KIRMANCKÎ

Qetlîyamê Cizîr û Şengalî manenê yewbînan

Dem : 11 Tebax 2018 Şemî

Parlamentera HDPyî ya êzidî Feleknas Ucaye bi wesîleya serrgêra 4. Qetlîyamê Êzidîyan şîye Şengal û Musilî. Ucaye dîyar kerde ke texrîbatê DAIŞ û qedexeyê tebervejîyayîşî manenî yewbînan û va: “Fotografê Cizîr, Sûr, Musil û Şengalî bi yew qeleme ameyî xêze kerdene”

3ê Tebaxa 2014î de çeteyanê DAIŞî hêrişê bajarê Şengalî kerdbî û netîceyê hêrişî de bi hezaran êzidîyî ameybî qetil kerdene, bi hezaran êzidîyî birîndar bîybî û bi sehezar êzidîyî zî mecbûr mendbî ke ca û warê xo biteriknî.

Reyna bi hezaran cinî û domanê êzidîyî ameybî remnayene û bazaran de ameybî rotene. Ewro hîna zî destê çeteyan de êzidîyî estî. No qetlîyam hetê êzidîyan ra sey fermanê 73. amebî şinase kerdene. Emserr serrgêra 4. ya fermanê 73. o.

Parlamentera Partîya Demokratîke ya Şaran (HDP) ya êzidî Feleknas Ucaye bi wesîleya serrgêra 4. yê Qetlîyamê Êzidîyan ke hetê DAIŞî û ortaxîya hêzê teberî ra amebî kerdene, şîye Şengal û Musilî. Ucaye qiseykerdişê xo de dîyar kerde ke texrîbatê DAIŞ û qedexeyê tebervejîyayîşî manenî yewbînan û fotografê Cizîr, Sûr, Musil û Şengalî bi yew qeleme ameyî xêze kerdene

Ucaye destpêkê zîyaretê Şengal û Musilî de şîye Zîndanê Badoşî yê Musilî ke bi hezaran cinîyê êzidî hetê DAIŞî ra tîya de amebî îşkencekerdiş û wina va: “Wexto ke mi şahidê îşkenceyan Zindanê Badoşî dîye, qetlîyamê Musilî ame çimanê mi vera. Mezelê komî yê 500 kesan ameyî dîyiş. Cinîyê êzidî tîya de ameyî îşkencekerdiş û bazaran de ameyî rotiş. Raştî zî prosesêk giran bîye.”

Her game de cinî û doman estî

Ucaye dewamê qiseykerdişê xo de wina va: “90 hezar êzidîyî qetlîyamê DAIŞî vera koç kerdî. La reyna agêrayî dewanê xo û herra xo zerdun kerdî. Ez her gama xo de cinî û domanê ke raştê îşkenceyî ameyî hîs kena.

Merdimî bi linganê xo yê rutûrepalan mîyanê kela hamnanî de mecbur mendî ke koç bikerî. Qetlîyamê Cizîr û Şengalî manenê yewbînan. Fotografê Cizîr, Sûr, Musil û Şengalî bi yew qeleme ameyî xêze kerdene. Ganî ma birînê yewbînan bilefnî. Vera qetlîyaman de mesajê tewr muhîm têkoşînê ortax o.” AMED

Albuma Nûçeyê