KIRMANCKÎ

Prosesê weçînayîşî firsend o - Nûşteyê Serhildan Andan

Dem : 04 Pûşper 2018 Duşem

Serhildan Andan

Rojeva welatî binî ra heta sere weçînayîş a û sewbîna tu çiyêk zî nêreseno goşê merdiman. Heme xeberî tena weçînayîş ser o yî û heme şaristanan de vengê deyîranê weçînayîşî yê partîyan berz benî. Zaf dûrî de ney serrêk verê cu hêna eynî çiyî bibî. Referandûmê 16ê nîsane estibi. Û atmosfera weçînayîşî hakimê heme cayan bibi. Esasê xo de nê çar serranê peyênan de merdim eşkeno vajo ke Tirkîye bîyo welatê weçînayîşan. 2014 de weçînayîşê herêmî, 2015 de di hew pê ser weçînayîşê pêroyî, 2017 de referandum û emserr zî hêna newe ra hem weçînayîşê parlamenteran hem zî weçînayîşê serekkomarî…

Dinya de tu cayan de bê Tirkîye weçînayîş endêk nêbîyo ercan. Weçînayîşo ke merdimî temsîlkarê îradeyanê xo weçînenî senî endêk beno ercan? Raşta ci wexto ke merdim tena na çarçewe ra biewno weçînayîşanê Tirkîye, eşkeno vajo ke demokrasî qet verê xo tanêdaya tîya û tîya de qet nêcuyaya. A demokrasîya ke îxtîyacîya nê welatî pê esta senî nêeşkena tîya de bicuya? Serdestê nê welatî wexto ke fekê xo akenî, vanî demokrasî. Goreyê xo demokrasî qebûl kenî û hêna goreyê xo nê weçînayîşî ke qet nê welatî de nêqedîyenî virazenî…

Perçeyêka a demokrasîya Tirkîye zî 24ê hezîrane ya. Weçînayîşo verwext o ke do weçînayoxî hem parlamenteran hem zî serekkomar biweçînî ra tay rojî mendî. No weçînayîş seba demokrasîya Tirkîye ke ha binê erdî de nimite ya zaf muhîm o. Hikûmeto 16 serran demokrasîya ke eşkayêne tay çiyan bibedelna eşt binê erdî û nameyê aye ser o wazeno merdiman bixapîno. Nimuneyê nê xapînayîşî xura weçînayîşo verwext o; weçînayîşo ke hikûmet waşt muxalîfan teberê parlamento de biverdo. Hikûmet û şîrîkê ey MHP vatêne qey do muxalîfî, sere de zî kurdî do no weçînayîşo verwext de tesîrê xo yê ke şaran ser o estî vindî bikerî labelê roja ke qirarê weçînayîşî ame dayîş, mîyanê şaranê Tirkîye de heyecanêk dest pêkerd. La dişmentîya kurdan ke Tirkîye de politikaya esasin a no heyecan kerd kêmî. Heme hetî na dişmentîye ser o tîfaqan viraştî û HDP ke temsîlkarê şaran o û dişmentîya kurdan tu wext qebûl nêkerdo teberê heme tîfaqan de mend. Naye mojnena ma ke tîfaqê ke bi nameyê ‘cumhur û milet’ ameyê viraştiş tîfaqê demokrasî û şaran ney tîfaqê statuko yê.

Statuko yo ke 4 serrî yo ke îradeyê şarî ser o kay keno û mîyanê çar serran de weçînayîşê ke ameyê viraştiş nêşinasno; do 24ê hezîrane de zî hedefê ci eynî yo. Se beno wa bibo statuko yan zî hêzê serdestî fek hedefê xo ra veranêdanî û wazenî demokrasî her tim binê erdî de bo. Vera naye de hezêk her tim esto û pawitoxê demokrasîya heme şaran o… O pawitox nika HDP yo û Selahattîn Demîrtaş o. Pawitoxîya înan do tesîrê xo senî bikero merdim eşkeno nika ra hîs bikero labelê statuko de dek û dolebî nêqedîyenî. Tena na tablo mojnena ma ke weçînayîşî do nêqedîyê. 24ê hezîrane çendêk muhîm bo endêk zî teberê demokrasî û hiqûqî de yo… Na rewşe tena mojnena ma ke do Tirkîye de weçînayîşî demêko kilm de nêqedî.

Çunk îqtîdaro nikayîn eşkeno nê bêhiqûqîyan xo rê bikero firsend. Labelê seba şaran bitaybetî zî seba şarê kurdî weçînayîş ney prosesê weçînayîşî firsend o. Çunke di serrî yo ke herême de çalakîyê winasî ke merdiman bîyarê pêser çinêbi û nika heme cayan de estî. No proses, prosesê newe ra xo rêxistinkerdiş o…

Albuma Nûçeyê