KIRMANCKÎ

Peynîya pêrodayîşan de Tirkîya esta

Dem : 25 Pûşper 2018 Duşem

Parlementerê kehen yê Ermenistan û çalakgerê siyasî yê heqê merdiman Hamo Moskoviyanî dîyar kerd ke nê des serrê peyênan de pêroyê

Rojhelato Mîyanênî de Tirkîya peynîya heme pêrodayîşan de de bî û veng da komelê mîyanneteweyî ke rayirê dagirkerîya newe yê osmanîyan bigîrî

Seke yeno zanayîş dewleta tirk û bi desan rêxistinê çeteyan bi tanq, top, teyara û sîlehanê teknolojîkan hêrişê Efrînî kerdî. Vera înan de şerwanê YPG û YPJyî xoverdayîşêko tarîxî nîşan dayî. Netîceyê hêrişanê dewleta tirk û çeteyanê girêdayeyê ci de heta nika bi seyan sîvîl, cinî û domanî ameyî qetilkerdiş û bi hezaran hemwelatîyî zî koçê cayê cîya-cîyayan kerdî.

Babete ser o Parlementerê kehen yê Ermenistan û çalakgerê siyasî yê heqê merdiman Hamo Moskoviyanî qisey kerd û qiseykerdişê xo de bale ant dagirkerîya Efrînî ser.

Cinîyan bazaran de rotî

 Moskoviyanî destpêkê qiseykerdişê xo de dîyar kerd ke çarçeweya dagirkerîya Tirkîya ya Efrînî de ê bi parlementerê ermenî û rêxistinê heqê merdiman reyde pêvînayîş viraşto û wina donma: “Şarê ermenî verê cu hetê osmanîyan ra rastê qetlîaman ameyî. Komê çete yê ke girêdayeyê Tirkîyayî senaryoya qetlîamê vera ermenîyan ya 1915î vera hemwelatîyê êzidîyê Şengalî de serra 2015î de dibare kerdî. Çeteyî dest eştî hemwelatîyan û cinîyan bazaran de rotî.”

Hamo Moskoviyanî dewamê qiseykerdişê xo de va ‘Dewletê Ewropa baş şinasnenî ke sîstemê Tirkîya sîstemêk faşîst o û nakokîyê ke nê des serrê peyênan de Rojhelato Mîyanênî de xo dayî teber bi destê sîstemê faşîst yê Tirkîya ra bin nameyê bawerîya îslamî de ameyî vetiş’ û wina dewam kerd: “Rêxistina DAIŞî hetê Tirkîya ra amey awankerdiş û piştî danî înan. Çîyê ke Efrînî de vejîyayî heme ezencê ma yî. Herêma Efrînî de azadî merheleya tewr berzî de bî û nika zî hemwelatîyê ci ameyî koçkerdiş.”

Eynî qatilî qatlîaman pê ardî

Moskoviyanî dewamê qiseykerdişê xo de wina va: “Ganî dewletê Ewropa baş bizanî ke qatilê Efrînî qatilê qetlîamê Berlîn û sewbîna bajarê Ewropa yî. Eynî qatilî her ca de qatlîaman pê ardî. Ganî dewletê Ewropa baş bizanî ke eke nê çeteyî nêrî çinkerdiş, dinya heme binê tehluke de ya.”

Wa bi dîktatorîyê Erdoganî nêxapî

Parlementerê ermenî yê kehen û çalakgerê siyasî Hamo Moskoviyanî qiseykerdişê xo yê peyênan de veng da rêxistinê merdimîye ke piştî bidî hemwelatîyê Efrînî û wina va: “Ma veng danê heme hemwelatîyê Tirkîya ke bi dîktatorîyê Erdoganî nêrî xapênayîş û weçînayîşî de rayan nêdî ci. Ganî Tirkîya de edalet û aştî pê bêro û heme hemwelatîyî heqê xo bigîrî.” ŞEHBA

Albuma Nûçeyê