KIRMANCKÎ

Raşteyan de ruhê serkewtişî

Dem : 31 Avrêl 2018 Pêncşem

7 serreyî ra heta 70 serreyî bi hezaran kesî Kurdistan, Tirkîya û Ewropa de seba xebatê weçînayîşê 24ê Hezîrane vejîyayî raşteyan. HDPyî xeylê cayan de buroyê weçînayîşî akerdî û esnafî zîyaret kerdî. Şar bi coşêko gird wayîrê namzedanê xo vejîya

Xebate û amadekarîyê weçînayîşê 24ê Hezîrane bi hawayo lezabez dewam kenî. Partîya Demokratîke ya Şaran (HDP) xeylê merkezan de xebatê weçînayîşî organîze kerdî. Çarçewaya xebatan de Îzmîr, Aydin, Êlih, Silopî, Meletî, Wan û sewbîna xeylê cayan de buroyî ameyî akerdiş, esnafî ameyî zîyaretkerdiş û xebatê tewir bi tewirî ameyî kerdiş. Waştişê şarî ame goşdarîkerdiş û vilawekî ameyî vilakerdiş.

Namzedan ra Serpîl Kemalbaye qezaya Buca ya Îzmîrî de xîtabê şarî kerde û wina va: “Herçiqas ke AKP vera şaranê Tirkîya de vînî kena, labelê vînîkerdişê xo qebul nêkena. Programê HDPyî de demokratîkbîyayîş esto. Ma hewl danî feqîrî û bêedaletîye wedarnî. Kesê ke înşatan de xebetîyenî, domanê ma yî. Ma bac danî dewlete, labelê dewlete pê bacê ma qesran virazena. Ganî ma destûr nêdî rayanê bi bitirawî.”

Namzedê HDPyî yê Aydinî esnafan zîyaret kerdî. Wextê zîyaretî de siloganî ameyî eştiş. Namzedî bi coşêko gird kewtî taxan û şar bi çepik û tilîlîyan ame namzedan ver. Namzedan ra Ferhat Tunçî bi deyîranê xo moralêko gird da şarî.

Namzedê HDPyî yê Êlihî serê sibayî ra heta şanî xebatê xo domnayî. Namzeda Êlihî Feleknas Ucaye bi cinitişê erbane, ziqaqanê Êlihî de şarî reyde ameye têhet. Taxa Guney Kentî de buroyê weçînayîşî ameyî akerdiş. Ucaye dîyar kerde ke eke ciwanê Êlihî vanî ‘cinî cuye azadî’ o wext no kar temam o û wina domnaye: “Roja ke ma ameyî Êlih, polîsan vernîya wesayîta ma girewtbî û vatbî ‘eke ciwanê siloganan bierzî, ma do mudaxale bikerî’. Ma, ciwanê ma û dayîkê ma tîya de yî. Ma nêtersenî. Heta ke ciwanî bibî ma do qezenç bikerî.”

Hemserekê Şaredarîya Êlihî Sabrî Ozdemîro ke herinda ci de qayûm ame tayînkerdiş zî qisey kerd. Ozdemîrî va ‘çimê ma çîyêk çin o, cayê ma hetê şarê ma de yo’ û wina dewam kerd: “Ma seba weçînayîşan vatbi ‘ma do heme namzedan bivejî’. Eke şima qebul kenî, bikerê. Neke heta cehenemî rayîrê şima esto.”

Rêxistina bajarî ya Şirnexî ya Partîya Demokratîke ya Şaran (HDP) çarçewaya xebatanê weçînayîşî de buroyê xo yê 2. akerde. Bi hezaran kesî beşdarê akerdişî bîyî. Bi ameyîşê namzedan herkes sloganê ‘Silopî şima reyde îftîxar kena’ eştî. Verê rêzgirewtiş ame viraştiş û dima ra Hemsereka HDPyî ya Şirnexî Zeynep Unate qisey kerde. Dima ra Parlamentere Leyla Bîrlîke qisey kerde û bale ante sîyasetmedaranê tewqîfbîyayeyan ser.

Dima ra namzedî Huseyîn Kaçmaz, Hasan Ozguneş û Serdar Kunîyî qisey kerdî. Namzedan ra Nuran Îmîre zî qisey kerde û qala Dayîka Taybete kerde. Îmîre wina va: “Ma do dolbenda Dayîka Taybete ke erd de mende, wedarnî.” Qiseykerdişan ra dima qurdeleya akerdişê buroyî ameye birnayîş. Program bi govenda ke hetê bi hezaran kesan reyde ameye girewtiş, qedîya. AMED

Albuma Nûçeyê