan vanê sey ‘xayîn, terorîst’ yenî nîşandayîş. Nê îxlal û pelçiknayîşan de para AYMyî zî esto. AYM bî ortaxê polîtîkayan.” ANQARA

Albuma Nûçeyê