KIRMANCKÎ

Seba ke Helînî nemirî ez do raya xo bida HDPyî

Dem : 28 Avrêl 2018 Duşem

Nîhat Palandokenî pîyê wendekara lîseye Helîn Palandokene (17) ke 13ê Teşrîna verêne 2017î de hetê Mustafa Yetgînî ra bajarê Stenbolî de ameybî qetilkerdiş o. Palandokenî qetilkerdişê kênaya xo ra dima seba çekdarbîyayîşê ferdî dest bi kampanyaya îmzeye kerd. Heta nika 30 hezar kesî îmze eştî. Palandokenî dîyar kerd ke seba ke sewbîna Helîne nêrî qetilkerdiş, do weçînayîşî de reya xo bido Partîya Demokratîke ya Şaran (HDP). Pîyê wendekara lîseye Helîn Palandokene (17) ke amey qetilkerdiş Nîhat Palandokenî derheqê weçînayîşî de qisey kerd.

Palandokenî ke mîyanê xebatanê HDPyî de ca gêno destpêkê qiseykerdişê xo de dîyar kerd ke qatilê kênaya ci Mustafa Yetgînî îfadeyê xo de vato ‘Mi çek înternetî ra herîna yo’ û wina dewam kerd: “Cok ra mi dest bi kampanyaya îmze kerd. Ez seba arêdayîşê îmzeyan keye bi keye gêrena. Hedefê mi arêdayîşê mîlyonêk îmzeyan o. Ez do nê îmzayan teslîmê Serekkomarîya Meclîsî bikera.”

Palandokenî dewamê qiseykerdişê xo de qala kênaya xo Helîne kerd û wina va: “Hedefê mi o yo ke sewbîna Helînî nêrî qetilkerdiş û seba vindarnayîşê qetlîaman ez îmzeyan arê dana. Kênaya mi êdî nêagêrena. Mi seba sewbîna Helîn û Ozgecanan dest bi kampanyaya îmzeyan kerd. Wexto ke îmze biresî mîlyonêk, ma do çalakî bivirazî û nê îmzeyan teslîmê meclîsî bikerî. Herheqê babete de heta nika 5 reyan pêşnîyazname pêşnîyazê meclîsî ameyî kerdiş. HDP û CHPyî nê pêşnîyaznemeyan qebul kerdî. Labelê îqtîdar red kerd. Îqtîdar wazeno hîna zêde ciwan, merdim û cinîyî bêrî qetilkerdiş.”

Palandokenî qiseykerdişê xo yê peyênan de zî wina va: “16 serrê îqtîdarîyê AKPyî de qetilbîyayîşê cinîyan hîna zêde bîyî. Ma îqtîdarî rê vanî; êdî bes o. Bi serran o ke ez endamê CHPyî bîya. Labelê ez do weçînayîşî de reya xo bida HDPyî. Ganî no kay bêro xeripnayîş. No zî bi HDPyî mumkun o. Selahattin Demirtaş siyasetmedarêko pîl o. Ma nêeşkenî na rastî red bikerî. Kênaya mi şî. Wa canê sewbîna kesan nêşêrî û sewbîna Helînî nêrî qetilkerdiş.” STENBOL

Albuma Nûçeyê