KIRMANCKÎ

Se bikerî zî ma do sindoqan bipawî

Dem : 12 Pûşper 2018 Sêşem

Serekwekîla Koma HDPyî Meral Daniş Beştaşe dîyar kerde ke bajarê kurdan de walî û qeymeqamî sey serekê qeza û bajaran yê AKPyî xebitîyenî û wina va: “Wa baş bizanî ke ê se bikerî zî ma do sindoqan bipawî. Qederê weçînayîşî rayêk ra dîyar beno”

Weçînayîşê 24ê Hezîrane rê tay mend û Kurdistan, Tirkîya û Ewropa de lez dîyayo xebatanê weçînayîşî. Partîya Şaran ya Demokratîke (HDP) çarçewaya xebatanê weçînayîşî de hewl dano heme cayan de xo biresno şarî û destek biwazo. Xebatanê weçînayîşî de seba pawitişê sindoqan veng yeno dayîş û kesê ke cayê sindoqê înan ameyî bedilnayîş û erşawîyayî herêma qorîcîyan do bi wesayîtan şêrî cayê raydayîşî. Serekwekîla Koma Partîya Demokratîke ya Şaran (HDP) Meral Daniş Beştaşe qisey kerde û dîyar kerde ke bajarê kurdan de walî û qeymeqamî seba xebata weçînayîşî sey serekê qeza û bajaran yê AKPyî xebitîyenî.

Beştaşe qiseykerdişê xo de reaksîyon nawite na rewşe û wina va: “Weçînayîşî ra ver cayê 270 hezar rayan ame bedilnayîş. 19 bajaran de bi mehneya pawitişî sindoqî ameyî bedilnayîş. Her çi beno wa bibo, ma do 24ê Hezîrane de sindoqan bipawî. Ma muracatê Heyetê Weçînayîşî yê Berzî (YSK) kerd. Komeleyê dewlete sey komeleyê AKPyî xebitîyenî. Îradeya şarî nêşinasnenî. Bedilnayîşê cayê sindoqan huqûqî nîyo. Cayê sindoqê HDPyî de AKPyî hakim î. Weçînayîşî de beno ke hîleyê tewir bi tewir bikewî dewre. Labelê se bikerî zî ma do sindoqan bipawî. Şarê ma do wayîrê sindoqan bivejî û bipawî. Qederê weçînayîşî rayêk ra dîyar beno.”

Rayêk HDP, rayêk Demîrtaş

Beştaşe qiseykerdişê xo yê peyênan de wina va: “Walîyê bajaran bi mehneya OHALî xebata weçînayîşî ya sewbîna partîyan asteng kenî. Weçînayîş şert û mercê seyyewbînanî de nêvirazîyeno. AKP heme îmkanê dewlete seba xebatanê weçînayîşî xebitneno. Ma bawerîya xo bi hêz û îradeya şarî kenî. Ma no esasî ser de xebatan kenî. No weçînayîşî de ya do faşîzm qezenc bikero, ya zî do şar qezenc bikero. Eke ma qezenc bikerî, ma do azadî û demokrasî awan bikerî. Rayêk bidêne HDPyî, rayêk zî bidêne Demîrtaşî.” EDENE

Albuma Nûçeyê