KIRMANCKÎ

Şar zano ke çi wazeno

Dem : 17 Pûşper 2018 Yekşem

Weçînayîşê 24ê Hezîrane rê 8 rojî mendî û her ke şono xebatê weçînayîşî ver bi peynîye şonî. Partîya Demokratîke ya Şaran (HDP) zî na çarçewa de lez dayo xebatanê xo û bajar bi bajar xebatê weçînayîşî domnena. Namzeda HDPyî ya Îzmîrî Serpîl Kemalbaye derheqê xebatê weçînayîşî de qisey kerdî û melumatê muhîmî daye.

Namzeda HDPyî ya Îzmîrî Serpîl Kemalbaye zî weçînayîşê 24ê Hezîrane ser o qisey kerde. Kemalbaye qala muhîmîya weçînayîşan kerde û wina va: “Hedefê ma o yo ke ma tewr tay 4 parlamenteran Îzmîr ra bivejî. Ma atmosferê weçînayîşî ver keyfweş î. Fehmo ke AKPyî awan kerdo û tesîrê ê fehmî êdî sey verênî nêmendo. Ziqaqan de welatîyê sey AKP û MHPyî nêfikirîyenî. Wexto ke ma şonî zîyaretê keyeyan, herkes qayîl o ke HDP meclîs de bibo. Şar qerardar o ke 24ê Hezîrane peynîya îqtîdarê Erdoganî bîyaro. Şar zaf baş zano ke çi reyde têrî yo.”

Kemalbaye arde ziwan ke weçînayîş yeno mehnaya muracatê îradeyê şarî û seba nê zî ganî hawirêke adîlane bêro awankerdiş û wina va: “Serekomar vano ‘planê ma yê A û B estê’. No zî mojneno ke weçînayîşêke azad nîyo. Weçînayîşêke demokratîk de planê A, B, C û D nêbenê. Weçînayîşêke demokratîk de îradeyê şarî ganî bibo. Her kes zî do îradeyê ke vejêno vajo temam.”

Kemalbaye bale ante serê barkerdişê sindoqan zî û da zanayîş ke sindoqan berê ça zî do weçînitoxanê xo berê uca û seba asayîşê sindoqan wezîfedarê sindoqan û muşahîd awan kerdê. Serpîle wina dewam kerde: “AKP 7ê Hezîrane û heta nika polîtîkayê şer meşnaw. Dimayê nê bi destê îqtîdarî koas ame awankerdiş. Hemserek, hemşaredar, parlamenter û nêzdîyê 6 hezar partî ameyî tepiştiş. Hewl dayî HDPî çin bikerê. Nika zî eynî çî kenê û wazenê reyna şar şêro hetê înan. La netîce de awake de merdimî nêeşkenê xo di rey bişutê.” ÎZMÎR

Albuma Nûçeyê